iMatai ni Samuela 19:1-24
19 Oti e vosa o Saula vei Jonacani na luvena kei ira kece na nona dauveiqaravi mera vakamatei Tevita.+
2 Ia ni taleitaki Tevita vakalevu o Jonacani na luvei Saula,+ mani kaya vei Tevita o Jonacani: “E via vakamatei iko o Saula na tamaqu. Yalovinaka, mo qaqarauni ena mataka, lako ena dua na vanua vuni mo vuni tiko ga kina.
3 Au na lako yani meu tu e yasai tamaqu ena vanua o na tiko kina. Au na talanoataki iko vei tamaqu, keu kila e dua na ka au na mai tukuna vei iko.”+
4 E tukuna na ka vinaka me baleti Tevita o Jonacani+ vei Saula na tamana. E kaya vua: “Me kua ni caka ca na tui vua na nona dauveiqaravi o Tevita, ni sega ni caka ca vei iko o koya, e yaga vei iko na ka e cakava.
5 E bolemate o koya me lai vakamatea na kai Filisitia+ qai vakavuna o Jiova na qaqa* levu vei ira kece na Isireli. O raica sara ga qori, o marautaka vakalevu. Na cava mo caka ca kina vua e dua e sega ni cala ni o vakamatei Tevita wale tu?”+
6 E rogoci Jonacani o Saula qai bubuluitaka o Saula: “Me vaka ni bula tiko o Jiova, ena sega ni vakamatei o koya.”
7 Oti e kacivi Tevita o Jonacani qai tukuna vua na ka kece qo. E kauti Tevita sara o Jonacani vei Saula, e qaravi koya tiko me vaka ga e liu.+
8 Sa dede toka e tubu tale na ivalu, e lako yani o Tevita me valuti ira na kai Filisitia qai vakamatei ira ena veivakamatei levu, era mani drovaki koya.
9 Ia e curumi Saula na yalo ca mai vei Jiova+ ni dabe tiko ena nona vale, e taura tiko e ligana na nona moto ni qiri api tiko o Tevita.+
10 E saga o Saula me cokai Tevita i lalaga ena moto, ia e leve o koya qai coba e lalaga na moto e cokataka o Saula. E dro bula o Tevita ena bogi oya.
11 Oti e tala o Saula eso na italai ina vale i Tevita mera yadrava mera qai vakamatei koya ena mataka,+ ia e tukuna vei Tevita o Maikali na watina: “Ke o sega ni dro ena bogi nikua, o na mate nimataka.”
12 Sega ni bera ni tukuci Tevita sobu o Maikali e katubaleka, me biubiu totolo me bula.
13 E taura mai o Maikali na matakau terafimi,* e vakadavora ena idavodavo, e biuta e uluna na isulu lawalawa ni vutinime qai ubia ena dua na isulu.
14 E tala o Saula eso na italai mera lai kauti Tevita mai, ia e kaya o Maikali: “E tauvimate o koya.”
15 E mani talai ira na nona italai o Saula mera lai raici Tevita, e kaya vei ira: “Moni kauti koya mai vei au ena nona idavodavo me vakamatei.”+
16 Nira curu yani na italai, sa davo tu ena idavodavo na matakau terafimi qai toka na isulu lawalawa ni vutinime ena vanua e rairai toka kina na uluna.
17 E kaya vei Maikali o Saula: “Na cava o lawakitaki au kina va qo, mo vakatala na kequ meca+ me dro?” E kaya vei Saula o Maikali: “E kaya vei au o koya, ‘Biuti au meu lako, ke sega au na vakamatei iko!’”
18 E dro bula sara o Tevita qai yaco yani vei Samuela i Rama.+ E tukuna vua na ka kece e cakava vua o Saula. E lako vata kei Samuela o koya, erau lai tiko e Naioci.+
19 Oti e tukuni vei Saula: “Raica! E tiko mai Naioci e Rama o Tevita.”
20 E talatala sara o Saula me vesu mai o Tevita. Nira raica nira parofisai tiko na parofita qase qai duri tu o Samuela me liutaki ira tiko, e sobuti ira na italai nei Saula na yalo ni Kalou e qai vaka na parofita na nodra ivalavala.
21 Nira lai tukuna qori vei Saula, sega ni bera ni tala tale eso na italai, e vaka tale ga na parofita na nodra ivalavala. E tala tale o Saula eso na italai, na ikatolu ni iwasewase, e qai vaka na parofita na nodra ivalavala.
22 Oti e lako tale ga i Rama o koya. Ni yaco yani ina ikeliniwai vakaitamera e tiko e Seku, e taroga: “I vei o Samuela kei Tevita?” Era kaya: “Erau tiko mai Naioci+ e Rama.”
23 Ni biubiu mai kea o Saula me lako i Naioci e Rama, e sobuti koya na yalo ni Kalou, e lako yani o koya qai vaka na parofita na nona ivalavala me yaco sara i Naioci e Rama.
24 E luvata tale ga na nona isulu, e vaka na parofita nona ivalavala e mata i Samuela qai davo luvawale* tu e kea ena siga kei na bogi taucoko oya. Qori na vuna era kaya kina: “Sa maliwai ira tale ga na parofita o Saula?”+
iVakamacala e ra
^ Se “veivakabulai.”
^ Se “kalou ni vuvale.”
^ Se “dara tiko na nona isulu e loma.”
