Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 5

“Oqo na Luvequ”

“Oqo na Luvequ”

NIRA cakava na veika vinaka na gone, era marau o ira na susugi ira. Nira cakava na veika vinaka na luvena tagane se luvena yalewa, e marau o tama ni tukuna: “Oqo na luvequ.”

A dau cakava ga o Jisu na veika e vinakata o Tamana. A marautaki koya o Tamana. O se nanuma tiko na ka e cakava na Tama i Jisu ena siga eratou tu vata kina o Jisu kei na tolu na nona imuri?— Io, e vosa mai lomalagi na Kalou vei iratou: “Oqo na Luvequ daulomani, au sa dau vinakati koya vakalevu.”​—Maciu 17:5, VV.

A marautaka tale ga o Jisu na nona cakava na veika e vinakata o Tamana. O kila na vuna? Baleta ni lomani Tamana dina. Ke dua e cakava na ka baleta ni dodonu ga me cakava, e rawa ni tarabi vua na cakacaka oya. Ena rawarawa cake vua ke cakava ena marau. O kila na ibalebale ni cakava na ka ena marau?— E kena ibalebale mo vinakata sara ga mo cakava na ka oya.

Ni bera mada ga ni lako mai i vuravura o Jisu, e dau marautaka me cakava na ka kece e vinakata o Tamana me cakava. Oqo e baleta ni lomani Tamana, na Kalou o Jiova. E totoka dina na vanua erau tiko kina o Jisu kei Tamana mai lomalagi. Ia a vinakata na Kalou me cakava o Jisu e dua na cakacaka bibi. E vinakati kina me biuti lomalagi o Jisu. A gadrevi me mai sucu me vaka na gone dramidrami e vuravura. E marau o Jisu me cakava na veika oya baleta ni vinakata o Jiova me cakava.

Na cava e tukuna vei Meri na agilosi o Keperieli?

A vinakati me dua na tina i Jisu me qai rawa kina ni sucu e vuravura. O kila se o cei na tina i Jisu?— E yacana o Meri. E tala mai o Jiova na nona agilosi o Keperieli me mai vosa vei Meri. Tukuna o Keperieli vei Meri ni na dua na luvena tagane. Ena yaca ni gone oqo o Jisu. O cei ena tama ni gone oqo?— E kaya na agilosi ni Tama ni gone oqo na Kalou o  Jiova. Oya na vuna ena vakatokai kina o Jisu me Luve ni Kalou.

E ciqoma vakacava o Meri na itukutuku oya?— E kaya beka, “Au sega ni vinakata meu tina i Jisu”? Sega, e tu vakarau o Meri me cakava na ka e vinakata na Kalou. Ia, e rawa vakacava me mai sucu me vaka na gone e vuravura na Luve ni Kalou mai lomalagi? E duidui vakacava na sucu nei Jisu mai na nodra sucu na gone kece? O kila?—

Na Kalou a buli rau na noda itubutubu taumada o Atama kei Ivi me rawa ni rau dau tiko vata. Oti oya sa na qai tubu tiko na gone ena kete i tinana. E levu era kaya ni oqo e cakacaka veivakurabuitaki! Au kila ni o vakadinata tale ga oya.

Ia e qai cakava na Kalou e dua na ka e kurabuitaki vakalevu sara. E tokia na bula i Luvena mai lomalagi qai biuta ina kete i Meri. A se sega ni cakava na ka oya na Kalou ena gauna e liu, e sega tale ga ni qai cakava tale. Ni yaco na ka veivakurabuitaki oya, sa tekivu tubu sara o Jisu ena kete i Meri me vaka ga na nodra tubu na gone kece ena kete i tinadra. Oti oya, rau sa qai vakawati o Meri kei Josefa.

Rau tiko mai na korolevu o Peceliema o Meri kei Josefa ena gauna e sucu kina o Jisu. E oso sara tu ga na koro. Sega mada ga na vanua me rau vakaicili kina o Meri kei Josefa, rau sa mani tiko ga ena vanua e dau maroroi kina na manumanu. Mani vakasucu e kea o Meri, qai vakotori o Jisu ena ikanakana ni manumanu, me vaka o raica e ke. Na ikanakana oqo e dau tawa kina na kedra na bulumakau kei na so tale na manumanu.

Na cava a vakotori kina ena ikanakana ni manumanu o Jisu?

 E yaco e vica na ka lelevu ena bogi e sucu kina o Jisu. E rairai e dua na agilosi vei iratou e so na ivakatawanisipi volekati Jerusalemi. E tukuna vei iratou ni o Jisu e tamata rogo. E kaya na agilosi: ‘Raica! Au tukuna vei kemudou e dua na itukutuku vinaka ena vakamarautaki ira na tamata. E sucu nikua e dua ena vakabulai ira na tamata.’​—Luke 2:10, 11.

Na itukutuku vinaka cava e tukuna e dua na agilosi oqo vei iratou na ivakatawanisipi?

E tukuna na agilosi vei iratou na ivakatawanisipi ni ratou na kunei Jisu e Peceliema, ni davo no ena ikanakana ni manumanu. Vakasauri nodra tomani koya na agilosi oya e so tale na agilosi mai lomalagi mera vakavinavinakataka na Kalou. ‘Me vakarokorokotaki na Kalou,’ era lagata na agilosi, “sa veivinakati rawa ko ira e vuravura.”​—Luke 2:12-14.

 Nira sa gole na agilosi, eratou lako sara na ivakatawanisipi i Peceliema ratou qai kunei Jisu. Eratou tukuna sara vei Josefa kei Meri na veika vinaka eratou rogoca. O rawa ni vakasamataka na marau nei Meri ni a vakadonuya me tina i Jisu?

Ni oti e dua na gauna, rau qai kauti Jisu ina korolevu o Nasareci o Josefa kei Meri. Oya na vanua e tubucake kina o Jisu. Ni sa uabula, sa qai tekivu vakayacora na nona cakacaka vakaitamera ni veivakavulici. Oqo e dua na iwase ni cakacaka a vinakata na Kalou o Jiova me mai cakava o Luvena e vuravura. E marau ni vakayacora na cakacaka oqo o Jisu baleta ni lomani Tamana vakalomalagi vakalevu.

 Ni bera ni tekivu cakava o Jisu na cakacaka ni Qasenivuli Levu, a papitaisotaki koya mada o Joni na Dauveipapitaisotaki ena uciwai na Joritani. E yaco kina e dua na ka veivakurabuitaki! Ni lamata mai na wai o Jisu, e kaya o Jiova ni vosa mai lomalagi: “Oqo na noqu Gone ni Toko, au sa dau vinakata vakalevu.” (Maciu 3:​17, VV) O sega li ni marau ni rau tukuna vei iko na nomu itubutubu ni rau lomani iko?— E marau tale ga o Jisu.

E dau cakava ga o Jisu na veika dodonu. E sega ni via vakatauvatani koya kei na dua erau sega ni tautauvata. E sega ni tukuna vei ira na tamata ni Kalou o koya. Sa tukuna oti na agilosi o Keperieli vei Meri ni na vakatokai o Jisu me Luve ni Kalou. O Jisu sara mada ga e tukuna ni o koya e Luve ni Kalou. E sega tale ga ni tukuna ni levu cake na ka e kila mai vei Tamana. E kaya ga: “Sa uasivi cake vei au ko Tamaqu.”​—Joni 14:28.

Ni tiko mada ga mai lomalagi, e cakava kece na cakacaka e solia vua na tamana me cakava. E sega ni tukuna ni na cakava ia e qai lai cakava tale e dua na ka. E lomani Tamana dina. Oya na vuna e dau rogoci Tamana kina. Ni lako gona mai i vuravura, e cakava sara ga na ka e tukuna o Tamana me mai cakava. E sega ni vakayagataka na nona gauna ena duatani na ka. Sa rauta me marautaki Luvena o Jiova!

Eda via vakamarautaki Jiova tale ga, se vakaevei?— E dodonu gona meda vakaraitaka nida via vakarorogo dina vua na Kalou, me vakataki Jisu. E vosa vei keda na Kalou ena iVolatabu. E sega ni dodonu meda kaya nida rogoca tiko na Kalou ia da qai vakabauta se cakava na veika e veicalati kei na iVolatabu, se vakaevei?— Nanuma, eda na marau ena noda vakamarautaki Jiova kevaka ga eda lomani koya.

Wilika na veitikinivolatabu oqo e vakaraitaka na ka e dodonu meda kila se vakabauta me baleti Jisu: Maciu 7:21-23; Joni 4:25, 26; kei na 1 Timoci 2:5, 6.