Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 30

Cava e Vukei Keda Meda Kua ni Rere?

Cava e Vukei Keda Meda Kua ni Rere?

E RAWARAWA beka nomu qaravi Jiova?— A sega ni tukuna na Qasenivuli Levu ni na rawarawa. Ena bogi ni bera nona vakamatei, e tukuna vei iratou nona yapositolo: “Kevaka sa cati kemudou ko vuravura, dou sa kila ni ra sa cati au eliu, era sa cati kemudou emuri.”​—Joni 15:18.

E sakitaka o Pita ni na sega ni biuti Jisu, ia e tukuna o Jisu vei Pita ni na cakitaki koya vakatolu ena bogi ga oya. E qai cakitaki koya dina o Pita! (Maciu 26:31-35, 69-75) E yaco vakacava oqo?— Baleta ni a rere o Pita, kei iratou na vo ni yapositolo.

O kila na vu ni nodratou rere na yapositolo?— Eratou sega ni cakava e dua na ka bibi. Nida kila na ka oya ena vukei keda meda qaravi Jiova, veitalia se cava e cakava se kaya vei keda e dua. Meda rawa ni kila, ena vinakati meda raica lesu na ka e yaco ena iotioti ni bogi e tiko kina kei iratou na yapositolo o Jisu.

E tekivu ena nodratou vakayagataka vata na kanavata ni Lakosivia. Oqo na kanavata era dau nanuma kina na tamata ni Kalou na nodra vakabulai mai na veivakabobulataki e Ijipita. Oti oya sa qai tauyavutaka o Jisu e dua na vakayakavi vou. Daru na qai veivosakitaka ena dua na wase e muri se ena vukei kedaru vakacava me daru nanumi Jisu. Ni oti na vakayakavi kei na nona vakayaloqaqataki iratou na nona yapositolo, e kauti iratou sara o Jisu ina were o Kecisemani. Oqo e dua na vanua eratou dau lakova vakalevu.

 E lako vakatikitiki o Jisu me lai masu. E tukuna vei Pita, Jemesa, kei Joni me ratou masu tale ga. Ia eratou mani moce. E lako vakatolu o Jisu me lai masu, ia ni suka mai vakatolu e raici Pita kei rau na rua ni ratou moce tiko! (Maciu 26:36-47) O kila na vuna e dodonu me ratou yadra tiko kina ratou qai masu?— Daru veitalanoataka mada.

Na cava e dodonu me ratou yadra tiko kina o Pita, Jemesa, kei Joni?

Ena yakavi bogi oya a tiko kei Jisu kei ira na vo ni yapositolo ena kanavata ni Lakosivia o Jutasa Isikarioti. O na rairai nanuma tiko ni a vuki me daubutako o Jutasa. Ia oqo sa liumuritaki Jisu. E kila vinaka na yasa ni were o Kecisemani e dau sota kina o Jisu kei iratou na nona yapositolo. E kauti ira mai ena vanua oya na sotia o Jutasa mera lai vesuki Jisu. Nira yaco yani, e tarogi ira o Jisu: ‘O ni vakasaqarai cei?’

Era sauma na sotia: ‘O Jisu.’ E sega ni bau rere o Jisu ni sauma: ‘O au oqo.’ Era kurabuitaka na yaloqaqa i Jisu na sotia ra qai vakasukasuka ra bale sara. E qai kaya o Jisu: ‘Kevaka dou vakasaqarai au mai, dou laivi iratou na noqu tisaipeli mera lako.’​—Joni 18:1-9.

Era rere ra qai dro na yapositolo ni sa vesu o Jisu. Ia rau via kila o Pita kei Joni na ka ena yaco, rau mani muri ira tiko yani vakamalua. E qai kau sara o Jisu ina vale nei Kaiafa, na bete levu. Ni rau a veikilai kei Joni na bete levu, e vakatara na ivakatawa ni matamata me rau curu e lomanibai o Joni kei Pita.

Era sa tu ena loma ni vale nei Kaiafa na bete me vakayacori na veilewai. Era vinakata me vakamatei o Jisu. Era kauti ira mai e so na ivakadinadina mera mai beitaki Jisu vakailasu. Era vacuki koya ra qai sabici koya. E toka voleka o Pita ni yaco tiko na veika oqo.

A vakaraici Pita toka na goneyalewa e ivakatawa ni matamata a vakacurumi Pita kei Joni mai. E kaya, ‘O iko tale ga o tiko vata kei  Jisu!’ Ia e kaya o Pita ni sega ni bau kilai Jisu. Dede vakalailai e kilai Pita mai e dua tale na goneyalewa qai tukuna vei ira na tu e kea: “O koya tale ga oqo erau a tiko vata kei Jisu.” E tukuna tale o Pita ni sega ni kilai koya. Dede tale vakalailai era raici Pita e dua na ilala ra qai kaya vua: ‘O iko o dua dina vei ira.’ Oqo e ikatolu ni gauna me cakitaka kina o Pita, qai kaya: ‘Au sega ni kila na tamata oqori!’ E bubuluitaka sara ga o Pita ni tukuna tiko na ka dina. E vuki sara mai o Jisu me raici koya.​—Maciu 26:57-75; Luke 22:54-62; Joni 18:15-27.

Na cava e rui rere kina o Pita me tini cakitaki Jisu kina?

O kila se cava e vakavuna me lasu o Pita?— Io, e rere. Na cava e rere kina? Na cava e sega ni cakava me a rawa ni vakayaloqaqataki koya? Vakasamataka mada. Na cava a cakava o Jisu me vakayaloqaqataki koya?— E masuta na Kalou me vukei koya me yaloqaqa. Vakasamataka tale ga ni a tukuna vakatolu vei Pita o Jisu me masu tiko, me yadra tiko, me vakatawa tale ga. Ia na cava e yaco?—

Ena gauna tolutolu oya e moce ga o Pita. E sega ni masu qai sega  tale ga ni vakatawa. Sa rauta me vaka e kidacalataka na vesu nei Jisu. Ni toso tiko na veilewai, nira mokuti Jisu ra qai lewa me vakamatei, e rere sara ga o Pita. Ia, ena vica ga na aua sa oti, na cava e tukuna o Jisu mera namaka na nona yapositolo?— E tukuna vei iratou ni na cati ira o vuravura me vaka e cati koya.

E rawa mo sotava vakacava na ituvaki e viavia vaka e sotava o Pita?

Daru vakasamataka mada na ka e rawa ni yacovi kedaru e via tautauvata kei na ka e yacovi Pita. Kaya mada o tiko e koronivuli ra qai vosa vakacacataki o ira na sega ni vakarokorokotaka na kuila se o ira na sega ni marautaka na Kirisimasi. Vakacava ke dua e tarogi iko: “E  dina ni o sega tale ga ni dau vakarokorokotaka na kuila?” Se era kaya beka e so: “Keimami rogoca ni o sega tale ga ni marautaka na Kirisimasi!” O na rere beka mo tukuna na ka dina?— Se o na lasu beka, me vakataki Pita?—

E qai rarawataka vakalevu o Pita na nona cakitaka ni sega ni kilai Jisu. Ni sa vakila na cala e cakava, e curu e tuba me lai tagi. Io, e saumaki tale vei Jisu. (Luke 22:32) Vakasamataka mada. Na cava ena vukei keda meda kua ni rere de da lai cavuta tale ga na mataqali vosa e tauca o Pita?— Nanuma ni o Pita e sega ni masu se vakatawa. Na cava gona e dodonu meda cakava nida imuri ni Qasenivuli Levu?—

E dodonu meda masuti Jiova me vukei keda. Ni masu o Jisu, o kila na ka e cakava vua na Kalou?— E tala mai e dua na agilosi me vakaukauataki koya. (Luke 22:43) E rawa nira vukei keda na agilosi ni Kalou?— E kaya na iVolatabu: “Na agilose i Jiova, sa tiko vakavolivoliti ira era sa rerevaki koya, ka sa vakabulai ira.” (Same 34:7) Eda na sega ni masuta wale ga na veivuke ni Kalou da sa vukei sara. O kila na cava tale e dodonu meda cakava?— E tukuna o Jisu vei ira nona imuri ni vinakati mera yadra tiko ra qai vakatawa. Na cava e rawa ni vukei keda meda cakava oya?—

Meda rogoca vinaka na veika e tukuni ena noda soqoni vakarisito da qai kauaitaka na veika eda vulica ena iVolatabu. E vinakati tale ga meda masuti Jiova wasoma me vukei keda meda qaravi koya. Ke da cakava oqori, eda na vukei meda kua ni rere. Eda na marau tale ga ni tukuna na veika e baleta na Qasenivuli Levu kei Tamana vei ira na tani.

Na veitikinivolatabu oqo ena vukei keda meda kua ni rerevaki ira na tamata nida cakava na veika e dodonu: Vosa Vakaibalebale 29:25; Jeremaia 26:12-15, 20-24; kei na Joni 12:42, 43.