Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 8

Ni Yaco na iTuvaki Rarawataki

Ni Yaco na iTuvaki Rarawataki

“E vakamarautaki kemuni vakalevu, e dina ni oni na vakararawataki mada vakalekaleka ena veimataqali veivakatovolei.”—1 Pita 1:6

Se mani vakacava nomu sasaga mo marautaka kina nomu vakawati kei na nomu bula vakavuvale, e rawa ni vakaseavutaka nomu marau na ituvaki tawanamaki e dau yaco. (Dauvunau 9:11) Ia e vakarautaka vakayalololoma na Kalou na veivuke nida sotava na ituvaki dredre. Ke o muria na ivakavuvuli vakaivolatabu ena tabana tarava, dou na rawa kina ni vosota vakavuvale na ituvaki dredre cava ga e basika.

 1 VAKARARAVI VEI JIOVA

NA KA E TUKUNA NA IVOLATABU: “Biuta vua na nomuni lomaocaoca kece, ni kauaitaki kemuni o koya.” (1 Pita 5:7) Nanuma tiko, e sega ni vakavuna na Kalou na ituvaki dredre o sotava. (Jemesa 1:13) Ni o toro voleka vei Jiova, ena vukei iko ena sala vinaka duadua. (Aisea 41:10) “Sova yani na lomamuni e matana.”—Same 62:8.

Ena vakacegui iko tale ga nomu wilika kei na nomu vulica e veisiga na iVolatabu. Ni o cakava qori, o na vakadinata ni o Jiova e dau “vakacegui keda ena veika dredre kece eda sotava.” (2 Korinica 1:3, 4; Roma 15:4) E yalataka ni na solia vei iko na “vakacegu ni Kalou e uasivia na vakasama kece.”—Filipai 4:6, 7, 13.

NA KA O RAWA NI CAKAVA:

  • Masuta na veivuke i Jiova mo kua ni lomaleqa, mo rawa tale ga ni vakasama kina vakavinaka

  • Vakasamataka na vakatulewa kece o nanuma mo cakava, qai digia ga na kena ena vinaka vei iko

2 QARAUNA NOMUDOU BULA VAKAVUVALE

NA KA E TUKUNA NA IVOLATABU: “Na lomana na yalomatua e rawata na kilaka, kei na daligana na vuku e qara me kunea na kilaka.” (Vosa Vakaibalebale 18:15) Saga mo kila na itukutuku kece. Mo kila na ka eratou vinakata yadua nomu lewe ni vuvale. Veivosaki qai vakarogoci ratou.—Vosa Vakaibalebale 20:5.

Vakacava ke takali e dua na wekamu lomani? Kua ni madua mo vakaraitaka nomu lolosi. Nanuma tiko, o Jisu mada ga e ‘tagi.’ (Joni 11:35; Dauvunau 3:4) Bibi tale ga mo vakacegu qai dau moce vinaka. (Dauvunau 4:6) Qori o na vosota rawa kina na ituvaki dredre.

NA KA O RAWA NI CAKAVA:

  • Mo veivosaki vakalevu kei ratou e vale ni bera ni sotavi na leqa. Qori ena vakarawarawataka nodratou vosa vei iko ni basika na ituvaki dredre

  • Veitalanoa kei ira era sotava tale ga na ituvaki va qori

 3 KERE VEIVUKE

NA KA E TUKUNA NA IVOLATABU: “Na itokani dina e loloma ena veigauna, e tacida ena gauna ni rarawa.” (Vosa Vakaibalebale 17:17) Era na via vukei iko nomu itokani, ia de dua era na sega ni kila na ka mera cakava. Kua ni tusuka, tukuna na ka o vinakata dina. (Vosa Vakaibalebale 12:25) Kerea tale ga na nodra veivuke vakayalo o ira era kila vinaka na iVolatabu. Ena vukei iko nodra veidusimaki e yavutaki ena iVolatabu.—Jemesa 5:14.

Ena yaga vakalevu nomu soqoni wasoma kei ira era vakabauti Jiova dina, era nuitaka na nona yalayala. Ena vakacegui iko tale ga nomu dau vakayaloqaqataki ira era gadreva tu na veivuke. Tukuna vei ira na ka o vakabauta me baleti Jiova kei na nona yalayala. Ogaoga tiko ga ni vukei ira era gadreva na veivuke, kua ni dau yawaki ira era lomani iko, era kauaitaki iko.—Vosa Vakaibalebale 18:1; 1 Korinica 15:58.

NA KA O RAWA NI CAKAVA:

  • Veitalanoa kei na dua nomu itokani voleka, ciqoma sara nona veivuke

  • Mo vosa vakadodonu, tukuna vakamatata na ka o vinakata