iMatai ni Samuela 30:1-31
30 Ni yaco o Tevita kei ira na nona tamata i Sikilaki+ ena ikatolu ni siga, era ravuravu na Amalekaiti+ ena ceva,* vaka kina e Sikilaki, era ravuti Sikilaki era vakama ena bukawaqa.
2 Era kauti ira vakavesu na yalewa+ kei ira kece na tiko kina, o ira na gone kei ira na qase. Era sega ni vakamatea e dua, ia era kauti ira ga ra qai lako yani ena nodra ilakolako.
3 Ni yaco yani o Tevita kei ira na nona tamata ina koro, era raica ni sa vakamai tu ra qai kau vakavesu na watidra, na luvedra tagane, kei na luvedra yalewa.
4 E mani tagi vakadomoilevu o Tevita kei ira na tamata era tomani koya, e oti sara ga na nodra igu ni tagi.
5 Erau kau tale ga vakavesu na wati Tevita, o Einoami na yalewa ni Jesirieli kei Apikali na yada nei Nepali na turaga ni Kameli.+
6 E rarawa vakalevu o Tevita nira tukuna na tamata mera vakaviriki koya ena vatu, era rarawataka kece na tamata ni sa yali na luvedra tagane kei na luvedra yalewa. Ia e vakaukauataki koya ga o Tevita ena vuku i Jiova na nona Kalou.+
7 E kaya sara o Tevita vei Epaiaca+ na bete, na luvei Eimeleki: “Yalovinaka, kauta mai ke na efoti.”+ E mani kauta yani na efoti o Epaiaca vei Tevita.
8 E tarogi Jiova o Tevita:+ “Meu cicimuria na ilala daukabakoro qo? Au na toboki ira?” E kaya vua o koya: “Mo cicimuri ira, o na toboki ira sara ga, o na veivakabulai.”+
9 E lako sara o Tevita kei na 600 na tamata+ era tomani koya, era lako tiko me yaco sara ena Waimaca* o Pisori, na vanua era wawa tiko kina eso.
10 E cicimuri ira tiko ga o Tevita kei na 400 na tagane, ia era wawa tiko mai e 200 na tamata nira wawale vakalevu, era sega ni takosova rawa na Waimaca o Pisori.+
11 Era raica e dua na kai Ijipita ena tikinivanua oya, era kauti koya sara vei Tevita. Era solia vua na kakana me kania kei na wai me gunuva,
12 vaka kina e dua na tiki ni lolo rabaraba kei na rua na ibuli vuanivaini rabaraba. Ni kania oti e kaukaua* tale, ni a sega tu ni kana se gunu wai me tolu na siga, tolu na bogi.
13 Ia e tarogi koya o Tevita: “O cei na nomu turaga, o gole mai vei?” E kaya o koya: “O yau na kai Ijipita, au dauveiqaravi, au nona bobula e dua na turaga ni Amaleki, ia sa biuti au na noqu turaga niu a tauvimate tu ena tolu na siga sa oti.
14 Keimami ravuta na ceva vei ira na kai Kireci+ kei na nodra vanua na Juta, kei na ceva vei ira na Kelepi,+ keimami qai vakamai Sikilaki ena bukawaqa.”
15 E kaya vua o Tevita: “O na kauti au sobu vei ira na ilala daukabakoro qo?” E kaya o koya: “Ke o bubului vei au ena yaca ni Kalou ni o na sega ni vakamatei au, se soli au e liga i noqu turaga, au na kauti iko sobu vei ira na ilala daukabakoro qo.”
16 E qai kauti koya sobu yani o koya ena vanua era robota tu, era kana, era gunu tiko, era marautaka tiko na itokinivalu levu era kauta mai na nodra vanua na kai Filisitia kei na vanua o Juta.
17 E mani mokuti ira o Tevita ni voleka ni kida na mataka me yacova na yakavi ena siga tarava, e sega ni dua e dro bula,+ o ira ga na 400 na tamata era dro ena kameli.
18 E kauta lesu o Tevita na ka kece era kauta na Amalekaiti+ qai vakabulai rau na watina.
19 E sega ni yali vei ira e dua na ka, mai na ka lailai ina ka levu. Era kauta na luvedra tagane, na luvedra yalewa, kei na itokinivalu,+ e kauta lesu o Tevita na ka kece era taura.
20 E mani kauta kece o Tevita na qelenisipi kei na qelenibulumakau e liutaka na nodra qelenimanumanu. Era kaya: “Qo na itokinivalu nei Tevita.”
21 E yaco sara o Tevita vei ira na 200 na tamata era sega ni tomani Tevita nira wawale vakalevu ia era wawa tiko ena Waimaca o Pisori,+ era lako mera tavaki Tevita kei ira na tamata era tomani koya yani. Ni volekati ira o Tevita, e tarogi ira se ra vakacava tiko.
22 Ia era kaya kece na tamata ca kei ira na sega na betedra era lako vata kei Tevita: “Nira sega ni lako vata kei keda, meda kua ni solia vei ira e dua na itokinivalu eda kauta mai, mera dui kauta ga na watidra kei na luvedra, mera lako yani.”
23 Ia e kaya o Tevita: “Kemuni na taciqu, moni kua ni cakava qo ena ka e solia vei keda o Jiova. E taqomaki keda o koya qai solia e ligada na ilala daukabakoro qo era mai valuti keda.+
24 O cei ena rogoci kemuni ena ka qo? Na ka ena wasei vua e lako sobu ina ivalu ena tautauvata ga kei na ka e wasei vua e tiko mai kei na iyaya.+ Eda na wase kece.”+
25 Me tekivu mai na siga oya e okata qori o koya me ivakaro kei na lawa e Isireli me yacova na siga qo.
26 Ni lesu i Sikilaki o Tevita e vakauta sara eso na itokinivalu vei ira na qase ni Juta era nona itokani, e kaya: “Qo na nomuni iloloma* mai na nodra itokinivalu na meca i Jiova.”
27 E vakauta vei ira era tiko e Peceli,+ vei ira mai Remoci ena Nikepi,* vei ira e Jatiri,+
28 vei ira mai Aroeri, vei ira mai Sifimoci, vei ira mai Esitimoa,+
29 vei ira e Rakali, vei ira na tiko ena nodra koro na kai Jiramieli,+ vei ira na tiko ena nodra koro na Kenaiti,+
30 vei ira e Orima,+ vei ira e Boriasani, vei ira e Ataki,
31 vei ira e Epironi,+ kei na vanua kece e dau lakova o Tevita kei ira na nona tamata.
iVakamacala e ra
^ Se “na Nikepi.”
^ Raica na iVakamacala ni Vosa.
^ Ipe., “vakilai koya tale.”
^ Ipe., “veivakalougatataki.”
^ Se “na ceva.”
