iMatai ni Samuela 15:1-35
15 E kaya vei Saula o Samuela: “E talai au mai o Jiova meu lumuti iko mo nodra tui na nona tamata na Isireli,+ ia mo rogoca na ka e kaya o Jiova.+
2 Qo na ka e tukuna o Jiova ni lewe vuqa:* ‘Au na cudruvi ira na Amalekaiti ena ka era cakava vei ira na Isireli, nira saqati ira e gaunisala nira lako cake mai Ijipita.+
3 Ia mo lako, mo lai mokuti ira na Amalekaiti+ mo vakarusai ira+ kei na ka kece e tu vei ira. Mo kua ni vakabulai* ira, mo vakamatei ira,+ na tagane kei na yalewa, na gone kei na gonedramidrami, na bulumakau kei na sipi, na kameli kei na asa.’”+
4 E kacivi ira na tamata o Saula qai wiliki ira e Tilaimi: Era le 200,000 na sotia era taubale, era le 10,000 na lewe i Juta.+
5 E lako o Saula me yaco sara ena koro o Amaleki me toka vuni ena buca.*
6 Ia e kaya o Saula vei ira na Kenaiti:+ “Moni lako, moni biuti ira na Amalekaiti meu kua ni taviraki kemuni vata kei ira.+ Ni dei na nomuni lomani ira kece na lewe i Isireli+ ena gauna era lako cake mai kina e Ijipita.” Era mani biuti ira na kai Amaleki o ira na Kenaiti.
7 Oti oya e mokuti ira na Amalekaiti+ o Saula mai Avila+ me yaco sara i Suri,+ e taravi Ijipita.
8 E vesuki Ekaki+ bulabula na tui Amaleki o koya qai vakamatei ira na vo ni tamata ena iseleiwau.+
9 Ia e vakabulai Ekaki o Saula kei ira na tamata, na qelenisipi vinaka duadua, na qelenibulumakau, na manumanu uro, na tamanisipi, kei na ka vinaka kece.+ Era sega ni via vakarusa qori. Ia na ka kece e sega ni yaga qai sega ni taleitaki era vakarusa.
10 E qai vosa vei Samuela o Jiova:
11 “Au rarawataka noqu lesi Saula me tui ni gole tani me sega ni muri au, qai sega ni vakayacora noqu vosa.”+ E vakararawataki Samuela na ka qo, e tagi tiko ga vei Jiova ena bogi taucoko.+
12 Ni sou vakamataka o Samuela me lai tavaki Saula, e tukuni vei Samuela: “E lako i Kameli o Saula,+ e vakaduria e kea e dua na kena ivakananumi.+ E qai vuki me lako sobu i Kilikali.”
13 Ni yaco yani vei Saula o Samuela, e tukuna vua o Saula: “Me vakalougatataki iko mada ga o Jiova. Au sa vakayacora na vosa i Jiova.”
14 Ia e kaya o Samuela: “Na cava ga au rogoca+ tiko kina na domo ni sipi kei na domo ni bulumakau?”
15 E kaya sara o Saula: “E kau mai vei ira na Amalekaiti, nira vakabula na tamata na qelenisipi vinaka duadua kei na qelenibulumakau mera cabora vei Jiova na nomu Kalou, ia keimami vakarusa na ka e vo.”
16 E kaya vei Saula o Samuela: “Sa rauta! Au na tukuna vei iko na ka e kaya vei au o Jiova ena bogi.”+ E kaya vua: “Tukuna mai!”
17 E kaya tale o Samuela: “Ni o lailai ga e matamu,+ vakaevei o sega ni lesi mo nodra turaga na yavusa e Isireli qai lumuti iko o Jiova mo nodra tui na Isireli?+
18 Oti e talai iko o Jiova ena dua na ilesilesi, e kaya, ‘Mo lako, mo vakarusai ira na tamata ca, o ira na Amalekaiti.+ Mo valuti ira mo vakawabokotaki ira.’+
19 Na cava o sega ni muria kina na vosa i Jiova? Ia o ciciva ga vakatotolo na itokinivalu+ mo cakava na ka ca ena mata i Jiova!”
20 E kaya vei Samuela o Saula: “Au talairawarawa ina vosa i Jiova! Au lako ena ilesilesi e talai au kina o Jiova au mani kauti Ekaki mai na tui Amaleki, au qai vakarusai ira na Amalekaiti.+
21 Ia era kauta na tamata na itokinivalu, oya na sipi kei na bulumakau, na ka vinaka duadua e dodonu me vakarusai, mera cabora vei Jiova na nomu Kalou e Kilikali.”+
22 E qai kaya o Samuela: “Vakacava, e taleitaka vakalevu o Jiova na isoro kama kei na vakacaboisoro+ me vaka na nona taleitaka na talairawarawa ina vosa i Jiova? Raica! E vinaka na talairawarawa mai na vakacaboisoro,+ na vakarorogo mai na uro+ ni tamanisipi,
23 ni tautauvata na talaidredre+ kei na ca ni cakaisausau,+ na usuraka na ka ena dokadoka e tautauvata kei na vakayagataki ni kaukaua vuni kei na qaravi matakau.* Ni o beca na vosa i Jiova,+ e beci iko tale ga o koya mo kua ni tui.”+
24 E qai kaya vei Samuela o Saula: “Au sa valavala ca niu butusevata na ivakaro i Jiova kei na nomu vosa, niu a rerevaki ira na tamata au mani rogoca na nodra vosa.
25 Yalovinaka, mo vosota mada na noqu ivalavala ca, me daru lesu vata meu cuva sobu vei Jiova.”+
26 Ia e kaya vei Saula o Samuela: “Daru na sega ni lesu vata ni o beca na vosa i Jiova, e beci iko tale ga o Jiova mo kua ni nodra tui tiko ga na Isireli.”+
27 Ni vuki o Samuela me lako, e dreta o Saula na bele ni nona isulu balavu tabaleka mani kadresu.
28 E kaya sara vua o Samuela: “Sa kauta tani vei iko nikua o Jiova na veiliutaki vakatui e Isireli, ena solia vua e dua drau kaivata e vinaka sara vei iko.+
29 Ena sega tale ga ni lasu+ na Kalou Cecere ni Isireli,+ se veisautaka nona vakasama ni sega ni tamata o koya me dau veisautaka nona vakasama.”+
30 E kaya o Saula: “Au sa valavala ca. Ia mo rokovi au mada e matadra na nodra qase na noqu tamata kei na matadra na Isireli. Me daru lesu vata, au na cuva sobu vei Jiova na nomu Kalou.”+
31 E lesu o Samuela me muri Saula, e cuva sobu vei Jiova o Saula.
32 Oti e kaya o Samuela: “Kauti Ekaki na tui Amaleki voleka mai vei au.” E lako vakavoraki* yani vua o Ekaki, e kaya lo tiko: ‘Sa sega tale ni leqataki* na mate.’
33 Ia e kaya o Samuela: “Me vaka ga nira rarawataka na yalewa ni kauta tani na luvedra na nomu iseleiwau, ena rarawa sara vakalevu o tinamu vei ira na yalewa e sega na luvedra.” E qai talaki Ekaki vakamatailalai o Samuela e mata i Jiova e Kilikali.+
34 E lako sara o Samuela i Rama, e lako cake o Saula ina nona vale i Kipea nei Saula.
35 E sega ni raici Saula tale o Samuela me yacova na siga e mate kina, ni lolositaki Saula o Samuela.+ E rarawataka o Jiova ni lesi Saula me nodra tui na Isireli.+
iVakamacala e ra
^ Qo na mataivalu vakalomalagi.
^ Se “lomani.”
^ Se “waimaca.”
^ Ipe., “na matakau terafimi,” oya na kalou ni vuvale.
^ Se rawa ni, “nuidei.”
^ Ipe., “rarawataki.”
