Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 20

O Dau Via Liu tu Ga?

O Dau Via Liu tu Ga?

O BAU kila e dua e dau via liu tu ga?— De biliga tani e dua me rawa kina ni liu duadua ena laini. O sa bau raica ni yaco na ka oya?— E bau raici ira tale ga na uabula na Qasenivuli Levu nira saga mera liu se mera taura na itutu dokai. E sega ni taleitaka na ka e raica oya. Daru raica mada se cava e yaco.

O sa bau raici ira na tamata era via liu?

E tukuna na iVolatabu ni a sureti o Jisu ina dua na kanavata ena nona vale e dua na Farisi, e dua na iliuliu ni lotu. Ni yaco yani o Jisu, e raici ira sara e so na sureti nira digitaka na idabedabe dokai. E mani talanoa sara vei ira na sureti. O via rogoca na italanoa oya?—

 E kaya o Jisu: ‘Ni sureti iko e dua ina kana ni vakamau, kua ni lai dabe ina idabedabe dokai.’ O kila se cava e vosa kina vaka oya o Jisu?— De sureti tale ga mai e dua e vakaitutu cecere. Me vaka o raica ena iyaloyalo oqo, e kaya tiko na itaukei ni soqo: ‘Vagalala mada me dabe e keri o koya oqo, lai dabe i kea.’ E tarai koya vakacava na tamata e sureti oya?— Ena madua baleta era na raici koya na vo ni tamata era sureti ni sa tokitaki sobu.

E vakaraitaka tiko e ke o Jisu ni sega ni dodonu meda lai dabe ena idabedabe e cake. E kaya kina: ‘Ni o sureti ina kana ni vakamau, lai dabe sara e ra. Ena rairai qai lako mai o koya e sureti iko me kaya, “Noqu itokani, lako i cake.” O na qai dokai e matadra kece na sureti ni o sa lai vakadaberi e cake.’​—Luke 14:1, 7-11.

Na ivakavuvuli cava e vakaraitaka o Jisu ni tukuni ira na via dabe e cake?

O sa taura rawa na ibalebale ni italanoa oya?— Me dua mada na kena ivakaraitaki me macala kina ni o sa kila. Kaya mada ni o vakarau vodo ina basi ena oso. E dodonu beka mo sasaga mo liu me rawa kina ni o dabe me qai tucake tu e dua sa qase?— Ena marautaka beka o Jisu na ka o cakava oya?—

So era kaya ni sega ni bau kauaitaka o Jisu na ka eda cakava. O vakabauta oya?— Ni tiko o Jisu ena kanavata ena nona vale na Farisi oya, e vakaraici ira tiko na sureti nira digitaka na nodra idabedabe. O nanuma ni na sega ni kauaitaka tale ga o Jisu na veika eda cakava ena gauna oqo?— Sa qai raici keda vinaka ga ena gauna oqo o Jisu baleta ni sa tiko mai lomalagi.

 Ena rawa ni yaco na leqa ke dua e via liu. E rawa ni tubu kina na veileti, kei na cudru. E dau yaco oqo ena gauna era gade kina ena basi na gone. Ni kele ga na basi, era veitautaka na gone se o cei me liu. Era vinakata na idabedabe vinaka duadua, e volekata na katubaleka. Na cava e rawa ni yaco ena gauna oya?— Io, e rawa nira veileti.

E rawa ni vakavu leqa na dau via liu. E bau vakatubu leqa tale ga vei iratou na yapositolo i Jisu. Eda vulica ena Wase 6 ni ivola oqo ni ratou veiletitaka se o cei me liu vei iratou. Na cava e qai cakava o Jisu?— Io, e vakadodonutaki iratou. Ia eratou qai veileti tale. Daru raica mada se a tekivu vakacava na veileti oya.

Eratou a lako tiko i Jerusalemi kei Jisu na yapositolo kei ira tale e so ena iotioti ni  gauna. A vakamacalataka tiko o Jisu na nona Matanitu vei iratou, rau sa vakasamataka tiko o Jemesa kei Joni na nodrau na veiliutaki vata kei koya. Rau sa veitalanoataka tale ga kei tinadrau o Salome. (Maciu 27:56; Marika 15:40) Ni ratou sa lako tiko i Jerusalemi, e torovi Jisu o Salome, cuva vua, qai kerea vua e dua na ka.

‘Na cava o vinakata?’ e taroga o Jisu. E kerei Jisu o Salome me vakatarai rau na luvena me rau dabe volekati koya ena nona Matanitu, me dua e dabe ena yasana imatau, dua ena yasana imawi. Na cava o nanuma eratou kaya na vo ni tini na yapositolo ni ratou sa kila na ka erau kerei tinadrau kina o Jemesa kei Joni me kerea?—

Na cava e kerea tiko vei Jisu o Salome, ia na cava e qai yaco?

Io, eratou katakatataki Jemesa kei Joni. Mani vakasalataki iratou kece na nona yapositolo o Jisu. E tukuna vei iratou ni o ira na  iliuliu ni veimatanitu era vinakata mera vakaitutu ra qai dokai. Era vinakata na itutu cecere me rawa kina nira talairawarawa vei ira na lewenivanua. Ia e tukuna vei iratou na nona imuri o Jisu me ratou kua ni vakataki ira. E kaya: “Me dauveiqaravi ga vei kemudou ko koya e via yaco me levu vei kemudou.” Vakasamataka mada oya!​—Maciu 20:20-28, VV.

O kila se cava e dau nona itavi na dauveiqaravi?— E qaravi ira na tamata, e sega ni namaka me qaravi. E dau dabe toka ga mai ra, e sega ni lai dabe i cake. E sega ni vakabibitaki koya, e vakalolovirataki koya ga. Qai nanuma ni a tukuna o Jisu ni o koya e vinakata me liu me na vaka e dua na dauveiqaravi.

Na cava o nanuma e kena ibalebale oya vei keda?— Rau na veiletitaka beka na dauveiqaravi kei na nona turaga se o cei me na dabe i cake? Se o cei me kana e liu? Na cava o nanuma?— E vakamacalataka o Jisu ni na dau vakaliuci nona turaga o dauveiqaravi.​—Luke 17:7-10.

Me isosomi ni noda via liu, na cava e dodonu meda cakava?— Io, meda qaravi ira na tani. E kena ibalebale meda vakaliuci ira. Meda raici ira mera bibi cake vei keda. O rawa ni vakasamataka e so na sala mo vakaliuci ira kina?— Vakacava mo raica tale na tabana e 40 kei na 41 mo raica kina na sala e so o rawa ni vakaliuci ira kina na tani ni o qaravi ira.

O na se nanuma tiko ni a vakaliuci ira na tani na Qasenivuli Levu ni qaravi ira. Ena iotioti ni bogi e tiko kina kei iratou na nona yapositolo, e cuva sobu me savata na yavadratou. Kevaka tale ga eda vakaliuci ira na tani nida qaravi ira, rau na marautaki keda na Qasenivuli Levu kei na Tamana, na Kalou o Jiova.

Daru wilika mada e so tale na tikinivolatabu ena uqeti kedaru me daru vakaliuci ira na tani: Luke 9:48; Roma 12:3; kei na Filipai 2:3, 4.