SA BAU uqeti iko beka e dua mo cakava na ka e sega ni dodonu?— E bolei iko mo cakava na ka oya? Se e kaya beka ni na lasa qai sega ni cala ke o cakava?— Ke dua e tukuna vei keda oya, sa temaki keda tiko o koya.

Na cava meda cakava ke da temaki? E dodonu beka meda soro da qai cakava na ka e cala?— Oya ena sega ni marau kina na Kalou o Jiova. Ia o kila se o cei ena marau?— Io, o Setani na Tevoro.

O Setani e meca ni Kalou, e keda meca tale ga. Eda sega ni raici koya baleta ni tawarairai. Ia e rawa ni raici keda. Dua na siga a vosa vei Jisu, na Qasenivuli Levu, na Tevoro qai temaki koya. Meda raica mada se cava a cakava o Jisu me rawa kina nida kila na ka meda cakava nida temaki.

A vinakata tu ga o Jisu me cakava na loma ni Kalou. E vakaraitaka oqo ena nona papitaiso ena uciwai na Joritani. Ni papitaiso oti ga o Jisu sa temaki koya sara o Setani. E kaya na iVolatabu ni “tadola mai na lomalagi” vei Jisu. (Maciu 3:16, VV) E rawa ni kena ibalebale oqo ni sa nanuma lesu o Jisu na nona bula voli mai lomalagi.

Ni papitaiso oti e lako o Jisu ina dua na vanua lala me lai vakasamataka kina na veika sa tekivu  nanuma tale. E tiko e kea me vasagavulu na siga kei na bogi. E sega ni bau kana o Jisu ena loma ni gauna oya, sa waloloi sara tu ga. Oya sara ga na gauna e vakatovolei Jisu kina o Setani.

E kaya na Tevoro: “Kevaka ko sa Luve ni Kalou, mo kaya mada me vuki mei buli madrai na veivatu oqo.” Ke a kana vinaka sara ga na madrai ena gauna oya! Ia a rawa beka me vukica o Jisu na veivatu me ibuli madrai?— Io, e rawa. Baleta? Ni o Jisu e Luve ni Kalou, qai tiko vua na kaukaua me vakayacora vaka kina.

O na vukica beka na vatu me ibuli madrai ke tukuna vei iko o Setani?— Sa waloloi tu o Jisu. Ena cala beka ke caka ga vakadua?— E kila o Jisu ni sega ni dodonu me vakayagataka vaka oya na nona kaukaua. E solia vua na kaukaua o Jiova me rawa kina ni kauti ira mai na tamata vua na Kalou, me kua ni vakayagataka me yaga ga vua.

E tukuna ga vei Setani o Jisu na veika e volai ena iVolatabu: ‘E na sega ni bula na tamata e na madrai duadua ga; ia ena bula ga e na vosa kece ga e lako mai ena gusu ni Kalou.’ E kila o Jisu ni bibi cake na nona vakayacora na loma ni Kalou mai na kakana.

Ia e sasaga tale na Tevoro. E kauti Jisu i Jerusalemi me lai tucake ena dela ni valenisoro. Qai kaya o Setani: ‘Ke o luve ni Kalou, mo rika sobu. Ni sa volai nira na taqomaki iko mo kua ni mavoa na agilosi ni Kalou.’

 Na cava e vosa kina vaka oya o Setani?— E via temaki Jisu me cakava na ka vakalialia. Ia o Jisu e sega ni cakava na ka e vinakata o Setani. E tukuna ga vei Setani: “Sa volai talega, Mo kakua ni vakatovolei Jiova na nomu Kalou.” E kila o Jisu ni sega ni dodonu me vakatovolei Jiova ena nona vakaleqa na nona bula.

Ia, e se sega ga ni soro o Setani. E qai kauti Jisu ina dua na ulunivanua cecere. E lai vakaraitaka vua na matanitu kece e vuravura kei na kedra iukuuku. Qai tukuna vei Jisu o Setani: “A ka kecega oqori ka’u na solia vei iko, kevaka ko na cuva sobu ka vakarokoroko vei au.”

Vakasamataka mada na veika e via solia oya na Tevoro. E lewai ira kece beka na veimatanitu ni tamata o Setani?— E sega ni vakalasuya o Jisu ni lewai ira kece o Setani. Ke a vakalasui koya ke sega ni lewai ira tiko o Setani. Io, e liutaki ira dina tiko na veimatanitu e vuravura o Setani. E vakaraitaka tale ga na iVolatabu ni ‘lewa na vuravura oqo.’​—Joni 12:31.

Na cava o na cakava ke vinakata na Tevoro mo sokalou vua qai yalataka vei iko e so na ka?— E kila o Jisu ni sega ni dodonu me sokalou vua veitalia se cava e mani rawata mai vua na Tevoro. E kaya kina o Jisu: ‘Lako tani, Setani! Ni kaya na iVolatabu ni dodonu ga mo sokalou vei Jiova na nomu Kalou, mo qaravi koya duadua ga.’​—Maciu 4:1-10; Luke 4:1-13.

Eda dau temaki tale ga ena so na ka. O kila e so vei ira?— Me kena ivakaraitaki. De bulia beka o tinamu e dua na pai se keke totoka me ivakalomavinaka. De tukuna mo kua mada ni kania me yacova na gauna ni kana. Ia o rui via kana, o qai temaki mo kania. O na talairawarawa vei tinamu?— E vinakata o Setani mo talaidredre vei tinamu.

Vakasamataki Jisu. E waloloi tale ga. Ia e kila o koya ni bibi cake  na nona vakamarautaka na Kalou mai na nona kana. O vakadamurimuri Jisu kevaka o cakava na ka e tukuna o tinamu.

De ra uqeti iko beka e so na gone mo tiloma e so na vuanikau. Era na tukuna beka ni na vakavuna mo mamarau. Ia de wainimate gaga na vuanikau oya. E rawa ni vakavuna me tauvi iko e dua na mate ca se vakamatei iko sara ga. De dua e solia vei iko na itibi tavako e tiko kina na  wainimate gaga, qai bolei iko mo vakayagataka. Na cava o na cakava?​—

Nanumi Jisu. O Setani a sagai Jisu me vakaleqa na nona bula ni tukuna vua me rika mai na dela ni valenisoro. Ia e sega ni vakadonuya o Jisu. Na cava o na cakava ke dua e bolei iko mo cakava e dua na ka rerevaki?— E sega ni via rogoci Setani o Jisu. Mo kua tale ga ni rogoca e dua e vinakata mo cakava na veika e sega ni dodonu.

De tukuni beka vei iko ena dua na siga mo sokalou vua na matakau se ivakatakarakara, na ka e sega ni vakatara na iVolatabu. (Lako Yani 20:4, 5) De okati me ka e dau vakayacori e koronivuli. De tukuni vei iko ni o na sega tale ni vuli ke o sega ni cakava na ka oya. Na cava o na cakava?—

E rawarawa noda vakayacora na ka e dodonu ke da caka dodonu kece tiko. Ia ena dredre na noda cakava na ka e dodonu ke ra saga tiko e so meda vakayacora na ka e sega ni dodonu. Era na rairai kaya ni ka era saga tiko mo cakava e sega soti sara ni ca. Ia oqo ga na taro bibi, Na cava e kaya na Kalou? E dau donu tu ga na ka e kaya.

Se mani cava era kaya e so, meda kua vakadua ni cakava na ka e kaya na Kalou ni sega ni dodonu. Eda na vakamarautaka tiko ga kina na Kalou, da qai sega ni vakamarautaka na Tevoro.