iMatai ni Tui 2:1-46
2 Ni sa voleka ni mate o Tevita e qai tatau vei Solomoni na luvena:
2 “Au sa vakarau mate.* Ia mo kaukaua,+ mo vakaraitaka ni o tagane.+
3 Mo qarava tiko ga na nomu itavi vei Jiova na nomu Kalou ni o lako tiko ena nona sala, ni o muria tiko na nona lawa, na nona ivakaro, na nona lewa, kei na nona veivakadreti e volai ena Lawa e vola o Mosese,+ o na vinaka* kina ena ka kece o vakayacora kei na vanua kece o goleva.
4 Ena qai vakayacora o Jiova na ka e yalataka me baleti au, ‘Ke ra qarauna na luvemu na nodra ivalavala mera yalodina ni lako e mataqu ena lomadra taucoko kei na nodra vinaka taucoko,*+ ena tiko* e dua ena nomu iyatukawa me dabe ena idabedabe vakaturaga e Isireli.’+
5 “O kila vinaka tale ga na ka e vakayacora vei au o Joapi na luvei Seruaia, na ka e vakayacora vei rau na iliuliu ni mataivalu ni Isireli, o Apineri+ na luvei Neri kei Amasa+ na luvei Jica. E vakamatei rau, e vakadavea na dra+ ni ivalu ena gauna ni sautu qai boroya na dra ni ivalu ena nona beleti e toka e tolona kei na nona ivava e yavana.
6 Mo vakayacora ga me vaka na nomu vuku, me kua ni lako sobu ena vakacegu na uluna sikoa ina iBulubulu.*+
7 “Ia mo vakaraitaka na dei ni nomu loloma vei ira na luvei Pasilai+ na kai Kiliati, mera maliwai ira na kana ena nomu teveli, nira a volekati au+ va qori ena gauna au drovaki Apisalome+ kina na tuakamu.
8 “E tiko vata tale ga kei iko o Semeai na luvei Kira na Penijamini mai Peurimi. O koya ga a rukaki au vakaca+ sara ena siga au lako tiko kina i Meneimi,+ ia ni lako sobu mai me tavaki au ena Joritani, au bubului gona vua ena yaca i Jiova: ‘Au na sega ni vakamatei iko ena iseleiwau.’+
9 Ia mo totogitaki koya sara,+ ni o turaga vuku, o kila na ka mo vakayacora vua, mo kauta sobu na uluna sikoa ina iBulubulu* ena dra.”+
10 Sa qai davo vata kei ira na vo ni tukana o Tevita mani bulu ena Koro i Tevita.+
11 E 40 taucoko na yabaki* na dede ni nona veiliutaki e Isireli o Tevita. E 7 na yabaki e veiliutaki kina e Epironi,+ e 33 na yabaki e veiliutaki kina e Jerusalemi.+
12 E qai dabe o Solomoni ena idabedabe vakaturaga i Tevita na tamana, e vakataudeitaki sara na nona veiliutaki vakatui.+
13 Oti e lako sara yani o Atonaija na luvei Akici vei Pacisepa na tinai Solomoni. E kaya sara o Pacisepa: “E vinaka na inaki ni nomu lako mai?” E sauma o koya: “E vinaka.”
14 E kaya tale: “Au via tukuna vei iko e dua na ka.” E kaya sara o Pacisepa: “Tukuna mai.”
15 E tomana o Atonaija: “O kila vinaka ni a dodonu meu veiliutaki vakatui, era namaka* na lewe i Isireli taucoko meu tui+ qai veisau na veiliutaki vakatui me nei taciqu ni lesi koya+ kina o Jiova.
16 Ia qo e dua ga na ka au kerea vei iko. Mo kua ni bureitaka vei au.” E qai kaya vua o Pacisepa: “Tukuna mai.”
17 E kaya sara o koya: “Yalovinaka, mo kerea vei Solomoni na tui me soli Apisaki+ na goneyalewa ni Sunemi me watiqu, ni na sega ni bureitaka vei iko.”
18 E kaya sara o Pacisepa: “Sa vinaka! Au na lai vosa vua na tui ena vukumu.”
19 E mani lako o Pacisepa vei Tui Solomoni me vosa vua ena vuku i Atonaija. E tucake sara na tui me tavaki koya, e cuva vua. E dabe sara o koya ena nona idabedabe vakatui, e vakarota me vakarautaki e dua na idabedabe me dabe kina o tinana ena nona imatau.
20 E qai kaya o Pacisepa: “E dua ga na noqu kerekere lailai vei iko. Mo kua ni bureitaka vei au.” E mani kaya na tui: “Tukuna mai tinaqu, au na sega ni bureitaka vei iko.”
21 E kaya o Pacisepa: “Me soli mada o Apisaki na goneyalewa ni Sunemi me wati Atonaija na tuakamu.”
22 E kaya sara vei tinana o Tui Solomoni: “Na cava o kerei Apisaki kina na goneyalewa ni Sunemi me nei Atonaija? Vakacava mo kerea tale ga na veiliutaki vakatui me nona,+ ni tuakaqu+ qai tokoni koya o Epaiaca na bete kei Joapi+ na luvei Seruaia.”+
23 E bubului sara ena yaca i Jiova o Tui Solomoni: “Me vakayacora mada ga vei au na Kalou me kuria tale ga, ke sega ni mate o Atonaija ena vuku ni ka e kerea qo.
24 Ia me vaka ni bula dina tiko o Jiova, o koya e vakataudeitaki au,+ e vakadaberi au ena idabedabe vakaturaga i Tevita na tamaqu qai solia vei au+ e dua na vuvale* me vaka e yalataka, ena vakamatei+ nikua o Atonaija.”
25 E talai Penaia+ sara na luvei Jioiata o Tui Solomoni, e lako yani me mokuti Atonaija mani mate.
26 E kaya na tui vei Epaiaca+ na bete: “Mo lako ina nomu vanua i Anacoci!+ E dodonu mo mate, ia au na sega ni vakamatei iko nikua ni o colata na Kato ni Turaga Cecere Duadua o Jiova e mata i Tevita na tamaqu,+ ni o vakila na rarawa kece e vakila o tamaqu.”+
27 E mani cemuri Epaiaca o Solomoni me kua ni veiqaravi tiko vakabete vei Jiova, me vakayacori kina na vosa i Jiova a tukuna me baleta na vuvale i Ilai+ e Sailo.+
28 Ni rogoca o Joapi na itukutuku qori e dro sara ina valelaca i Jiova+ o Joapi me lai kubeta na ileu ena icabocabonisoro, ni a sega ni tokoni Apisalome+ o Joapi, e tokoni Atonaija+ ga.
29 E qai tukuni vei Tui Solomoni: “Sa dro ina valelaca i Jiova o Joapi, e lai toka volekata na icabocabonisoro.” E mani talai Penaia na luvei Jioiata o Solomoni, e kaya: “Mo lai mokuti koya!”
30 E lako sara o Penaia ina valelaca i Jiova qai tukuna vua: “Qo na ka e kaya na tui, ‘Lako mai tuba!’” Ia e kaya o koya: “Sega! Au na mate ga eke.” E lai tukutuku tale vua na tui o Penaia: “Qo na ka e tukuna o Joapi, qo na ka e kaya vei au.”
31 E qai tukuna vua na tui: “Mo vakayacora na ka e tukuna, mo mokuti koya, mo buluti koya, mo kauta tani kina vei au kei na vuvale i tamaqu na dra e vakadavea vakatawadodonu+ o Joapi.
32 O Jiova ga ena sauma tale vua na nona dra, ni sega ni kila o Tevita na tamaqu ni mokuta e rua na tagane yalododonu sara erau uasivi koya, qai vakamatei rau ena iseleiwau: o Apineri+ na luvei Neri na iliuliu ni mataivalu e Isireli+ kei Amasa+ na luvei Jica na iliuliu ni mataivalu e Juta.+
33 Ena tarogi na nodrau dra vei Joapi kei ira na nona kawa me tawamudu,+ ia me tiko na vakacegu i Jiova me sega ni mudu vei Tevita, vei ira na nona kawa, na nona vuvale, kei na nona idabedabe vakaturaga.”
34 E lako cake sara o Penaia na luvei Jioiata qai mokuti Joapi me mate, e bulu ga ena nona vale ena vanua talasiga.
35 E qai lesi Penaia+ na luvei Jioiata o koya na tui me sosomitaki koya me iliuliu ni mataivalu, e lesi Setoki+ na bete o koya na tui me sosomitaki Epaiaca.
36 E qai kacivi Semeai+ na tui, e kaya vua: “Mo tara e dua na nomu vale e Jerusalemi mo tiko kina, mo kua ni lako ina dua tale na vanua.
37 Na siga o na biubiu kina mo takosova na Buca o Kitironi,+ mo kila ni o na mate dina ga. Ena bale ga vei iko na nomu mate.”
38 E kaya vua na tui o Semeai: “Donu vinaka na ka oni tukuna. Ena vakayacora na nomuni dauveiqaravi na ka e tukuna na noqu turaga na tui.” E mani tiko ga o Semeai e Jerusalemi me dua toka na gauna.
39 Oti e tolu na yabaki, erau dro e rua na bobula nei Semeai vei Akisi+ na luvei Meaka na tui Kaca. Ni tukuni vei Semeai: “Raica! Erau tiko mai Kaca na nomu bobula,”
40 e mani vesuka o Semeai na idabedabe ni asa qai lako yani me lai raici Akisi e Kaca ni vaqarai rau na nona bobula. Ni lesu mai Kaca o Semeai kei rau na nona bobula,
41 e tukuni sara vei Solomoni: “E biuti Jerusalemi o Semeai me lako i Kaca, ia sa lesu tale mai.”
42 E kacivi Semeai na tui, e kaya vua: “Vakaevei, au a sega ni bubului ena yaca i Jiova meu vakaroti iko, ‘Ena siga o biubiu kina eke mo lako ena dua tale na vanua, mo kila tiko ni o na mate dina ga’? O a sega ni tukuna vei au, ‘Donu vinaka na ka oni tukuna, au na muria’?+
43 Na cava gona o beca kina na bubului vei Jiova kei na ivakaro au vakaroti iko kina?”
44 E qai tukuna na tui vei Semeai: “O kila e lomamu na ka ca kece o cakava vei Tevita na tamaqu,+ ena sauma vei iko o Jiova na ca qori.+
45 Ia ena vakalougatataki+ o Tui Solomoni, ena vakataudeitaki tiko ga ena mata i Jiova na idabedabe vakaturaga nei Tevita me tawamudu.”
46 E vakaroti Penaia na luvei Jioiata na tui me lako yani me mokuti koya mate.+
E mani vakataudeitaki na matanitu e liga i Solomoni.+
iVakamacala e ra
^ Ipe., “Au sa lako tiko ena vanua era na lakova kece na lewe i vuravura.”
^ Se “yalomatua.”
^ Ipe., “nodra neʹphesh’ kece.” Raica na iVakamacala ni Vosa.
^ Ipe., “sega sara ni muduki e dua.”
^ Se “Seoli,” oya na ibulubulu ni kawatamata. Raica na iVakamacala ni Vosa.
^ Se “Seoli,” oya na ibulubulu ni kawatamata. Raica na iVakamacala ni Vosa.
^ Ipe., “na siga.”
^ Ipe., “vakanamata.”
^ Se “veiliutaki.”
