iMatai ni iVola Vei Ira mai Korinia 9:1-27
9 Vakacava, au sega ni galala? Au sega ni yapositolo? Au sega ni raici Jisu na noda Turaga?+ Oni sega ni vua ni noqu cakacaka ena Turaga?
2 Keu sega mada ga ni nodra yapositolo eso tale, au nomuni yapositolo! Ni o kemuni na ivakadinadina niu yapositolo ni Turaga.
3 E va qo na ka au kaya vei ira na vakalewai au:
4 E tu vei keda na dodonu* meda kana, meda gunu tale ga, se vakaevei?
5 E tu tale ga vei keda na dodonu meda vakawatitaka e dua na yalewa vakabauta,*+ me vakataki ira ga na vo ni yapositolo, kei ratou na tacina na noda Turaga,+ kei Kifa,*+ se vakaevei?
6 Se o keirau ga kei Panapasa+ e sega ni vakatarai me keirau cegu mai na cakacaka keirau qaravi keirau tiko kina?
7 O cei e veiqaravi vakasotia me qai qarava vakataki koya na ka me bula kina? O cei e tea e dua na loganivaini me qai sega ni kania na vuana?+ Se o cei e vakatawa na qelenisipi me qai sega ni vakayagataka na kena sucu?
8 Vakacava, e vakatamata na veika au tukuna tiko? E sega ni tukuna tale ga na Lawa na ka qo?
9 Ni volai ena Lawa e vola o Mosese: “Me kua ni tabonaki na gusu ni bulumakau ena gauna e butu covuata tiko kina.”+ E kauaitaka na bulumakau na Kalou?
10 Se tukuna qori ena vukuda? Ena vukuda ga e volai kina, ni o koya e siviyara e dodonu me vakanuinui tiko ni siviyara, o koya tale ga e samusamu me nuitaka ni na vakaivotavota kina.
11 Ke keitou a kaburaka na veika vakayalo vei kemuni, ena cala ke keitou tamusuka na veika vakayago oni vakarautaka?+
12 Ke oni solia na galala vei ira eso tale mera vakayagataka na ka kece qori, e levu cake na vuna e dodonu kina moni cakava tale ga vei keitou, se vakaevei? Ia keitou sega ni vakayagataka cala na dodonu* qo,+ keitou sa vosota na ka kece, me kua ni dua na ka keitou vakalatilati kina ena itukutuku vinaka me baleta na Karisito.+
13 Oni sega ni kila ni o ira na tagane era vakaitavi ena veiqaravi tabu era kana mai na valenisoro? Nira vakaivotavota tale ga kei na icabocabonisoro o ira na dau veiqaravi ena icabocabonisoro?+
14 Ena sala tale ga qo e vakarota kina na Turaga mera bula ena itukutuku vinaka o ira era kacivaka na itukutuku vinaka.+
15 Ia o yau, au se sega ni bau vakayagataka e dua vei ira na isolisoli qo.+ Noqu vola tale ga qo e sega ni kena inaki me vakayacori kina vei au. Ke vaka kina, e vinaka cake meu mate—sega ni dua e rawa ni vakacala na ka au sakitaka tiko qo!+
16 Keu tukuna tiko na itukutuku vinaka, e sega ni dua na yavu meu sakitaki au kina, e noqu itavi ga. Au sa na kalouca dina keu sega ni tukuna na itukutuku vinaka!+
17 Keu vakayacora ena yalo e vinakata au na vakaicovitaki kina, ia keu cakava ena voraki, au se vakayacora tiko ga na itavi e nuitaki vei au.+
18 Na cava me noqu icovi? Niu vunautaka na itukutuku vinaka, au cakava meu kua ni saumi kina, meu kua kina ni vakayagataka vakatani na noqu dodonu ena vunautaki ni itukutuku vinaka.
19 Niu sa galala e matadra na tamata kece, au okati au meu nodra bobula kece, meu rawai ira kina e levu.
20 Au okati au gona meu Jiu niu tiko vata kei ira na Jiu,+ meu rawai ira kina na Jiu, vei ira na vauci ena lawa, au okati au meu vaka e dua e vauci ena lawa, e dina niu sega ni vauci ena lawa, meu rawai ira kina era vauci ena lawa.+
21 Vei ira na sega ni vauci ena lawa, au okati au meu vaka e dua e sega ni vauci ena lawa, e dina niu vauci ena lawa ni Kalou kei na lawa i Karisito,+ meu rawai ira kina era sega ni vauci ena lawa.
22 Vei ira na malumalumu, au okati au meu malumalumu, meu rawai ira kina na malumalumu.+ Au sa ka kece ga vei ira na tamata kece ga meu bau vakabula kina eso.
23 Ia au cakava na ka kece ena vuku ni itukutuku vinaka, meu bau vakaivotavota ena kena tukuni yani.+
24 Oni sega ni kila ni levu era cici ena veitaucici, ia e dua ga e vakaicovi? Moni cici ena kena ivakarau moni rawata kina na icovi.+
25 O ira kece na vakaitavi ena dua na veisisivi, era na lewai ira vinaka sara ena ka kece. Ia era vakayacora qo me nodra kina na isala e ca rawarawa,+ ia o keda me noda na isala e sega ni ca rawarawa.+
26 O koya gona ena noqu ivakarau ni cici, au sega ni cici tu vakaveitalia,+ niu vacu tale ga au sega ni vacu meu vacuka wale tu na cagi,
27 ia au vakamalumalumutaka* na yagoqu,+ au qai vakabobulataka, baleta meu kua ni vunau tiko vei ira na so au qai sega tale ni vakadonui.
iVakamacala e ra
^ Kir., “lewa.”
^ Se “dua na ganeda me watida.”
^ E kilai tale ga me o Pita.
^ Kir., “lewa.”
^ Se “au totogitaka, au lewa vinaka.”
