Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 11

Era Veivukei na Agilosi ni Kalou

Era Veivukei na Agilosi ni Kalou

E SO era kaya nira vakabauta ga na ka era raica. Ia e vosa vakalialia oya. E levu na ka era tu eda se sega vakadua ni raica e matada. O rawa ni cavuta e dua?—

Vakacava na cagi eda ceguva? E rawa nida vakila?— Uvuca mada na ligamu. O vakila e dua na ka?— O vakila na cagi, ia o sega ga ni raica, se vakaevei?—

Daru sa veivosakitaki ira oti na veika bula vakayalo eda sega ni raica. Eda vulica ni so vei ira era vinaka qai so era ca. Cavuti ira mada e so na veika bula vakayalo era vinaka eda sega ni raica.— Io, na Kalou o Jiova, o Jisu, kei ira na agilosi vinaka. Era tu tale beka ga na agilosi ca?— E kaya na iVolatabu nira tu. Tukuna mada vei au na ka o sa vulica me baleti ira.—

Eda kila ni o ira na agilosi vinaka kei na agilosi ca era kaukaua cake vei keda. E kilai ira vinaka na agilosi na Qasenivuli Levu. Oqo e baleta ni a dua na agilosi o koya ni bera ni qai sucu e vuravura. A bula voli kei ira na agilosi mai lomalagi. E kilai ira e vica vata na milioni na agilosi. Era vakayacani beka na agilosi kece oya?—

Eda sa vulica ni vakayacani ira kece na kalokalo na Kalou. Eda rawa ni kila nira vakayacani kece tale ga na agilosi. Eda kila tale ga nira dau veivosaki baleta ni vakaraitaka na iVolatabu ni tiko na “vosa ni agilosi.” (1 Korinica 13:1) Na cava o nanuma era dau veivosakitaka na agilosi? Era bau veivosakitaki keda beka na lewe i vuravura?—

Eda kila nira saga tiko na agilosi i Setani, o ira na timoni, meda talaidredre  vei Jiova. E macala nira na veivosakitaka na kena icakacaka. Era vinakata meda vakataki ira me rawa kina ni cati keda tale ga o Jiova. Ia vakacava o ira na agilosi yalodina ni Kalou? Era bau veivosakitaki keda tale ga?— Io, e vaka kina. Era vinakata mera vukei keda. Meu tukuna mada vei iko na nodra vukei ira na tamata era lomani Jiova ra qai qaravi koya, e so na agilosi ni Kalou.

E kena ivakaraitaki e dua na turaga e yacana o Taniela e vakaitikotiko mai Papiloni. Levu na tamata ena vanua oya era sega ni lomani Jiova. E bau buli tale ga ena vanua oya na lawa e vakatabui kina me dua e masu vua na Kalou o Jiova. Ia e masu tu ga vei Jiova o Taniela. O kila na ka era qai cakava vei Taniela?—

Io, era biuti Taniela ina qara ni laione na tamata ca. E lai tu maliwai ira na laione era viakana tu. O kila na ka e qai yaco?— ‘E tala  mai nona agilosi na Kalou me sogota na gusudra na laione,’ e kaya o Taniela. E sega ni bau laukati! E rawa nira cakava e so na ka veivakurabuitaki na agilosi vei ira na qaravi Jiova.​—Taniela 6:18-22.

E vakabulai Taniela vakacava na Kalou?

Dua na gauna e vesu tu e valeniveivesu o Pita. O na se nanuma tiko ni o Pita e itokani i Jisu Karisito, na Qasenivuli Levu. So era sega ni taleitaka nona tukuna o Pita ni o Jisu e Luve ni Kalou. Ra mani biuti koya kina i valeniveivesu. Era yadravi Pita tiko na sotia me kua ni dro. E rawa beka ni dua e vukei koya?—

A vesu tu na liga i Pita ena sinucodo qai moce toka ena kedrau  maliwa e rua na sotia. Ia e kaya na iVolatabu: ‘Raica! E curu mai na agilosi i Jiova qai rarama mai na loma ni valeniveivesu. E tavia na tabai Pita na agilosi, vakayadrati koya, qai kaya, “Tucake vakatotolo!” ’

E sereki Pita vakacava mai valeniveivesu e dua na agilosi?

E tasere mai na liga i Pita na sinucodo! Qai kaya na agilosi vua: ‘Vakaisulu, vakaivava, muri au mai.’ Rau sega ni tarovi Pita rawa na sotia baleta ni vukei Pita na agilosi. E tu mai liu na matamata kaukamea, ia e qai yaco e dua na ka veivakurabuitaki. E tadola ga vakataki koya na matamata! E sereki Pita na agilosi me rawa kina ni lai tomana nona cakacaka vakavunau.​—Cakacaka 12:3-11.

Era rawa beka ni vukei keda tale ga na agilosi ni Kalou?— Io, e rawa. E kena ibalebale beka oqo nira na sega ni vakalaivi keda meda mavoa?— Sega, era na sega ni tarova meda mavoa kevaka eda sega ni qaqarauni. Kevaka mada ga eda qaqarauni, eda se rawa ga ni mavoa. A sega ga ni tukuni vei ira na agilosi mera taqomaki keda voli ga. Baleta ni solia vei ira na Kalou na cakacaka bibi mera cakava.

E vakaraitaka na iVolatabu ni dua na agilosi e kacivaka tiko vei ira kece na tamata mera sokalou vua na Kalou. (Vakatakila 14:6, 7) E kacivaka vakacava na agilosi oya? E kaila beka mai lomalagi mera rogoca kece na tamata?— Sega, o ira na imuri i Jisu e vuravura era na vakamacalataka tiko na Kalou vei ira tale e so, ia era na liutaki ira tiko ena cakacaka oya na agilosi. Era na vakadeitaka na agilosi mera rogoca na itukutuku o ira na via kila dina na Kalou. E rawa meda vakaitavi ena cakacaka vakavunau oya, nira na vukei keda na agilosi.

Vakacava ke ra vakaleqai keda o ira na sega ni lomana na Kalou? Vakacava ke ra biuti keda i valeniveivesu? Era na sereki keda beka na agilosi?— E rawa. Ia era sega ni dau cakava wasoma.

Na cava e tukuna tiko vei Paula na agilosi?

A kaivesu tale ga na imuri i Jisu o Paula. A vodo tiko ena dua na waqa ena gauna ni draki ca. Ia era sega ni sereki koya na agilosi ena gauna sara ga oya. Baleta nira se tu e so e vinakati mera rogoca na kena  ivakamacala na Kalou. E kaya e dua na agilosi: “Kakua ni rere Paula; o na kau ga kivei Sisa.” Io, e gadrevi me kau o Paula vua na iliuliu kei vuravura o Sisa me rawa kina ni vunau vua. Era kila na agilosi na vanua e tu kina o Paula, ra qai dau vukei koya. Era na vukei keda tale ga kevaka eda qarava dina na Kalou.​—Cakacaka 27:23-25.

E tiko tale e dua na cakacaka levu sa vakarau mera cakava na agilosi. Sa voleka sara na gauna me vakarusai ira kina na tamata ca na Kalou. Era na vakarusai kece kina na sega ni sokalou vua na Kalou dina. Era na qai kila kina na nodra cala o ira na kaya nira sega ni vakabauti ira na agilosi baleta nira sega ni raici ira.​—2 Cesalonaika 1:6-8.

Na cava e kena ibalebale oya vei keda?— Era na vukei keda na agilosi ni Kalou kevaka eda to kei ira. Ia eda sa to tiko li kei ira?​— Io kevaka ga eda qaravi Jiova tiko. Kevaka eda qaravi Jiova tiko, eda na tukuna tale tiko ga vei ira tale e so mera qaravi koya tale ga.

Meda kila tiko se era vakamua vakacava na noda bula na agilosi, wilika na Same 34:7; Maciu 4:11; 18:10; Luke 22:43; kei na Cakacaka 8:​26-31.