A VAKATIKORI Atama kei Ivi ena were o Iteni na Kalou. Dina ga ni rau talaidredre rau qai mate, ia na Kalou e dolava tu vei ira na luvedrau, okati kina o keda nikua, meda bula tawamudu e vuravura. E yalataka na iVolatabu: “Era na taukena na vanua ko ira na yalododonu, ka tiko kina ka sega ni mudu.”​—Same 37:29.

E tukuni ena iVolatabu na “lomalagi vou” kei na “vuravura vou.” (Aisea 65:17; 2 Pita 3:13) E “lomalagi” ni gauna oqo o ira na matanitu ni tamata era veiliutaki tiko, ia na “lomalagi vou” o Jisu Karisito kei ira na veiliutaki kei koya mai lomalagi. Ena totoka vakaoti na gauna ena liutaka kina na vuravura taucoko na lomalagi vou oqo, se na Matanitu ni Kalou.

Ia na cava na “vuravura vou”?— Na vuravura vou e vakaibalebaletaki ira na tamata vinaka era lomani Jiova. Ni dau tukuni ena iVolatabu “na vuravura,” e dau so na gauna e kena ibalebale o ira na tamata era tiko e vuravura, e sega ni vakaibalebaletaki ga ina vuravura qele. (Vakatekivu 11:1; Same 66:4; 96:1) O ira na tamata era okati mera vuravura vou era na bula sara ga ena vuravura oqo.

Sa na sega kina na vuravura ni gauna oqo, se o ira na tamata ca. Nanuma tiko ni a vakarusa nodra vuravura na tamata ca na Waluvu ena gauna i Noa. Daru sa vulica tale ga ni vuravura ca nikua ena vakarusai ena Amaketoni. Daru raica mada se ena vakacava na bula ena vuravura vou ni Kalou ni sa oti na Amaketoni.

 O na via bula tawamudu ena vakacegu ena Parataisi ena vuravura vou ni Kalou?— Era sega ni rawata na vuniwai mera vakabulai keda me tawamudu. E sega ni dua na wainimate e rawa ni tarova na noda mate. Eda na rawa ga ni bula tawamudu kevaka eda toro volekata na Kalou. E vakaraitaka vei keda na Qasenivuli Levu na ka meda cakava.

Daru cega mada na nodaru iVolatabu ena Joni wase 17, tikina e 3. Daru na wilika kina na nona vosa na Qasenivuli Levu: “Sai koya oqo na bula tawa mudu, me ra kilai kemuni na Kalou dina duaduaga, kei Jisu Karisito ko koya ko ni a tala mai.”

Na cava e tukuna o Jisu e dodonu meda cakava meda qai rawa ni bula tawamudu?— Meda veikilai taumada kei na Tamada vakalomalagi o Jiova, vaka kina na Luvena, na noda ivakabula. E kena ibalebale oqo meda vulica na iVolatabu. E vukei keda na ivola oqo, Vuli Vua na Qasenivuli Levu.

Ia ena vukei keda vakacava meda bula tawamudu na noda vulici Jiova?— Me vaka ga nida gadreva na kakana e veisiga meda bula kina, e bibi tale ga meda vulica e veisiga na veika e baleti Jiova. E kaya na iVolatabu: ‘Ena sega ni bula na tamata e na madrai duaduaga, ena bula ga e na vosa kece ga e lako mai ena gusu i Jiova.’​—Maciu 4:4.

E dodonu tale ga meda kilai Jisu Karisito baleta ni talai koya mai na Kalou me mai bokoca na noda ivalavala ca. E kaya na iVolatabu: “Sa sega na bula e na vukuna e dua tani.” E kaya tale ga na iVolatabu: “O koya sa vakabauta na Luvena, sa rawata na bula tawa mudu.” (Cakacaka 4:12; Joni 3:36) Eda vakabauti Jisu dina da qai kila tale ga nida na sega ni rawata na bula ke sega o koya?— Ke da vakabauta na veika oqori, eda na tomana tiko ga e veisiga na noda vuli vua na Qasenivuli Levu, da qai talairawarawa vua.

E dua na sala eda rawa ni vuli kina vua na Qasenivuli Levu oya na noda wilika wasoma na ivola oqo da qai vakasamataka na kena  iyaloyalo. Tovolea mo sauma mada na taro era tiko ena ivakamacala ni veiyaloyalo era toka oqori. Drau wilika vata kei tinamu se tamamu na ivola oqo. Ke drau sega ni wilika vata kei rau na nomu itubutubu, wilika vata kei na dua na uabula kei ira e so tale na gone. Ena sega beka ni uasivi ke o rawa ni vukei ira tale e so mera vulica vua na Qasenivuli Levu na veika e dodonu mera cakava mera rawata kina na bula tawamudu ena vuravura vou ni Kalou?—

E tukuna vei keda na iVolatabu: “Sa takali tiko yani na vuravura.” Ia e vakamacalataka na iVolatabu na ka meda cakava meda bula tawamudu rawa kina ena vuravura vou ni Kalou. E kaya: “Ko koya ga sa vakayacora na loma ni Kalou sa tu dei ka tawa mudu.” (1 Joni 2:17, VV) O koya gona, eda na rawata vakacava na bula tawamudu ena vuravura vou ni Kalou?— Io, nida vulici Jiova kei na Luvena lomani, o Jisu. Ia e vinakati tale ga meda bulataka na veika eda vulica. Me vukei iko mada ga na nomu vulica na ivola oqo mo cakava na veika oqori.