Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 A1

Yavu ni Vakadewa iVolatabu

Na iVolatabu e volai taumada ena vosa makawa vakaIperiu, vakaArame, kei na vosa vaKirisi. Nikua e vakarautaki taucoko se vakatikina ena rauta ni 2,600 na vosa. Levu era wilika na iVolatabu era sega ni kila na vosa taumada e volai kina, era na qai kila nira wilika e dua na kena ivakadewa. Na yavu cava me muri ni vakadewataki na iVolatabu, e muri vakacava qo ena kena vakadewataki na Vakadewa ni Vuravura Vou?

Era kaya eso ni vakadewa vosa yadua ena rawarawa vua e wiliwili me kila vinaka na ibalebale ni ka e volai ena vosa taumada. Ia e sega ni dina ena levu na gauna. Qo eso na vuna:

  • Ena sega ni tautauvata na lawa ni rua na vosa, na iwiliwili ni vosa, kei na ituvatuva ni iyatuvosa. E vola e dua na parofesa ni vosa vakaIperiu, o S. R. Driver, ni “sega ni duidui wale ga na kena ituvatuva kei na kena yavu, e duidui tale ga . . . na ivakarau e buli kina na vakasama ena dua na iyatuvosa.” Ni duidui na vosa, e duidui tale ga na ivakarau ni vakasama. E tomana o Parofesa Driver, “E sega gona ni tautauvata na tuvai ni iyatuvosa ena dui vosa.”

  • E sega ni dua na vosa ena gauna qo me tautauvata vinaka sara kei na iwiliwili ni vosa kei na ituvatuva ni vosa vakaIperiu, vakaArame kei na vaKirisi e volai kina na iVolatabu. O koya gona, na vakadewa vosa yadua ni iVolatabu ena buawa, se na vakadewataka cala na kena ibalebale ena so na gauna.

  • Ena duidui na ibalebale ni vosa se matavosa ni laurai na ikotokoto e vakayagataki kina.

O koya e vakadewa e rawa ni vakadewataka na vosa yadua ni vosa taumada ena so na tikina, ia me qarauni sara qo.

Qo eso na ivakaraitaki ni kena tauri cala na vakasama ena vakadewa vosa yadua:

  • E volai ena iVolatabu na vosa “moce” kei na “sa qai moce” me  dusia ruarua na moce kei na moce ni sa mate. (Maciu 28:13; Cakacaka 7:60, ivakamacala e ra) Ni volai na matavosa va qo ena ikotokoto e dusia na mate, era vakayagataka na dauvakadewa iVolatabu na vosa me vaka na ‘moce ni mate,’ mera kua ni veilecayaki kina na dauwiliwili ena gauna qo.​—1 Korinica 7:39; 1 Cesalonaika 4:13; 2 Pita 3:4.

  • E cavuta na yapositolo o Paula e dua na matavosa ena Efeso 4:14 e rawa ni vakadewataki ga vakadodonu me “viritaki na daisi ni tamata.” Na ivosavosa makawa qo e vakaibalebaletaka na nodra dau lawakitaki eso ni vakayagataki na daisi. Ena levu na vosa, e sega ni vakaibalebale ni vakadewataki vakadodonu na matavosa qo. E matata sara ni vakadewataki ga me “ilawaki ni tamata.”

  • Ena Roma 12:11 e volai kina e dua na matavosa vaKirisi, ni vakadewataki vakadodonu e kena ibalebale “me buebue na yalo.” Na matavosa qo e sega ni vakavotuya na ibalebale e tiko ena vakavalagi, e vakadewataki gona me “uqeti kemuni ga na yalo tabu” ena iVolatabu qo.

  • MACIU 5:3

    Vakadewa vakadodonu vakavalagi: “ko ira sa yalomalumalumu”

    Vakasama: “o ira na kauaitaka nodra bula vakayalo”

    Ena Vunau rogo nei Jisu ena Ulunivanua e tukuna o koya e dua na matavosa e dau vakadewataki me “Sa kalougata ko ira sa yalomalumalumu.” (Maciu 5:3, Ai Volatabu) Ia ena levu na vosa, e buawa ni vakadewataki vakadodonu na matavosa qo. Ena so na gauna ni vakadewataki na vosa yadua, “ko ira sa yalomalumalumu” e rawa ni kena ibalebale ni sega ni tu vinaka na nodra vakasama, se ra sega ni bulabula ra qai gogo. Ia e vakavulici ira tiko eke na lewenivanua o Jisu ni vakatau na nodra marau nira muria na veidusimaki ni Kalou, sega ni nodra vakaceguya nodra bula vakayago. (Luke 6:20) Na matavosa me vaka “o ira na kauaitaka nodra bula vakayalo” se “o ira na kila ni bibi me dusimaki ira na Kalou” e dusia na ibalebale donu ni matavosa taumada.​—Maciu 5:3; The New Testament in Modern English.

  • Ena levu na ikotokoto, na vosa vakaIperiu e vakadewataki me “vuvu” e salavata kei na ibalebale ni vosa vakavalagi, oya na nona cudruvaka e dua ni sega ni dina e dua erau veivolekati, se vuvutaka na ka era taukena eso. (Vosa Vakaibalebale 6:34; Aisea 11:13) Ia na vosa vakaIperiu vata ga qori e dusia tale ga na ka vinaka. Me kena ivakaraitaki, e rawa ni vakadewataki me “yalogu” nei Jiova se nona gumatua me taqomaki ira na nona  dauveiqaravi, se ni vinakata “me qaravi duadua ga.” (Lako Yani 34:14; 2 Tui 19:31; Isikeli 5:13; Sakaraia 8:2) Rawa tale ga ni dusia na nodra “yalogu” na dauveiqaravi yalodina ni Kalou kei na nodra sokaloutaki koya, se na nodra ‘sega ni taleitaka me beci’ o koya.​—Same 69:9; 119:139; Tiko Voli mai na Lekutu 25:11.

  • Na vosa vakaIperiu na yadh e dau vakadewataki me “liga.” Ia ni vakatau ena ikotokoto e rawa ni vakadewataki me “lewa,” “lomasoli,” “kaukaua,” kei na so tale

    Na vosa vakaIperiu e dau vakaibalebale ina liga ni tamata e levu tu na kena ibalebale. Ni vakatau ena ikotokoto e rawa ni vakadewataki me “lewa,” “lomasoli,” se “kaukaua.” (2 Samuela 8:3; 1 Tui 10:13; Vosa Vakaibalebale 18:21) E 40 vakacaca na ivakadewa ni vosa qo ena iVolatabu vakavalagi na Vakadewa ni Vuravura Vou.

Ni vakasamataki na ka qo, e levu na ka e vauci ena vakadewa iVolatabu, e sega ni vakadewataki na vosa taumada kei na dua ga na vosa ena veigauna kece e basika kina. Me lewa vinaka o koya e vakadewa na vosa e digia me vakavotuya vinaka na vakasama ena vosa taumada. E vinakati tale ga me tuvana vinaka na iyatuvosa me muria na lawa ni vosa e vakadewa kina, me rawarawa na wilika.

Ia me kua ni sivia tale na kena vakamacalataki na ka e vakadewataki. Na daunivakadewa e vakalekalekataka nona ivakadewa ni iVolatabu me salavata kei na ka ga e nanuma e rawa ni vakadewataka cala na ibalebale. Ena sala cava? O koya e vakadewa e rawa ni biuta nona vakasama me baleta na ka e nanuma ni ibalebale ni vosa taumada, se vakalutuka eso na tikina bibi e tiko ena vosa taumada. Ena rawarawa beka na wilika na iVolatabu e vakadewataki vakalekaleka, ia ena so na gauna ena dredre kina me kila na itukutuku dina o koya e wiliwili.

E rawarawa sara ni moica nona cakacaka na daunivakadewa na ivakavuvuli e vakabauta. Me kena ivakaraitaki, e kaya na Maciu 7:13 ni “galala na sala e basika ina rusa.” Eso na daunivakadewa era vakayagataka na vosa “eli,” era sega ni vakayagataka na vosa vaKirisi e kena ibalebale dina na “rusa.” E rairai uqeti ira na ivakavuvuli era vakabauta.

Me vakasamataka tale ga o koya e vakadewa iVolatabu ni volai na iVolatabu ena vosa rawarawa, na vosa ni veisiga era vosataka na lewenivanua, me vakataki ira na dauteitei, na ivakatawa ni sipi, kei ira na dauqoli. (Niemaia 8:8, 12; Cakacaka 4:13) O koya gona, na ivakadewa vinaka ni iVolatabu e matata na kena itukutuku vei ira na tamata yalomalumalumu,  se mani vakacava na nodra isususu. E vakayagataki vakalevu na vosa e matata, e kilai levu, e kilai rawarawa tale ga, sega so na vosa e vakavudua na nodra vakayagataka na lewenivanua.

Levu na dauvakadewa iVolatabu era bokoca vakatawadodonu na yaca ni Kalou o Jiova ena levu na ivakadewa ni gauna qo, ia e volai na yaca qori ena ivolavivigi makawa ni iVolatabu. (Raica na iKuri A4.) E levu na ivakadewa e sosomitaka na yaca qori ena icavuti, me vaka “Turaga,” eso mada ga era saga me kua ni kilai ni tiko na yaca ni Kalou. Me kena ivakaraitaki, ena so na ivakadewa, e volai na masu nei Jisu ena Joni 17:26: “Au vakatakilai kemuni vei iratou,” kei na Joni 17:6, “Au vakatakilai kemuni vei iratou oni solia vei au.” Ia na ivakadewa donu ni masu nei Jisu me va qo: “Au sa vakatakila vei iratou na yacamuni” kei na “Au sa vakatakila na yacamuni vei iratou oni solia vei au.”

E volai ena ivakamacala taumada ni imatai ni iVolatabu vakavalagi ni Vakadewa ni Vuravura Vou: “E sega ni vakadewataki vakalekaleka na iVolatabu. E sagai me vakadewataki vakavoleka na vosa taumada e volai kina ke rogo matau ena vosa vakavalagi ni gauna qo, ia me kua ni rogo mawi me lai buawa kina na vakasama.” E saga gona na Komiti ni Vakadewa ni Vuravura Vou ni iVolatabu me lewa vinaka na nona vakayagataka na vosa kei na matavosa e vakadewataka donu na vosa taumada, ia e sega ni vakayagataka na vosa ena dredre me wiliki se buawa kina na vakasama e sagai me vakavotui. O koya gona ena wiliki rawarawa na iVolatabu qai nuidei o koya e wilika ni vakadewataki donu na itukutuku e uqeta na Kalou.​—1 Cesalonaika 2:13.