Raica sara na lewena

Raica na lewenivola

 WASE 12

Vakavulici Keda ena Masu o Jisu

Vakavulici Keda ena Masu o Jisu

O BAU dau vosa vua na Kalou o Jiova?— E vinakata o koya mo dau vosa vua. Ni o vosa vua na Kalou, oya sara ga na masu. Dau vosa wasoma vei Tamana mai lomalagi o Jisu. So na gauna e dau via tu duadua ena gauna e vosa kina vua na Kalou. Ena dua na gauna, e kaya na iVolatabu ni “cabe taudua ko koya ki na ulu-ni-vanua, me masu; ia ni sa yakavi mai, sa tiko duaduaga kina ko koya.”​—Maciu 14:23.

E vei na vanua o rawa ni masu duadua kina vei Jiova?​— O rawa ni tiko duadua mo vosa vei Jiova ni bera ni o moce ena bogi. E kaya o Jisu: “Ni ko sa masu, curu ki na nomu loqi, ia ni ko sa sogota na kena katuba, masu vua na Tamamu.” (Maciu 6:6) O dau masu vei Jiova e veibogi ni bera ni o moce?— E dodonu mo cakava oya.

E masu o Jisu ni tiko duadua . . . kei na gauna e tu vata kina kei ira e so

 Dau masu tale ga o Jisu ni tu vata kei ira tale e so. Ni mate nona itokani o Lasarusa, a masu vata kei ira tale e so o Jisu ena ibulubulu i Lasarusa. (Joni 11:41, 42) E masu tale ga o Jisu ena gauna e soqoni kina kei ira nona tisaipeli. O dau lako tale ga ina soqoni e dau caka kina na masu?— E dau masu e keri e dua e sa qase. Dau rogoca vinaka na vosa e tauca baleta ni vosa tiko vua na Kalou ena vukumu. Ena qai rawa kina mo tukuna na “Emeni” ni oti na masu. O kila na ibalebale ni “Emeni”?— E kena ibalebale ni o tokona na masu. O duavata kina, o vinakata me nomu masu tale ga oya.

Na cava mo rogoca vinaka kina na masu ena gauna ni soqoni?

E masu tale ga o Jisu ena gauna ni kana. E vakavinavinakataka na kena kakana vei Jiova. O dau masu tale ga ni bera nomu kana?— E vinaka meda vakavinavinakataka vei Jiova na kakana ni bera nida kania. E rawa ni duatani e masu ni dou kana vata e le vica. Ia vakacava ke o kana taudua? Se o kana vata kei ira na sega ni vakavinavinakataka na kedra vei Jiova?— E dodonu mo masu ga o iko.

E dodonu beka me dau rogo ga na nomu masu? Se e rawa ni rogoci iko o Jiova ke o mani masu lo?— Eda kila na isau ni taro oqori mai na ka e yaco vei Niemaia. E dau sokalou vei Jiova o koya ia e cakacaka tiko ena nona vale na Tui Perisia o Atakisekise. E rui rarawa o Niemaia  ena dua na siga baleta ni sa basuki na bai ni koro kei Jerusalemi, na nodra koro na kai nona.

Gauna cava o rawa ni masu lo kina, me vakataki Niemaia?

Ni tarogi Niemaia na tui se cava e rarawataka, e masu lo mada o Niemaia. Oti oya sa qai vakaraitaka o Niemaia vua na tui na vuna e rarawa kina qai kerea tale ga ke rawa ni lako mada i Jerusalemi me lai tara na kena bai. Na cava e qai yaco?—

Io, e rogoca na Kalou na masu i Niemaia. E vakatara na tui me lako! Bau solia vakalevu tale ga na tui na kau me tara kina na bai. O koya gona e rawa ni rogoci keda na Kalou kevaka mada ga eda masu lo.​—Niemaia 1:2, 3; 2:4-8.

Ia vakasamataka mada oqo. E dodonu beka mo cuva sobu ni o masu? E dodonu beka mo tekiduru? Na cava o nanuma?— So na gauna e tekiduru o Jisu ni masu. So na gauna e tucake. So na gauna e  tacake i lomalagi ni masu, me vaka e ena gauna e masulaki Lasarusa kina.

Na cava e vakaraitaka oya?— Ni sega soti ni bibi na noda ivukivuki nida masu. So na gauna e vinaka cake meda cuva sobu da qai bobo. So na gauna o na vinakata mo tekiduru, me vaka e cakava o Jisu. Ia, nanuma toka ni rawa meda masu vua na Kalou ena dua ga na gauna ena siga se bogi, ena rogoci keda o koya. E bibi ga meda vakabauta dina ni dau rogoca noda masu o Jiova. O vakabauta ni rogoca o Jiova na nomu masu?—

Na cava o rawa ni masulaka vua na Kalou?

Na cava meda kaya nida masu vei Jiova?— Tukuna mada vei au: Ni o masu, na cava o dau tukuna vua na Kalou?— E levu na veika vinaka e solia vei keda o Jiova, e dodonu sara ga meda vakavinavinakataka vua, se vakacava?— E rawa nida vakavinavinakataka vua na kakana eda kania. Ia o sa bau vakavinavinakataka vua na macawa karakarawa, na veikau drokadroka, kei na veisenikau totoka?— E bulia tale ga o koya na veika oqori.

Dua na gauna eratou kerei Jisu na nona tisaipeli me vakavulici iratou ena masu. Mani vakavulici iratou na Qasenivuli Levu ena veika bibi me ratou masulaka. O kila se cava na veika bibi oya?​— Taura mada mai nomu iVolatabu qai cega na Maciu wase 6. E volai ena tikina e 9 me yacova na 13 na masu era vakatoka e so me Tama i Keimami se na Masu ni Turaga. Daru wilika mada.

 Daru vulica e keri ni tukuna vei keda o Jisu meda masuta na yaca ni Kalou. E tukuna meda masulaka na kena vakarokorokotaki na yaca ni Kalou. O cei na yaca ni Kalou?— Io, o Jiova. E dodonu meda taleitaka na yaca oqori.

Kena ikarua, e vakavulici keda o Jisu meda masuta me yaco mai na Matanitu ni Kalou. E vinakati vakalevu na Matanitu oqo baleta ena kauta mai na bula veisaututaki e vuravura qai vukica tale ga na vuravura me parataisi.

Kena ikatolu, e kaya na Qasenivuli Levu meda masulaka me caka na loma ni Kalou e vuravura me vaka e caka tiko mai lomalagi. Kevaka eda masulaka oqori, ena dodonu meda cakava na ka e loma ni Kalou meda cakava.

Tarava, e vakavulici keda o Jisu meda kerea na keda kakana ni veisiga yadua. E tukuna tale ga meda kerea na Kalou me vosoti keda nida cakava na veika e sega ni dodonu. Ia ni bera ni vosoti keda, e dodonu meda vosoti ira mada era cakava vei keda na veika e sega ni dodonu. O rawa ni cakava oya?—

E tinia o Jisu ena nona tukuna meda masulaka me taqomaki keda na Kalou o Jiova mai vua na vunica, o Setani na Tevoro. Oya kece na veika vinaka meda masulaka vua na Kalou.

E dodonu meda vakabauta ni dau rogoca noda masu o Jiova. Me ikuri ni noda dau kerei koya me vukei keda, e dodonu meda vakavinavinakataki koya tale ga. E marautaka o koya nida vakabauta sara ga na veika eda masulaka da qai kerea ga na ka e dodonu. Ena solia vei keda na veika oqori. O vakabauta oya?​—

E levu tale na ivakasala vinaka me baleta na masu e kune ena Roma 12:12; 1 Pita 3:12; kei na 1 Joni 5:14.