Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Qaravi Jiova, me Kua o Setani

Qaravi Jiova, me Kua o Setani

O keda kece meda na vakatulewa. Ena dua ga vei rau, meda qaravi Jiova se da qaravi Setani kei na nona ilala timoni. Ena sega ni rawa ni wase rua noda veiqaravi. Ia sa ka vakayalomatua ga meda qaravi Jiova!

E Vinaka o Jiova

Eda sa raica mai ni kamikamica vei ira na timoni mera dau vakamavoataki keda se lawakitaki keda. O Jiova e sega ni dau vaka oya. E lomani keda na tamata me vaka ga e dua na tama ni dau lomana na luvena. O koya na iVurevure ni “solisoli vinaka kecega kei nai solisoli kecega e yaga sara.” (Jemesa 1:17) E sega ni bureitaka na ka vinaka vei keda, kevaka sara mada ga me na vakayalia kina na ka duadua e talei vua.—Efeso 2:4-7.

O Jisu, na Luve ni Kalou, e lomani ira na tamata ena nona vakabulai ira mai na nodra tauvimate

Vakasamataka na veika e cakava e vuravura o Jisu, na Luve ni Kalou. Era vosa rawa na galu, era rai na mataboko. E vakabulai ira na vukavuka kei na lokiloki. E vakatalai ira tani na timoni qai walia na veimataqali mate. Ena kaukaua ni Kalou, e bau vakatura tale ga na tamata mate o Jisu.—Maciu 9:32-35; 15:30, 31; Luke 7:11-15.

 E sega vakadua ni dabui keda o Jiova, ia e dau vosa dina ga. E sega ni dau veivakaisini.—Tiko Voli Mai na Lekutu 23:19.

Cata na iValavala Dukadukali

Era le vica na milioni era vesuki tu ena vakasama butobuto kei na lasu me vaka ga na lago e vesuki ena viritalawalawa. Era rerevaki ira na mate. Era rerevaki ira na timoni. Era leqataka na vakadraunikau, na cakaisausau, era cakava na idranumi kei na rewa. Era vesuki tu ena vakabauta kei na itovo e yavutaki ena lasu i Setani na Tevoro. Ia o ira na tamata ni Kalou era sega ni coriti ena veika vaka oya.

O Jiova e kaukaua cake sara vei Setani. Ke o qaravi Jiova, ena taqomaki iko o koya mai vei ira na timoni. (Jemesa 4:7) Ena sega ni mana vei iko na vakadraunikau. Me kena ivakaraitaki mai na dua na koro mai Nigeria, ni a sega ni via lako tani mai kina e dua na iVakadinadina, eratou qai vakadraunikautaki koya e le tolu na dauvakadraudrau. Ia ni a sega ni mate na iVakadinadina ena vuku ni nodratou vakadraunikau, e qai lako vua e dua vei iratou na dauvakadraudrau oya me lai kere veivosoti.

Era vakama nodra ivola ni vakatevoro na kai Efeso

Ke ra vakasagai iko na timoni, mo kaciva na yaca i Jiova, ni na taqomaki iko o koya. (Vosa Vakaibalebale 18:10) Ia me rawa ni taqomaki iko na Kalou, e dodonu mo biuta tani vakadua na ka kece e  vauci ena vakatevoro kei na nodra qaravi na timoni. Era cakava oya na dausokalou vua na Kalou mai Efeso makawa. Era soqona na nodra ivola kece ni vakatevoro ra qai vakama. (Cakacaka 19:19, 20) Mera cakava tale ga oqo na tamata ni Kalou nikua. Biuta tani na rewa, qato, itaube, ivola ni vakatevoro, se cava tale e vauci ena veika vakatevoro.

Muria na Sokalou Dina

Ke o via vakamarautaka na Kalou, e sega ni rauta ga mo  biuta na sokalou lasu kei na caka ca. E dodonu mo muria sara na sokalou savasava. Na iVolatabu e vakaraitaka na ka e dodonu me caka:

Mo dau tiko ena soqoni vakarisito.—Iperiu 10:24, 25

Vulica na iVolatabu.—Joni 17:3

Vunau vei ira na tani.—Maciu 24:14

Masu vei Jiova.—Filipai 4:6, 7

Mo papitaiso.—Cakacaka 2:41

Mai Veitokani kei Ira na iVakadinadina i Jiova

O Setani kei ira nona timoni e tiko nodra tamata e vuravura era vakavuvulitaka na cala ra qai muria tale ga. O Jiova tale ga e tiko na nona tamata. Oqo o ira na iVakadinadina i Jiova. (Aisea 43:10) Sa sivia e ononamilioni na iVakadinadina e veiyasa i vuravura. O ira kece oqo era saga mera caka vinaka ena nodra vakavulici ira na tani ena ka dina. O na rawa ni sota kei ira ena Kingdom Hall ena levu na vanua. Era na marautaka sara ga mo gole yani kina.

Na nodra itavi mera vukei ira na tani mera mai qarava na Kalou. Era na vakavulici iko ena iVolatabu ena nomu vale, era na vukei iko mo sokaloutaki Jiova ena sala e dodonu. O na sega ni sauma kina e dua na ilavo. Era marau na iVakadinadina mera veivakavulici ena ka dina baleta nira lomani ira na wekadra, era lomani koya tale ga na Kalou o Jiova.

Era na vukei iko na iVakadinadina i Jiova mo qarava na Kalou