Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 35

Rawa Meda Bula Mai na Mate!

Rawa Meda Bula Mai na Mate!

KEVAKA eda mate, ena vinakata beka na Kalou me vakaturi keda meda bula tale?— E vakabauta na tamata vinaka o Jope ni vinakata na Kalou. Ni vakila ni sa vakarau mate, e kaya o Jope vua na Kalou: “Ko ni na kaci mai, ka’u na rogo yani vei kemuni.” E kaya o Jope ni vinakata dina na Kalou o Jiova me vakaturi koya mai na mate.​—Jope 14:14, 15.

O Jisu e vakataki Tamana sara ga na Kalou o Jiova. E vinakata o Jisu me vukei keda. Ni tukuna vua e dua na tagane tauvi vukavuka, “kevaka ko ni sa vinakata, ko ni sa vakasavasavataki au rawa,” e sauma o Jisu: “Au sa vinakata.” Mani vakabula na tamata oya mai na vukavuka.​—Marika 1:40-42.

E vakaraitaka vakacava o Jiova ni lomani ira na gone?

E vulica o Jisu vei Tamana me dau lomani ira na gone. Vakarua ena gauna makawa, e vakayagataki rau kina o Jiova na nona dauveiqaravi me rau vakaturi rau mai na mate e rua na gone. A kerei Jiova o Ilaija me vakatura na luvena  tagane e dua na marama e dau vukei koya. E cakava vaka kina o Jiova. E vakayagataki Ilaisa tale ga o Jiova me vakatura e dua na gonetagane lailai.​—1 Tui 17:17-24; 2 Tui 4:32-37.

Eda sega beka ni marau ni vaka sara ga oya na nona lomani keda o Jiova?— E sega ni nanumi keda ga nida bula tiko. E nanumi keda tale ga nida sa mate. E kaya o Jisu ni o Tamana e raici ira tale ga na nona tamata era sa mate me vaka era bula tiko! (Luke 20:38) E kaya na iVolatabu ni ‘sega ni rawata na mate, se na bula, se na veika sa yaco edaidai, se na veika ena yaco e muri me tawasei keda mai na loloma ni Kalou.’​—Roma 8:38, 39.

E vakaraitaka o Jisu ena nona bula voli e vuravura ni dau kauaitaki ira na gonelalai o Jiova. De dua o se nanuma tiko ni dau vagalalataki koya o Jisu me talanoataka na Kalou vei ira na gone. Ia o kila tale ga ni a solia na Kalou vei Jisu na kaukaua me rawa ni vakaturi ira na gone mai na mate?— Daru veitalanoataka mada nona vakatura o Jisu na luve i Jairo goneyalewa yabaki 12.

A vakaitikotiko o Jairo, o watina, kei na luvena duadua oqo volekata na Wasawasa o Kalili. Dua na siga e tauvimate bibi sara na luvena goneyalewa, qai vakila o Jairo ni sa na rairai mate. E vakasamataki Jisu sara o koya, na tamata rogo e dauveivakabulai. E gole sara o Jairo me lai vaqarai koya. A kunei Jisu ena baravi ni Wasawasa o Kalili ni veivakavulici tiko.

E sugulaki koya yani o Jairo qai lai cuva ena yava i Jisu. E kaya vei Jisu: ‘E tauvimate bibi sara tiko na luvequ goneyalewa lailai. E rawa mo ni vukei koya? Au masuti kemuni mo ni lai raici koya mada.’ Rau mani lako vata sara kei Jairo o Jisu. Era muri Jisu tale ga na ilala levu era mai raica na Qasenivuli Levu. Nira se lako tiko ga, sa ratou lako mai e so na tagane mai na vale i Jairo ratou qai tukuna vua: “Sa mate na luvemu; kakua ni vakaoga tale na i Vakavuvuli.”

 E rogoca tale ga o Jisu na vosa oya. E vakila na levu ni rarawa i Jairo ni sa yali na luvena duadua. Mani tukuna vua o Jisu: ‘Kua ni yalolailai. Vakabauta ga na Kalou, ena qai vakabulai ga na luvemu.’ Era tomana na nodra ilakolako me yacova nira yaco ina vale i Jairo. Era sa tagi toka na wekadratou. Era rarawataka na nona sa takali na nodra itokani lailai. Ia e tukuna vei ira o Jisu: ‘Ni kua ni tagi. E sega ni mate o koya, e moce ga.’

Era dredrevaka na ka e tukuna o Jisu baleta nira kila ni sa leqa na goneyalewa. Na cava e kaya kina o Jisu ni moce toka ga?— Na cava beka e via vakavulici ira kina?— E vinakata mera kila ni mate e vaka ga na moce lutu. E via vakaraitaka ni nona vakayagataka na kaukaua ni Kalou ena rawarawa sara ni vakabulai ira na mate me vaka ga na kena rawarawa na nona vakayadrati e dua e moce tu.

Na cava eda vulica mai na nona vakaturi luve i Jairo o Jisu?

E vakatalai ira kece i tuba na tamata o Jisu, qai vakavo ga na yapositolo o Pita, Jemesa, kei Joni kei rau na itubutubu ni gone. E curu sara ina vanua e davo tiko kina na gone. E taura na ligana qai kaya vua: ‘Goneyalewa lailai, tucake mai!’ E tucake mai o goneyalewa, ka veilakoyaki sara! Sa duatani na nodrau marau o  tamana kei tinana.​—Marika 5:21-24, 35-43, VV; Luke 8:40-42, 49-56.

Vakasamataka mada. Ni rawa vei Jisu me vakatura na goneyalewa lailai oya mai na mate, e rawa li me cakava tale ga vei ira tale e so?— O vakabauta ni rawa ni cakava dina?— Io, ena cakava dina. E kaya sara ga o Jisu: ‘Sa lako tiko mai na gauna era na rogoca kina na domoqu o ira kece era tu ena ibulubulu, era na lako cake mai kina.’​—Joni 5:28, 29.

O vakabauta ni via vakaturi ira na tamata o Jisu?— Me sauma na taro oqori daru raica mada e dua tale na ivakaraitaki ena iVolatabu. Na ka e yaco volekata na koro o Neini ena dua na siga e vakaraitaka se e raica vakacava o Jisu na nodra rarawa na tiko ena veibulu.

E tomani ira mai na ilakolako ni veibulu i luvena e dua na marama. E se qai leqa ga o watina, ia oqo sa mate tale ga na luvena duadua. E rarawa dina! Era tomani koya mai e levu na lewe ni koro o Neini ni colati tiko mai na yago i luvena ena ibili ni koro. Ena levu ni tagi ni marama oqo era sega ni vakacegui koya rawa na lewenikoro.

Ena siga oya eratou gole tiko yani ina koro o Neini o Jisu kei na nona tisaipeli. Eratou sota kei na ilakolako ni veibulu volekata na matamata ni koro. E lomani koya dina na marama e tagi tiko mai oya o Jisu. E tarai Jisu na levu ni nona rarawa na marama oya. E vinakata sara ga me vukei koya.

E kaya vakayalololoma qai vakadodonu vua na marama oya: “Kakua ni tagi.” Era vagagalu kece na tamata ra qai vakaraici Jisu matua. Ni toro volekata yani na tavata, era via kila se cava ena cakava o Jisu. E vakarota o Jisu: “I cauravou, au sa kaya vei iko, duri mai!” Ena gauna vata oya sa dabe na cauravou! E tekivu vosa sara.​—Luke 7:11-17, VV.

 Vakasamataka mada na marau ni marama oya! Na cava o na cakava ke bula tale mai e dua na wekamu sa mate?— E sega beka ni vakaraitaka na ka e cakava o Jisu oya ni lomani ira dina na tamata qai vinakata me vukei ira?— Vakasamataka mada na noda marau ena vuravura vou nida kidavaki ira na vakaturi mai!​—2 Pita 3:13; Vakatakila 21:3, 4.

Na cava e vakaraitaka na vakaturi ni luvena duadua na marama oqo?

Eda na veikilai kei ira na so era vakaturi mai oqo, okati kina na gone. Eda na kilai ira me vaka ga nona kilai luvena o Jairo ni vakaturi koya o Jisu. E so tale vei ira na vakaturi mai era a mate ena vica vata na drau se udolu na yabaki sa oti. Ia ena sega ni guilecavi ira na Kalou dina ga ni sa dede na gauna era mate kina.

Eda sega li ni marautaka ni vaka sara ga oya na nodrau lomani keda na Kalou o Jiova kei Luvena o Jisu?— Rau vinakata meda bula tawamudu, sega ni bula ga ena vica na yabaki!

Wilika mada na Aisea 25:8; Cakacaka 24:15; kei na 1 Korinica 15:20-22 mo raica kina na inuinui totoka e yalataki tu ena iVolatabu me baleti ira na sa mate.