iMatai ni Samuela 11:1-15
11 E lako cake o Neasi na Amoni+ ina keba me valuti Jepesi+ e Kiliati. Era kaya kece na lewe i Jepesi vei Neasi: “Moni veiyalayalati kei keimami, keimami na qaravi kemuni.”
2 E kaya vei ira o Neasi na Amoni: “Au na veiyalayalati kei kemuni ena ka qo: me leu tani kece na yalokanimatamuni imatau. Au na cakava qo me madua kina o Isireli taucoko.”
3 Era kaya sara vua na qase ni Jepesi: “Solia vei keimami e vitu na siga me keimami talai ira na italai ena vanua kece e Isireli. Ke sega ni dua me vakabulai keimami, keimami na qai soro vei iko.”
4 Oti era yaco yani na italai i Kipea+ nei Saula, era tukuna sara na vosa qo nira vakarorogo tu na tamata ra qai tabaka kece na veitagicaki ena domolevu.
5 Ia e lesu mai na were o Saula ni muria tiko mai na qelenibulumakau, e kaya sara o Saula: “Na cava e manati ira na tamata? Na cava era tagicaka?” Era mani tukuna vua na nodra vosa na lewe i Jepesi.
6 E vakaukauataki Saula na yalo ni Kalou+ ni rogoca na vosa qori qai waqa mai na nona cudru.
7 E taura sara e rua na bulumakau tagane qai musumusuka, e vakauta ina vanua kece e Isireli ena ligadra na italai, e kaya: “O koya e sega ni muri Saula kei Samuela, me namaka ni na caka qo ina nona bulumakau!” Era rerevaki Jiova na tamata, era mani lako kece yani ena duavata.
8 E wiliki ira o koya e Peseki, era le 300,000 na Isireli, era le 30,000 na Juta.
9 Era qai kaya vei ira na italai era lako yani: “Qo na ka moni kaya vei ira na lewe i Jepesi e Kiliati, ‘Oni na vakabulai nimataka ni sa katakata na siga.’” Era mani lako na italai ra qai tukuna vei ira na lewe i Jepesi, era marau vakalevu.
10 Era kaya sara na lewe i Jepesi: “Nimataka keimami na soro vei kemuni, moni cakava vei keimami na ka kece e vinaka vei kemuni.”+
11 Ena siga tarava e wasei ira vakatolu na tamata o Saula, era lako sara ina lomadonu ni keba ena gauna ni yadra ena mataka* ra qai mokuti ira na Amoni+ me yacova ni katakata na siga. Era veiseyaki na bula tiko, e sega ni rua erau laurai vata.
12 Era tukuna vei Samuela na tamata: “O cei e kaya, ‘E noda tui o Saula?’+ Moni soli ira mai vei keimami me keimami vakamatei ira.”
13 Ia e kaya o Saula: “Me kua ni dua e vakamatei nikua,+ ni vakabulai Isireli nikua o Jiova.”
14 E qai kaya o Samuela vei ira na tamata: “Moni lako mai meda lako i Kilikali+ me vakataudeitaki na veiliutaki vakatui.”+
15 Era mani lako kece na tamata i Kilikali ra qai buli Saula me tui ena mata i Jiova e Kilikali. Era cabora sara e kea na isoro ni veiyaloni e mata i Jiova,+ e marau vakalevu o Saula kei ira kece na Isireli.+
iVakamacala e ra
^ Oya ena rauta na rua na kaloko me yacova na ono na kaloko ena mataka.
