iMatai ni Tui 14:1-31
14 Ena gauna oya e tauvimate o Apaija na luvei Jerepoami.
2 E kaya sara vei watina o Jerepoami: “Yalovinaka mo tucake, mo vakalecaleca mera kua ni kila ni o wati Jerepoami, mo lako i Sailo. Raica! E tiko e kea o Eaija na parofita. A tukuna vei au o koya niu na nodra tui na tamata qo.+
3 Mo kauta e tini na ibuli madrai, na keke, kei na tavaya denioni mo lako sara vua. Ena qai tukuna vei iko na ka ena yacova na gonetagane.”
4 E mani cakava qori na wati Jerepoami. E cavutu me lako i Sailo,+ e yaco sara ena vale i Eaija. Ia e raisara o Eaija, e sega ni rai rawa ni sa qase.
5 Sa kaya oti vei Eaija o Jiova: “Ena lako tiko yani na wati Jerepoami me tarogi iko me baleta na luvena tagane e tauvimate tiko. Au na tukuna vei iko na ka mo kaya vua. Ni yaco yani ena vakalecaleca tu.”
6 Ni rogoca ga o Eaija na rorogo ni yavana ni curu mai ena katuba, e kaya sara: “Curu mai wati Jerepoami. Na cava o vakalecaleca kina? Au lesi meu tukuna vei iko e dua na itukutuku rarawataki.
7 Mo lako, mo kaya vei Jerepoami, ‘Qo na ka e tukuna o Jiova na Kalou ni Isireli: “Au vakaturi iko ena kedra maliwa na nomu tamata meu lesi iko mo liutaki ira na noqu tamata na Isireli.+
8 Au qai kaliraka tani na matanitu mai na vuvale i Tevita meu solia vei iko.+ Ia o sega ni vakataki Tevita na noqu dauveiqaravi ni talairawarawa ena noqu ivakaro, e muri au ena lomana taucoko ni vakayacora ga na ka e donu e mataqu.+
9 Ia o iko e ca sara na nomu ivalavala vei ira kece na liu vei iko, ni o bulia e dua tale na nomu kalou kei na matakau kaukamea mo vakacudrui au+ kina, o sa vakanadakui au.+
10 Oya na vuna au na kauta mai kina na ca ena vuvale i Jerepoami, au na muduka vei Jerepoami na tagane kece,* wili kina o ira na vakaloloma kei ira na malumalumu e Isireli, au na taviraka tani na vuvale i Jerepoami+ me vaka ga na nona taviraka e dua na denimanumanu me oti sara.
11 O koya e nei Jerepoami e mate ena koro ena kani koya na koli, o koya e mate e veikau ena kani koya na manumanuvuka ni lomalagi ni tukuna o Jiova.”’
12 “Mo tucake, mo lako i nomu vale. Ni o butuka ga na koro ena mate na gone.
13 Era na tagicaki koya na Isireli kece, era na buluti koya, ni o koya duadua ga ena vuvale i Jerepoami ena bulu ena ibulubulu, ni o koya duadua ga ena vuvale i Jerepoami e raica vua o Jiova na Kalou ni Isireli na ka vinaka.
14 Ena vakatura o Jiova e dua na tui Isireli ena muduka na vuvale i Jerepoami+ me tekivu ena siga oya, io, ena gauna qo.
15 Ena mokuti Isireli o Jiova me vaka na kuta e veisuayaki e loma ni wai, ena cavuivuvutaki Isireli mai na qele vinaka qo a solia vei ira na tukadra,+ ena vakasavi ira ina tai ni Uciwai*+ nira cakava na nodra duru ni sokalou*+ mera vakacudrui Jiova kina.
16 Ena biuti Isireli o koya ena vuku ni ivalavala ca e cakava o Jerepoami qai vakavuna mera valavala ca na Isireli.”+
17 E tucake o wati Jerepoami me lako yani, e yaco sara i Tirisa. Ni kalawaca ga na ilago ni vale, sa mate na gonetagane.
18 Era mani buluti koya, era tagicaki koya na Isireli kece me vaka ga na vosa i Jiova a tukuna na nona dauveiqaravi o Eaija na parofita.
19 Na vo ni itukutuku me baleti Jerepoami, na nona vala+ kei na nona veiliutaki, e volai ena ivola ni itukutuku ni nodra gauna na tui Isireli.
20 E 22 na yabaki na dede ni nona veiliutaki o Jerepoami, oti e qai davo vata kei ira na tukana,+ e veiliutaki sara o Netapi na luvena tagane me sosomitaki koya.+
21 Ia e tui Juta o Riopoami na luvei Solomoni. E tui o Riopoami ni sa yabaki 41, e 17 na yabaki e veiliutaki tiko kina e Jerusalemi, na koro e digia+ o Jiova vei ira na yavusa kece e Isireli me tiko kina na yacana.+ Na yaca i tinai Riopoami o Neama, na marama ni Amoni.+
22 E cakava tiko o Juta na ka ca ena mata i Jiova,+ era qai vakacudrui koya vakalevu ena ivalavala ca era cakava ni vakatauvatani kei na ka era cakava na tukadra.+
23 Era tara tiko ga na nodra vanua cecere, na vatu ni sokalou kei na duru ni sokalou*+ ena delana cecere kece+ kei na ruku ni kau bulabula kece.+
24 Era tiko tale ga ena vanua na tagane saqamua ni valenisoro.+ Era vakayacora na ka vakasevaki kece era kilai kina na veimatanitu a cemuria o Jiova e matadra na Isireli.
25 Ena ikalima ni yabaki ni veiliutaki i Tui Riopoami, e lako cake mai o Tui Sisaki+ e Ijipita me valuti Jerusalemi.+
26 E kauta na iyau ni vale i Jiova kei na iyau ena nona vale na tui.+ E kauta na ka kece, wili kina na isasabai koula kece a cakava o Solomoni.+
27 E mani cakava o Tui Riopoami na isasabai kopa me kedra isosomi qai tataunaka vei ira na iliuliu ni yadra,* era yadrava tiko na matamata ni nona vale na tui.
28 Ena gauna e dau lako yani kina na tui ena vale i Jiova, era na kauta yani na yadra, oti era na kauta lesu ina nodra vale na yadra.
29 Na vo ni itukutuku me baleti Riopoami kei na ka kece a cakava, e volai ena ivola ni itukutuku ni nodra gauna na tui Juta.+
30 Erau dau veivaluvaluti o Riopoami kei Jerepoami.+
31 E qai davo vata kei ira na tukana o Riopoami, e bulu vata kei ira na tukana ena Koro i Tevita.+ Na yaca i tinana o Neama na marama ni Amoni.+ E veiliutaki sara o Epaijami*+ na luvena tagane me sosomitaki koya.
iVakamacala e ra
^ Ipe., “dua e suasua e lalaga.” Na ivosavosa vakaIperiu ni veibeci me baleti ira na tagane.
^ Raica na iVakamacala ni Vosa.
^ Qo na Uferetisi.
^ Raica na iVakamacala ni Vosa.
^ Ipe., “daucici.”
^ Kacivi tale ga ena Apaija.
