Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 9

Dou Qaravi Jiova Vakavuvale

Dou Qaravi Jiova Vakavuvale

“Moni qaravi koya . . . e bulia na lomalagi, na vuravura.”—Vakatakila 14:7

O sa vulica mai ena ivola qo ni tiko ena iVolatabu e levu na ivakavuvuli e rawa ni vukei iko kei na nomu vuvale. E vinakata o Jiova mo marau. E yalataka ke o vakaliuca mo qaravi koya, “ena qai vakaikuritaki vei kemudou na ka kece qo.” (Maciu 6:33) E vinakata dina o Jiova mo nona itokani. Saga ena nomu vinaka kece mo drau veitokani. Qori e ka dokai duadua vei keda.—Maciu 22:37, 38.

 1 VAQAQACOTAKA NOMU VEIWEKANI KEI JIOVA

NA KA E TUKUNA NA IVOLATABU: “‘Au na qai tamamuni, oni na qai wili moni luvequ tagane, moni luvequ yalewa,’ e kaya o Jiova.” (2 Korinica 6:18) E vinakata na Kalou mo drau veitokani voleka. Dua na sala ena rawati kina qori oya na masu. E sureti iko o Jiova mo “kua ni cegu ena masu.” (1 Cesalonaika 5:17) E taleitaka me rogoca na ka e tu ena nomu vakasama kei na ka o dau lomaleqataka. (Filipai 4:6) Ni o masu kei na nomu vuvale, eratou na raica ni o vakabauta ni bula dina tiko o Jiova.

O na sega ni vosa tiko ga vua na Kalou, ena vinakati tale ga mo rogoci koya. O rawa ni cakava qori ena nomu vulica na nona Vosa kei na ivola vakaivolatabu. (Same 1:1, 2) Vakasamataka vakatitobu na ka o vulica. (Same 77:11, 12) E vinakati tale ga mo dau tiko wasoma ena soqoni vaKarisito.—Same 122:1-4.

Dua tale na sala bibi mo vaqaqacotaka kina nomu veitokani kei Jiova, oya mo dau tukuni koya. Na levu ga ni nomu cakava qori, drau na veivolekati kina vakalevu.—Maciu 28:19, 20.

NA KA O RAWA NI CAKAVA:

  • Vakatikitikitaka e dua na gauna e veisiga mo wili iVolatabu, mo masu tale ga

  • Mo dou vakaliuca vakavuvale na veika vakayalo, sega ni ka ni veivakamarautaki kei na qarai ni vakacegu

2 MARAUTAKA NOMU SOKALOU VAKAVUVALE

NA KA E TUKUNA NA IVOLATABU: “Toro voleka vua na Kalou ena qai toro voleka mai vei kemuni o koya.” (Jemesa 4:8) Bibi me tiko e dua na nomudou ituvatuva ni sokalou vakavuvale, me muri tale ga. (Vakatekivu 18:19) Ia sega ni o koya ga qori, me tiki sara ga ni nomudou bula e veisiga o Jiova. Me kaukaua tiko ga na nomudou veiwekani kei na Kalou ena nomudou dau veivosakitaka na veika e baleti koya ‘ni dou dabe ena nomudou vale, ni dou taubale e gaunisala, ni dou davo sobu, ni dou duri cake tale ga.’ (Vakarua 6:6, 7) Saga mo dou vakataki Josua, ena nona kaya: “O yau kei ratou na noqu vuvale, keitou na qaravi Jiova ga.”—Josua 24:15.

NA KA O RAWA NI CAKAVA:

  • Me dei na nomu ituvatuva ni veivakavulici me baleta na veika eratou gadreva yadua na nomu lewe ni vuvale