iMatai ni Tui 18:1-46

  • Tavaki Opetaia kei Eapi o Ilaija (1-18)

  • Vakasota o Ilaija kei ira na parofita nei Peali mai Kameli (19-40)

    • ‘Lomalomarua’ (21)

  • Oti na tolu veimama na yabaki ni lauqa (41-46)

18  Oti toka e dua na gauna, ena ikatolu ni yabaki,+ e vosa vei Ilaija o Jiova, e kaya: “Mo lai vakaraitaki iko vei Eapi, au na vakatauca na uca ena delaniqele.”+  E lako sara o Ilaija me vakaraitaki koya vei Eapi, ni dausiga levu+ tu e Samaria.  Ia e kacivi Opetaia mai o Eapi, e lewa tiko na lewenivuvale. (O Opetaia e dau dokai* Jiova vakalevu,  ni vakamatei ira tiko na parofita i Jiova o Jesepeli,+ e kauta e 100 na parofita o Opetaia qai vunitaki ira vakaya50 ena qaravatu, e vakarautaka tale ga vei ira na madrai kei na wai.)  E kaya sara vei Opetaia o Eapi: “Mo lako yani ena vanua ina waivure kece kei na buca* kece. De daru raica kina na co mera bula kina na ose kei na meule, me kua ni mate kece na nodaru manumanu.”  Erau mani wase na vanua me rau lako kina. E lako duadua o Eapi ena dua na yasana, e lako duadua o Opetaia ena dua tale na yasana.  Ni lako tiko o Opetaia, sa tu mai kea o Ilaija me tavaki koya. E kilai koya sara, e tekicuva qai kaya: “O kemuni o Ilaija, na noqu turaga?”+  E kaya vua: “O yau qo. Mo lako mo kaya vua na nomu turaga: ‘Sa tiko qo o Ilaija.’”  Ia e kaya o koya: “Na cava na noqu cala moni solia kina na nomuni dauveiqaravi vei Eapi me vakamatei au? 10  Me vaka ni bula dina tiko o Jiova na nomuni Kalou, e sega ni vo e dua na vanua se dua na matanitu me talatala kina na noqu turaga me vaqarai kemuni. Era kaya, ‘E sega eke o koya,’ mani vakarota mera bubului na matanitu kei na vanua nira sega ni kunei kemuni rawa.+ 11  Ia oni kaya tiko, ‘Mo lako mo kaya vua na nomu turaga: “Sa tiko qo o Ilaija.”’ 12  Niu biuti kemuni ga, ena kauti kemuni sara na yalo i Jiova+ ina vanua au na sega ni kila, niu tukuna vei Eapi qai sega ni kunei kemuni, ena vakamatei au sara ga. Ia e dokai* Jiova na nomuni dauveiqaravi mai na gauna se gone kina. 13  Vakaevei, a tukuni vua na noqu turaga na ka au cakava ena gauna e vakamatei ira tiko kina na parofita i Jiova o Jesepeli, niu vunitaka vakaya50 e 100 na parofita i Jiova ena dua na qaravatu, au qai vakarautaka tiko ga vei ira na madrai kei na wai?+ 14  Ia oni kaya tiko, ‘Mo lako mo kaya vua na nomu turaga: “Sa tiko qo o Ilaija.”’ Ena vakamatei au sara ga o koya.” 15  E qai kaya o Ilaija: “Me vaka ni bula dina tiko o Jiova ni lewe vuqa* au qarava,* au na vakaraitaki au vua nikua.” 16  E lako sara o Opetaia me tavaki Eapi me tukutuku vua, mani lako o Eapi me tavaki Ilaija. 17  Ni raici Ilaija ga o Eapi, e tukuna vua: “O iko ga qo o kauta tiko mai na leqa levu e Isireli?” 18  E kaya sara o koya: “Au sega ni kauta mai na leqa e Isireli, o kemuni ga kei ira na vuvale i tamamuni ni oni biuta na ivakaro i Jiova, oni lai muri ira tiko na Peali.+ 19  Moni kacivi ira mada mai vei au na Isireli kece e Ulu i Kameli,+ kei ira na 450 na parofita nei Peali kei na 400 na parofita ni duru ni sokalou*+ era kana tiko ena teveli nei Jesepeli.” 20  E mani vakauitukutuku o Eapi vei ira kece na Isireli qai kumuni ira mai na parofita e Ulu i Kameli. 21  E torovi ira na tamata kece o Ilaija qai kaya: “Me vakacava na dede ni nomuni lomalomarua tiko?*+ Ke Kalou dina o Jiova moni muri koya,+ ia ke o Peali moni muri koya!” Ia era sega ni tukuna vua e dua na ka na tamata. 22  E kaya sara o Ilaija vei ira na tamata: “O yau ga na parofita i Jiova sa vo tiko,+ ia era le 450 na parofita i Peali. 23  Mera solia mada vei keda e rua na luvenibulumakau tagane, mera digia e dua na luvenibulumakau tagane, mera musumusuka ra qai biuta ena delanibuka, ia mera kua ni vakama. Au na vakarautaka na ikarua ni luvenibulumakau tagane, au na biuta ena delanibuka, au na sega ga ni vakama. 24  Moni qai masuta na yaca ni nomuni kalou,+ au na masuta na yaca i Jiova. Na Kalou ena sauma mai ena bukawaqa, e Kalou dina.”+ Era kaya kece na tamata: “E vinaka na ka o tukuna.” 25  E kaya sara o Ilaija vei ira na parofita nei Peali: “Moni digia e dua na luvenibulumakau tagane moni vakarautaka e liu ni oni lewe levu. Moni qai masuta na yaca ni nomuni kalou, ia moni kua ni vakama.” 26  Era mani kauta na luvenibulumakau tagane e solia vei ira, era vakarautaka sara, ra qai masuta tiko na yaca i Peali mai na mataka me yacova na sigalevu, era kaya: “Kemuni Peali, ni rogoci keimami mai!” Ia e sega ni rogo mai e dua na domo, e sega ni dua e sauma mai.+ Era kiso wavoki tiko ga ena icabocabonisoro era tara. 27  Ni sa sigalevu, e vakalialiai ira o Ilaija, e kaya: “Moni kaci vakadomoilevu! Ni kalou o koya!+ De vakasama tiko vakatitobu, se lai vakacegu.* De moce tu, me lai vakayadrati!” 28  Era kaci vakadomoilevu, era tavalaki ira ena iseleleka kei na moto me vaka na nodra ivalavala, me dave mai na nodra dra. 29  Ni oti na sigalevu nira se vakaivukivuki tiko ga,* ni sa kena gauna me cabori kina na isoro kakana ena yakavi, e sega ni dua na domo e rogo mai, se sauma mai, e sega ni dua e kauai mai.+ 30  Sa dede toka e tukuna o Ilaija vei ira kece na tamata: “Ni toro mai.” Era torovi koya yani na tamata kece. E qai vakavinakataka o koya na icabocabonisoro i Jiova sa rusa tu.+ 31  E kauta sara o Ilaija e 12 na vatu me vaka na iwiliwili ni nodratou yavusa na luvei Jekope e kaya vua o Jiova, e kaya: “Ena yacamu o Isireli.”+ 32  Sa qai tara o koya na icabocabonisoro ena vatu+ ena yaca i Jiova. E qai kelia e dua na ikeli me wavokita na icabocabonisoro, e vanua levu toka, e rawa ni tei kina e rua na sia* na ivakarau sorenikau. 33  Oti qori e tuvana vinaka na buka, e musumusuka na luvenibulumakau tagane qai biuta e delanibuka.+ E kaya sara: “Ni tawana e va na saqa lelevu ena wai, ni sova ena dela ni isoro kama kei na delanibuka.” 34  E qai kaya: “Ni cakava tale.” Era mani cakava tale. Ia e kaya tale: “Ni cakava vakatolu.” Era cakava vakatolu. 35  E drodrova wavokita na icabocabonisoro na wai, e tawana tale ga o koya na ikeli ena wai. 36  Ni sa kena gauna me cabori kina na isoro kakana ena yakavi,+ e toro yani o Ilaija na parofita, e kaya: “Kemuni Jiova na Kalou i Eparama,+ Aisake+ kei Isireli, me kilai mada nikua ni oni Kalou e Isireli, niu nomuni dauveiqaravi, ni nomuni vosa ga au cakava kina na ka kece qo.+ 37  Moni rogoci au kemuni Jiova! Moni rogoci au, mera kila na tamata qo ni o kemuni ga Jiova na Kalou dina, o kemuni ga oni saumaka na lomadra vei kemuni.”+ 38  E qai lutu sobu mai na bukawaqa i Jiova me kania na isoro kama,+ na buka, na vatu kei na kuvuniqele, e dramica tale ga na wai ena ikeli.+ 39  Nira raica kece qori na tamata, era tekicuva sara, ra qai kaya: “O Jiova ga na Kalou dina! O Jiova ga na Kalou dina!” 40  E kaya vei ira o Ilaija: “Ni vesuki ira na parofita nei Peali! Me kua ni dua e dro!” Era mani vesuki ira, e kauti ira sobu o Ilaija ina uciwai lailai* o Kisoni+ me vakamatei ira e kea.+ 41  E kaya sara o Ilaija vei Eapi: “Mo lako cake, mo kana mo gunu, ni sa kere mai na uca bi.”+ 42  E mani lako cake o Eapi me kana me gunu, ia o Ilaija e lako cake e ulu i Kameli, e roso ina qele qai vakacuva na matana ena maliwa ni duruna.+ 43  E kaya sara vua na nona dauveiqaravi: “Yalovinaka, mo lako cake mo rai yani i wasawasa.” E mani lako cake o koya, e rai yani qai kaya: “Au sega ni raica e dua na ka.” E kaya vakavitu o Ilaija, “Mo lesu tale.” 44  Ena ikavitu ni gauna, e kaya na nona dauveiqaravi: “Raica! E lako cake tiko mai wasawasa e dua na o lailai e vaka na liga ni tamata.” E kaya sara o Ilaija: “Mo lako, tukuna vei Eapi, ‘Moni vakarautaka na qiqi! Moni lako sobu de tarovi kemuni na bisa ni uca!’” 45  Sa vakaturubuto mai na lomalagi ena o, e liwa na cagi, sa bisa tale ga na uca,+ e vodo tiko ga o Eapi me gole i Jesirieli.+ 46  Ia e tiko vei Ilaija na liga i Jiova, e mani vesuka vinaka na nona isulu e tolona, qai cici sara i liu vei Eapi me yaco i Jesirieli.

iVakamacala e ra

Ipe., “rerevaki.”
Se “waimaca.”
Ipe., “rerevaki.”
Qo na mataivalu vakalomalagi.
Ipe., “au duri e matana.”
Se “kiso tiko ena rua na ititoko kiriwani.”
Se rawa ni, “lako tu ena dua na ilakolako.”
Se “ni vaka tiko ga na parofita na nodra ivalavala.”
Dua na sia e tautauvata kei na 7.33 na lita. Raica na iKuri B14.
Se “waimaca.”