iMatai ni Tui 17:1-24
17 E tukuna vei Eapi o Ilaija*+ na turaga ni Tisipa mai Kiliati:+ “Me vaka ni bula dina tiko o Jiova na Kalou ni Isireli au qarava,* ena sega na tegu se na uca ena veiyabaki qo, vakavo ga keu tukuna!”+
2 E qai vosa vua o Jiova, e kaya:
3 “Mo biubiu eke mo gole ina tokalau mo lai vunitaki iko toka ena Buca o Kirici,* ena tokalau ni Joritani.
4 Mo gunu ena uciwai lailai, au na vakaroti ira na reveni mera kauta yani na kemu e kea.”+
5 E lako sara me vakayacora na vosa i Jiova, e lai vakaitikotiko volekata na Buca o Kirici,* ena tokalau ni Joritani.
6 Era kauta yani vua na reveni na madrai kei na lewe ni manumanu ena mataka, na madrai kei na lewe ni manumanu ena yakavi, qai gunu ena uciwai lailai.+
7 Ia ni oti e vica na siga sa maca na uciwai lailai,+ ni sega ni tau na uca ena vanua.
8 E qai vosa vua o Jiova:
9 “Mo tucake, mo lako i Sarifaci ena vanua vakaSaitoni, mo tiko e kea. Raica! Au na vakarota e dua na yada e kea me solia vei iko na kemu.”+
10 E tucake sara me gole i Sarifaci. Ni yaco ena matamatanikoro, e cabuka tiko e kea e dua na yada. E mani kacivi koya, e kaya: “Yalovinaka, mo solia mada vakalailai vei au na wai ena bilo meu gunu.”+
11 Ni lako me lai kauta mai, e kaya vua: “Yalovinaka, mo kauta mai e ligamu e dua na tikinimadrai.”
12 E kaya sara o koya: “Me vaka ni bula dina tiko o Jiova na nomuni Kalou, e sega vei au na madrai, e vo tiko ga e dua na iluku falawa ena saqa levu, e vakalailai na waiwai ena saqa lailai.+ Au se kumuna tiko qo e vica na tikinibuka, au na lai vakarautaka e dua na ka me keirau kei luvequ tagane. Ni keirau kania oti, keirau na qai mate.”
13 E tukuna vua o Ilaija: “Kua ni rere. Mo lako i loma, mo cakava na ka o tukuna. Ia bulia mada vei au e dua na ibuli madrai lailai mokimokiti ena ka sa vo tu, mo kauta mai vei au. Oti mo cakava e dua na ka me kemudrau kei luvemu.
14 Qo na ka e tukuna o Jiova na Kalou ni Isireli: ‘Ena sega sara ni oti na falawa ena saqa levu, ena sega tale ga ni oti na waiwai ena saqa lailai me yacova na siga e vakatauca kina o Jiova na uca ena delaniqele.’”+
15 E lako sara o koya me cakava na ka e tukuna o Ilaija, e kana tiko o koya, o Ilaija kei ira na lewe ni nona vuvale me vica vata na siga.+
16 E sega sara ni oti na falawa ena saqa levu, e sega tale ga ni oti na waiwai ena saqa lailai me vaka na vosa i Jiova e tukuna e gusu i Ilaija.
17 Oti na ka kece qo, e qai tauvimate na luvena na marama e itaukeinivale, e tauvimate bibi mani cavuka na nona icegu.+
18 E kaya na marama vei Ilaija: “Na cava oni cudruvi au kina, kemuni na tamata ni Kalou dina? Oni gole mai moni tukuna tale vei au na noqu cala, moni vakamatea na luvequ?”+
19 Ia e kaya vua o Ilaija: “Solia mai vei au na luvemu.” E taura mai e ligana qai kauta cake ina rumu ena tabavale e cake e vakaicili tiko kina, e vakadavori koya sara ena nona idavodavo.+
20 E masuti Jiova: “Kemuni Jiova na noqu Kalou,+ oni vakararawataka tale ga na yada qo au vakaicili tiko kina ni oni vakamatea na luvena?”
21 E mani davoca vakatolu na gone qai masuti Jiova: “Kemuni Jiova na noqu Kalou, yalovinaka, moni vakabula tale na gone qo.”
22 E rogoca o Jiova na kerekere nei Ilaija,+ mani suka vua na gone na nona icegu, e bula tale.+
23 E kauta sobu na gone o Ilaija mai na rumu ena tabavale e cake ina lomanivale me solia vei tinana, e kaya o Ilaija: “Raica, sa bula na luvemu.”+
24 E kaya sara na marama vei Ilaija: “Au sa qai kila qo ni oni tamata ni Kalou,+ e dina tale ga na vosa i Jiova oni tukuna.”
iVakamacala e ra
^ Kena ibalebale “Noqu Kalou o Jiova.”
^ Ipe., “au duri e matana.”
^ Se “Waimaca o Kirici.”
^ Se “Waimaca o Kirici.”
