iMatai ni Tui 12:1-33
12 E lako i Sikemi o Riopoami, era lako kece na Isireli i Sikemi+ mera buli koya me tui.+
2 Ni rogoca ga qori o Jerepoami na luvei Nipati (se tiko ga e Ijipita ni a drovaki Tui Solomoni qai tiko mai Ijipita),+
3 era talatala me kacivi mai. Oti qori e lako yani o Jerepoami kei na ivavakoso taucoko ni Isireli ra qai kaya vei Riopoami:
4 “E vakadredretaka o tamamuni na neimami icolacola.+ Ia ke oni vakarawarawataka na itavi dredre i tamamuni, moni vakamamadataka na icolacola bibi e vakataqara vei keimami, keimami na qai qaravi kemuni.”
5 E tukuna sara vei ira: “Moni lako mada me tolu na siga, oti moni qai lesu mai vei au.” Era mani lako na lewenivanua.+
6 E taro ivakasala sara o Tui Riopoami vei ira na qase era dau vakasalataki Solomoni na tamana ena gauna se bula kina, e kaya: “Na ivakasala cava oni nanuma me tukuni vei ira qo?”
7 Era kaya vua: “Ke o via qaravi ira na tamata qo nikua, mo vakadonuya na ka era kerea, mo vosa vakayalovinaka vei ira, era na nomu dauveiqaravi tiko ga.”
8 Ia e sega ni muria o koya na nodra ivakasala na qase era tukuna vua, e taro ivakasala ga vei ira na cauravou era susu vata, era qaravi koya tiko.+
9 E tarogi ira: “Na ivakasala cava oni nanuma me tukuni vei ira na tamata qo era kaya vei au: ‘Moni vakamamadataka na icolacola e vakataqara vei keimami o tamamuni’?”
10 Era tukuna vua na cauravou era susu vata kei koya: “Qo na ka mo kaya vei ira na tamata era tukuna vei iko, ‘E vakabibitaka o tamamuni na neimami icolacola, ia o kemuni moni vakamamadataka vei keimami.’ Qo na ka mo tukuna vei ira, ‘Na iqaqaloniligaqu lailai ena vavaku, e mamare na dibi tamaqu.
11 E vakataqara vei kemuni o tamaqu na icolacola bibi, ia au na kuria na nomuni icolacola. E kuitataki kemuni o tamaqu ena dali, ia au na kuitataki kemuni ena kuita e buki.’”
12 E lako o Jerepoami kei ira kece na tamata vei Riopoami ena ikatolu ni siga me vaka e tukuna na tui: “Moni lesu mai vei au ena ikatolu ni siga.”+
13 Ia e vosa vakaukaua na tui vei ira na lewenivanua, e sega ni muria na ivakasala era tukuna vua na qase.
14 E vosa vei ira me vaka na nodra ivakasala na cauravou, e kaya: “E vakabibitaka o tamaqu na nomuni icolacola, ia au na kuria na nomuni icolacola. E kuitataki kemuni o tamaqu ena dali, ia au na kuitataki kemuni ena kuita e buki.”
15 E mani sega ni vakarorogo na tui vei ira na tamata ni vakavuna o Jiova+ na veisau qo, me vakayacori kina na ka e tukuna o Jiova vei Jerepoami na luvei Nipati ena gusu i Eaija+ na turaga ni Sailo.
16 Nira raica kece na Isireli ni sega ni rogoci ira na tui, era kaya vua na tui: “Na cava na neimami ivotavota vei Tevita? E sega na neimami ivotavota vua na luvei Jese. Moni lesu vei ira na nomuni kalou, kemuni na Isireli. Mo lewa ga na nomu vale, Tevita!” Era lesu sara na Isireli ina nodra vale.*+
17 Ia e liutaki ira tiko ga na Isireli era vakaitikotiko ena koro e Juta+ o Riopoami.
18 E qai talai Etorami+ o Tui Riopoami, o koya e liutaki ira tiko na vakaroti mera cakacaka, ia era vakaviriki koya ena vatu na Isireli taucoko me mate. E vodo rawa ena nona qiqi o Tui Riopoami me dro i Jerusalemi.+
19 Era vorata na Isireli+ na vuvale i Tevita me yacova mai na siga qo.
20 Nira rogoca ga na Isireli kece ni sa lesu mai o Jerepoami, era kacivi koya ina isoqosoqo, ra qai buli koya me tui Isireli taucoko.+ E sega ni dua e muria na vuvale i Tevita, na yavusa ga i Juta.+
21 Ni yaco i Jerusalemi o Riopoami, e soqoni ira sara na vuvale kece i Juta kei na yavusa o Penijamini, e 180,000 na tamataivalu vakavulici,* mera valuta na vuvale i Isireli mera vakasuka na veiliutaki vei Riopoami na luvei Solomoni.+
22 E qai vosa na Kalou dina vei Semaia+ na tamata ni Kalou dina, e kaya:
23 “Mo tukuna vei Riopoami na luvei Solomoni na tui Juta, vei ira kece na vuvale i Juta kei Penijamini, kei ira na vo ni lewenivanua,
24 ‘Qo na ka e tukuna o Jiova: “Moni kua sara ni lako cake moni valuti ira na tacimuni na Isireli. Moni dui lesu ina nomuni vale, niu vakavuna me yaco na ka qo.”’”+ Era mani muria na vosa i Jiova, ra qai lesu ina nodra vale me vaka e tukuna vei ira o Jiova.
25 E qai tarai* Sikemi+ o Jerepoami ena veiulunivanua e Ifireimi me tiko kina. Oti e biuta mai na vanua oya me tarai* Penueli.+
26 E tukuna e lomana o Jerepoami: “Sa na vakasukai na matanitu ina vuvale i Tevita.+
27 Ke ra lai vakacaboisoro tiko ga na tamata qo ina vale i Jiova i Jerusalemi,+ ena lesu ga na lomadra na tamata qo vua na nodra turaga o Tui Riopoami e Juta. Io era na vakamatei au ra qai lesu vei Tui Riopoami e Juta.”
28 Ni taro ivakasala oti na tui, e bulia sara e rua na luvenibulumakau koula,+ e kaya vei ira na tamata: “Sa rui dredre moni lako cake i Jerusalemi. Kemuni na Isireli, qo ga na nomuni Kalou a kauti kemuni cake mai na vanua o Ijipita.”+
29 E biuta sara e dua e Peceli,+ e biuta e dua tale e Tani.+
30 Na ka qo e vakavuna mera valavala ca,+ era lako na tamata mera qarava na kena e tiko sara mai Tani.
31 E tara o koya eso na vale ni sokalou ena vanua cecere qai lesi ira na bete mai vei ira na lewenivanua, era sega ni Livai.+
32 E tauyavutaka tale ga o Jerepoami e dua na soqo ena ikawalu ni vula ena ika15 ni siga ni vula me vaka ga na soqo e Juta.+ E vakacaboisoro ena icabocabonisoro e cakava e Peceli+ vei rau na luvenibulumakau e bulia, e lesi ira na bete ni vanua cecere a tara e Peceli.
33 E vakacaboisoro sara ena icabocabonisoro a cakava e Peceli ena ika15 ni siga ena ikawalu ni vula, ena vula ga e digia o koya. E mani tauyavutaka o koya e dua na soqo vei ira na Isireli, e lako cake ina icabocabonisoro me cabora na isoro kei na isoro kubou.
