Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

  A2

iVakamacala ni Vakadewa Qo

A sevutaki ena 1950 na ilavelave vakaPeritania na New World Translation of the Christian Greek Scriptures, ia ena 1961 e qai tabaki kina na iVolatabu taucoko na New World Translation of the Holy Scriptures. Tekivu mai na gauna qori sa yaga sara na vakadewa qo vei ira na vica vata na milioni na dauwiliwili ena 120 vakacaca na vosa, ni donu na kena vakadewataki mai na vosa taumada qai matata na wilika.

E kila na Komiti ni Vakadewa iVolatabu ni Vuravura Vou ni bibi me vakayagataki na vosa e uqeta na lomadra na dauwiliwili ni gauna qo. Oya na vuna e vakayagataki kina ena ivakadewa qo eso na iwalewale kei na vosa ni muri na tikina qo:

  • Vakayagataki na vosa ni gauna qo, e kilai rawarawa. Me kena ivakaraitaki, na vosa “qaqa sodrosodro” sa veisau me “domoqa.” (2 Timoci 3:4) Na “lomakatakata” sa veisau me “yalogu.” (Aisea 9:7) Na “druma” sa veisau me “lecaika.” Ena ivakadewa qo, na “veidauci” sa veisau me “veiyacovi tawadodonu.” (Kalatia 5:​19)

  • Vakamatatataki na vosa vakaivolatabu. E dau sagai me vakamacalataki na ibalebale ni so na vosa e vakayagataki ena ilavelave vakaPeritania. Me kena ivakaraitaki, na vosa vakaIperiu na “Seoli” kei na vosa vaKirisi na “Etesi,” e vakayagataki ena iVolatabu me dusia na ibulubulu ni kawatamata. Levu era sega ni kila na vosa ruarua qo. E rua tiko na ibalebale ni vosa na “Etesi” ena itukuni vaKirisi. Era vakaibalebaletaka na dauvola iVolatabu na vosa ruarua qo me “iBulubulu,” qai biu ga ena ivakamacala e ra na vosa “Seoli” kei na “Etesi.”​—Same 16:10; Cakacaka 2:27.

    E vaka kina na vosa “ivi,” e vakayagataki na vosa qo ni dusia na tikiniyago. Ia ni vakatakarakarataka e dua tale na ka, me vaka ena Same 7:9, 26:2 kei na Vakatakila 2:23, e biu sara ena tikinivolatabu qo na kena ibalebale, oya na “veika titobu au dau vakila”  se “na vakanananu titobu,” qai biu ena ivakamacala e ra na “ivi.”

    Eso tale na vosa me vaka na “uro,” na “lewemu,” kei na “ileu” e vakadewataki tale ga va qori, me vakatau ena ikotokoto. (Vakatekivu 45:18; Dauvunau 5:6; Jope 16:15) Eso na vosa qo e vakamacalataki ena “iVakamacala ni Vosa Vakaivolatabu.”

    E qarauni vinaka na veisau kece e caka ena tikinivolatabu ni salavata kei na masu, qai dokai vakalevu na itavi e qarava na Komiti taumada ni Vakadewa iVolatabu ni Vuravura Vou.

So tale na ka e laurai ena iVolatabu qo:

Na ivakadewa ni iVolatabu qo e vica toka na kena ivakamacala e ra. E va qo na kena wasewasei:

  • “Se” Eso tale na kena ibiubiu mai na vosa vakaIperiu, vakaArame, se vaKirisi e tautauvata ga na kena ibalebale.​—Vakatekivu 1:2, ivakamacala e ra ni “igu kaukaua ni Kalou”; Josua 1:8, “e ra.”

  • “Se rawa ni” Eso tale na kena ibiubiu e yavutaki vinaka ia e duidui na vakasama e vakavotuya.​—Vakatekivu 21:6, “dredre vata kei au”; Sakaraia 14:21, “kai Kenani.”

  • “Ipe.; Kir.” Na vakadewa vosa yadua mai na vosa vakaIperiu, vakaArame, se vaKirisi se na ibalebale ni vosa mai na vosa taumada.​—Vakatekivu 30:22, “bukete”; Lako Yani 32:9, “yalokaukaua.”

  • Kena ibalebale kei na so tale na itukutuku Na ibalebale ni yaca (Vakatekivu 3:17, “Atama”; Lako Yani 15:23, “Mara”); ivakamacala matailalai me baleta na ivakarau bibi kei na ivakarau (Vakatekivu 6:15, “kiupiti”); so tale na kena itukutuku e tiko ena iKuri kei na iVakamacala ni Vosa.​—Vakatekivu 37:35, “iBulubulu”; Maciu 5:22, “Qiena.”

 Na iwasewase e liu, e kena ulutaga “Cava e Kaya na Vosa ni Kalou?,” e vakamacalataki vakalekaleka kina na ivakavuvuli vakaivolatabu. Oti ga na lewe ni iVolatabu, sa tiko sara na “Veitaravi ni iVola ena iVolatabu,” na “iDusidusi ni Vosa ena iVolatabu,” kei na “iVakamacala ni Vosa ena iVolatabu.” E yaga na iVakamacala ni Vosa me kila o koya e wilika na vosa kei na vanua e vakayagataki kina. Qo na lewe ni iKuri A: “Yavu ni Vakadewa iVolatabu,”  “iVakamacala ni Vakadewa Qo,” “Mai Tu Vakacava Vei Keda na iVolatabu,” “Yaca ni Kalou ena iVolatabu vakaIperiu,” “Yaca ni Kalou ena iVolatabu vaKirisi vaKarisito,” “Ira na Parofita kei na Tui Juta kei Isireli,” kei na “Veika Bibi ena Bula i Jisu e Vuravura.” Na iKuri B e tiko kina na mape, na iyaloyalo, kei na so tale na itukutuku ena yaga vei ira na gonevuli gugumatua ni iVolatabu.

 E tiko ena loma ni iVolatabu na ivakamacala leleka ni wase kece ni ivola kei na kena tikinivolatabu, me kila kina o koya e wilika na lewe ni ivola taucoko. E tiko ena iyatu e loma ni drauniveva yadua na idusi ni tikinivolatabu veisemati.