Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 26

Na Vuna e Dredre Kina Meda Caka Vinaka

Na Vuna e Dredre Kina Meda Caka Vinaka

O CEI e marau ni cakava o Saula na veika ca?— O Setani na Tevoro. Era marau tale ga na iliuliu ni lotu Vakajiu. Ni veisau o Saula e qai vakatokai me o Paula na tisaipeli ni Qasenivuli Levu, era sa cati koya na iliuliu ni lotu. O raica rawa na vuna ena dredre kina vua na tisaipeli i Jisu me caka vinaka?—

Na veika dredre cava e sotava o Paula ni caka vinaka?

Dua na gauna e tukuna na bete levu o Ananaiasa vei ira e so mera sabaka na gusu i Paula. E bau saga tale ga o Ananaiasa me biu i valeniveivesu o Paula. E sotava e levu na veika dredre o Paula ni sa mai tisaipeli i Jisu. Me kena ivakaraitaki, era mokuti Paula na tamata ca ra qai tovolea mera vakamatei koya nira vakaviriki koya ena vatu lelevu.​—Cakacaka 23:1, 2; 2 Korinica 11:24, 25.

E levu era na sagai keda meda cakava na veika e sega ni marautaka na Kalou. Vakasamataka mada na veika oqo, E vakacava na levu ni nomu taleitaka  na veika e vinaka? Ena rawa beka mo caka vinaka tiko ga nira na cati iko kina e so, me vakaraitaka ni o taleitaka dina na veika vinaka? E vinakati kina na yaloqaqa, se vakaevei?—

De o vaqaqa, ‘Na cava era cati keda kina e so nida caka vinaka? E sega li ni dodonu mera marau?’ Eda namaka mera marau. Era dau taleitaki Jisu na tamata ena vuku ni veika vinaka e cakava. Dua na siga era osota mai na lewe ni dua na koro na katuba ni vale e tiko kina o Jisu. Baleta ni a vakabulai ira tiko na tauvimate o koya.​—Marika 1:33.

Ia so na gauna era sega ni taleitaka na veika e vakavuvulitaka o Jisu. E dau vakavuvulitaka na veika e dodonu, ia e so era cati koya  baleta ni tukuna na ka dina. Oqo na ka e yaco e Nasareci, na koro e susugi kina o Jisu ni curu ina nodra valenilotu na Jiu.

E tabaka kina o Jisu e dua na ivunau totoka mai na iVolatabu. Era taleitaka na tamata ni se qai tekivu. Era kurabuitaka na vosa vinaka e lako mai gusuna. E dredre mera vakabauta ni oqo ga na gonetagane e susugi ena nodra koro.

Ia e qai tukuna tale o Jisu e dua na ka. E vakamacalataka na gauna e vakadonui ira kina na Kalou na tamata era sega ni Jiu. Era cudru na tiko e valenilotu nira rogoca na vosa i Jisu oya. O kila na vuna?— Era nanuma ni vakadonui ira ga na Kalou. Era nanuma nira uasivi cake vei ira na vo ni tamata. Era cati Jisu ena vuku ni vosa e tauca. O kila na ka era via cakava vua?—

E kaya na iVolatabu: ‘Era dreti koya ina ibili ni koro. Era kauti koya cake sara ina bati ni delana mera lai biligi koya sobu me rawa kina ni mate. Ia e curu maliwai ira ga o koya.’​—Luke 4:16-30.

Na cava era via vakamatei Jisu kina o ira oqo?

Ke yaco vei iko oya, o na lesu tale vei ira mo lai tukuna tale na ka e baleta na Kalou?— Ena vinakati mo yaloqaqa, se vakaevei?— Ni oti e dua na yabaki e lesu tale i Nasareci o Jisu. E kaya na iVolatabu: E “vakatavulici ira e na nodra valenilotu.” E tukuna tiko ga na ka dina o Jisu baleta ni sega ni rerevaki ira na sega ni lomana na Kalou.​—Maciu 13:54, VV.

Ena dua na Siga ni Vakacecegu a tiko o Jisu ena vanua e tiko kina e dua na tamata liga mate. E tiko vei Jisu na kaukaua ni Kalou me vakabulai koya kina. Ia era veileti kei Jisu e so. Na cava e qai cakava na Qasenivuli Levu?— E tarogi ira taumada: ‘Ke dua na nomuni sipi e lutu ina qara ena Siga ni Vakacecegu, dou na sega beka ni vueta?’

Io, era na cakava oya vua na sipi ena Siga ni Vakacecegu, na siga e dodonu mera vakacegu kina. E qai kaya o Jisu: ‘E vinaka cake mo  vukea na tamata ena Siga ni Vakacecegu, baleta ni uasivi cake na tamata mai na sipi!’ E dodonu ga me vukei koya na tamata liga mate o Jisu, me vakabulai koya!

E tukuna o Jisu vua na tamata oya me dodoka na ligana. E vakabulai ena gauna sara ga oya. Sa duatani na nona marau! Ia vakacava o ira na veileti? Era marau tale beka ga?— Sega. Sa qai kaukaua ga na nodra cati Jisu. Era curu i tuba mera lai bosea mera vakamatei koya!​—Maciu 12:9-14.

E vaka tale ga kina nikua. Veitalia se cava eda cakava, eda na sega ni vakamarautaki ira kece na tamata. E dodonu gona meda digia se o cei meda vakamarautaka. Kevaka eda digia na Kalou o Jiova kei Luvena, o Jisu Karisito, e dodonu meda dau cakava na ka erau vakavuvulitaka. Ia ke da cakava oya, o cei ena cati keda? O cei ena vakadredretaka meda caka vinaka?—

O Setani na Tevoro. O cei tale ga?— O ira e vakacalai ira na Tevoro mera vakabauta na veika e sega ni dodonu. A tukuna o Jisu vei ira na iliuliu ni lotu ena nona gauna: “A tamamudou na tevoro, ia dou sa via kitaka na gagadre ca ni tamamudou.”​—Joni 8:44.

Na Tevoro e taleitaki ira e levu na tamata. A vakatokai ira o Jisu mera “vuravura.” Na cava na “vuravura” e cavuta oya o Jisu?— Daru raica mada na Joni wase 15, tikina e 19. Eda wilika kina na vosa i Jisu oqo: “Kevaka dou sa vakavuravura, ena lomana na kai nona ko vuravura; ia ni dou sa sega ni vakavuravura, ka ni’u sa digitaki kemudou mai vuravura, sai koya oqo sa cati kemudou kina ko vuravura.”

E macala ni vuravura e cati ira na tisaipeli i Jisu era okati kina na tamata kece era sega ni imuri i Jisu. Na cava e cati ira kina na tisaipeli i Jisu o vuravura?— Vakasamataka mada. O cei e liutaki vuravura tiko?— E kaya na iVolatabu: “Sa tu na vuravura taucoko e na  kaukauwa ni Vunica.” Na vunica oya o Setani na Tevoro.​—1 Joni 5:19, VV.

O sa qai raica na vuna e dredre kina meda caka vinaka?— O Setani kei na nona vuravura erau vakadredretaka na noda caka vinaka. Ia e tiko e dua tale na vuna. O se nanuma tiko na vuna oya?— Daru vulica ena Wase 23 ni ivola oqo nida sucu kaya mai na ivalavala ca. Eda na sega li ni marautaka na gauna sa na sega kina na ivalavala ca, na Tevoro, kei na vuravura e liutaka tiko oqo?—

Ni sa takali na vuravura oqo, na cava ena yaco vei ira na caka vinaka?

E yalataka na iVolatabu: “Sa takali tiko yani na vuravura.” E kena ibalebale oqo nira na takali o ira era sega ni imuri ni Qasenivuli Levu. Era na sega ni vakatarai mera bula tawamudu. O kila o cei ena bula tawamudu?— E kuria na iVolatabu: “[O] koya ga sa vakayacora na loma ni Kalou sa tu dei ka tawa mudu.” (1 Joni 2:17, VV) Io, o ira ga na caka vinaka, era cakava na “loma ni Kalou,” era na bula tawamudu ena vuravura vou ni Kalou. O koya gona kevaka mada ga ena mani dredre, eda na vinakata ga meda caka vinaka, se vakaevei?—

Daru wilika mada na tikinivolatabu oqo era vakaraitaka na vuna e sega kina ni rawarawa na noda caka vinaka: Maciu 7:13, 14; Luke 13:23, 24; kei na Cakacaka 14:21, 22.