Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Era Dau Uqeta na Timoni me Vorati na Kalou

Era Dau Uqeta na Timoni me Vorati na Kalou

E so na itovo era yavutaki ena vakasama lasu ni o ira na mate era raici keda tiko mai

Ia na cava e dau saga kina vakaukaua o Setani kei ira nona timoni mera vakacalai keda na tamata? Nira vinakata meda tokoni ira ena nodra veivorati. Era via sokaloutaki. Era vinakata meda vakabauta nodra lasu, meda vakayacora na veika e cala ena mata i Jiova. E levu vei ira na cala oya e vauci kina na itovo vakavanua me baleti ira na mate.

E ka mosimosi dina ni sa mate e dua na wekada lomani, sa macala ga nida na lolositaka. Ni sa mate na nona itokani o Lasarusa, e “tagi ko Jisu.”—Joni 11:35.

E levu sara na itovo vakavanua me baleta na mate, e duidui tale ga na kedra ivakarau e veiyasa i vuravura. E levu era sega ni veisaqasaqa kei na ivakavuvuli vakaivolatabu. Ia e so na ivalavala ni somate e yavutaki ena vakasama nira bula tiko na mate, nira raici keda tiko mai na bula. Na bikabika, na veitagicaki vakalialia ena gauna ni somate, na veika matailalai e dau caka ni soqovi na mate, na ka kece oqo e caka mera kua kina ni vakacudrui na yalo ni mate. Ia me vaka nira “sa sega ni kila e dua na ka” na mate, o ira na muria tiko na ivakarau vaka oya era vakabulabulataka na lasu i Setani.—Dauvunau 9:5.

E so tale na itovo era yavutaki ena vakasama lasu nira vinakata noda veivuke na mate

 E so tale na itovo e yavutaki ena vakabauta nira gadreva na veivuke na mate, ia kevaka era sega ni vukei, era na vakavuleqa vei ira na bula. Ena so na vanua, ena caka e dua na magiti se cabo e so na imadrali ni sa bogivasagavulu se bogidrau oti nona mate e dua. Ni caka oqo, e nanumi ni na vukei kina o koya sa mate ena nona ‘idewadewa yani’ ina vuravura ni yalo. E dua tale na ivalavala matau oya me dau soli na kakana se na gunu vei ira na mate.

E cala na ivalavala kece oqo nira tokona na lasu i Setani me baleti ira na mate. Ena vakadonuya beka o Jiova meda vakaitavi tale ga ena itovo e so e yavutaki ena nodra ivakavuvuli na timoni? Sega!—2 Korinica 6:14-18.

O ira na tamata ni Kalou dina era sega ni vakaitavi ena itovo e tokona na lasu i Setani. Sega, era lomani ira ga na bula ra qai saga mera lai vakacegui ira. Era kila ni o Jiova duadua ena rawa ni vukea e dua e sa mate.—Jope 14:14, 15.

 Cata na Vakatevoro na Kalou

E so na tamata era veitaratara sara ga vakadodonu kei ira na timoni se ra lakova e dua tale na tamata me veitaratara ena vukudra. E vakatokai oqo na vakatevoro. Na vakacuru, vakadraudrau, rairai, kaciyalo, era okati kece ena vakatevoro.

Na Kalou e cata na ka ca kece oqo. E lewa me caka duadua ga vua na sokalou.​—Lako Yani 20:5

Na iVolatabu e kaya ni cala na veika oqo: “Me kakua ni kune vei kemuni e dua . . . na rairai, se dua sa daudigitaka na siga eso, se dua sa dauia na parofisai e na gata, se dua sa daucakai sausau, se dua sa lawaki, se dua sa taroga na daucurumi, se dua na dauveinita, se dua sa taroga na tamata sa mate. Ni ra sa tamata vakasisila vei Jiova ko ira kecega era sa kitaka na veika oqo.”—Vakarua 18:10-12.

Na cava e vakaroti keda kina vakaukaua o Jiova meda qarauni keda mai na veicakacaka oqo?

Ni nanumi keda, e vakarota kina o Jiova meda qarauna na  vakatevoro ena kena ivalavala cava ga. E lomani keda o Jiova, e kauaitaki keda tale ga, e kila ni o ira na via veitaratara kei ira na timoni era na tini leqa ga.

E dua a vaka oya o Nilda, e dua na dauvakacuru mai Brazil. Ra sa bau vakalolomataki koya dina na timoni. E kaya: “Era curumi au na yalo velavela, . . . era lewa vei au na ka meu cakava. So na gauna au vakilai yaloqu, so tale na gauna e yali tu na yaloqu, au mani curu kina ena valenilialia meu lai qaravi. Na kaukaua ni nodra vakacacani au na timoni, e lai ninini sara ga kina na yagoqu. Au gunu wainimate, tekivu meu gunu yaqona ni valagi, meu vakatavako tale ga. Vica na yabaki na noqu va tu qo.”

Era dau tini leqa tale ena vakatevoro e so. Era na bula vakaloloma kina, vakabobulataki, rawa tale ga nira mate sara

Mani drotaka rawa o Nilda nodra ivesu na timoni ena nona veivuke o Jiova kei ira nona iVakadinadina e vuravura, ia ena gauna oqo sa dua na ka nona marautaka nona bula. E kaya: “Au via tukuna vei ira na tamata kece ga mera kua sara ni torovi ira yani na yalo [velavela].”