Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 27

O Cei na Nomu Kalou?

O Cei na Nomu Kalou?

NA CAVA e bibi kina me tarogi na taro, O cei na nomu Kalou?— Baleta ni sokaloutaki tiko e levu na kalou. (1 Korinica 8:5) Ni vakabula e dua na tagane e se sega ni lako vakadua na yapositolo o Paula ena kaukaua i Jiova, era kailavaka na tu e kea: “Era sa rairai mai vakatamata vei keda na kalou!” Era vinakata sara ga mera sokalou vei Paula kei na nona itokani o Panapasa. Era kacivi Paula me o Eremesi kei Panapasa me o Seusi, na yacadrau e rua na kalou lasu.

Ia rau sega ni vakatara o Paula kei Panapasa mera sokalou vei rau. Rau cici vei ira na tu e kea rau qai kaya: “Ni saumaki tani mai na veika oqo sa sega ni yaga, kivei koya na Kalou bula.” (Cakacaka 14:8-15) O cei “na Kalou bula,” e bulia na veika kece?— Io, o Jiova, “sa Cecere sara duaduaga e vuravura taucoko.” O Jisu e vakatokai Jiova me “Kalou dina duaduaga.” O cei gona e dodonu me sokaloutaki duadua ga?— O Jiova!​—Same 83:18; Joni 17:3; Vakatakila 4:11.

Na cava rau sega ni vakatara kina o Paula kei Panapasa mera cuva sobu vei rau na tamata?

E levu ga na tamata era sokalou vei ira na veikalou tale e so, era sega ni sokalou vua na “Kalou dina duaduaga.” Era sokalou ina veika e buli mai na kau, vatu, koula, se kaukamea. (Lako Yani 32:3-7; Vunau ni Soro 26:1; Aisea 44:14-17) So na gauna e so na tagane se yalewa rogo era rokovi me vaka nira kalou. E dodonu beka meda rokovi ira?—

E vola o Saula ni sa veisau me yapositolo o Paula: ‘Na kalou ni vuravura oqo e vakamatabokotaka na lomadra o ira na sega ni vakabauta.’ (2 Korinica 4:4) O cei na kalou oqo?— Io, o Setani na Tevoro! E vakavuna o Setani me le levu era sokalou vei ira na tamata kei na veika tale e so.

 Ni saga o Setani me cuva sobu o Jisu me sokalou vua, na cava e tukuna vei Setani o Jisu?— “Mo vakarokoroko vei Jiova na nomu Kalou, ia mo qaravi koya duaduaga.” (Maciu 4:10) E vakamatatataka o Jisu ni dodonu ga me sokaloutaki o Jiova. Daru wilika mada na kedratou ivakamacala e so na cauravou era kila vinaka tu oqo. Na yacadratou o Setareki, Mesaki, kei Apetiniko.

Eratou lewe ni matanitu ni Kalou o Isireli o iratou na cauravou Jiu oqo. Eratou a kau vakavesu ina vanua o Papiloni. E vakaduria e dua na matakau vakaitamera e caka mai na koula na tui ni vanua oya, o Nepukanesa. Dua na siga e vakarota o koya mera cuva na tamata kece ina matakau nira rogoca na ivakatagi. E kaya: ‘O koya e sega ni cuva sobu me vakarokoroko ena biu ena lovo bukawaqa.’ Na cava o na cakava?—

Na cava eratou sega ni cuva sobu kina vua na matakau na le tolu oqo?

 Eratou dau talairawarawa ina veika e vakarota na tui o Setareki, Mesaki, kei Apetiniko. Ia eratou bese ni cuva sobu. O kila na vuna?— Baleta ni kaya na lawa ni Kalou: ‘Mo kua ni qarava e dua na kalou tani, mo qaravi au duadua ga. Mo kua ni bulia e dua na matakau mo qai cuva sobu vua.’ (Lako Yani 20:3-5) Eratou talairawarawa ina lawa i Jiova o Setareki, Mesaki, kei Apetiniko, sega ina nona ivakaro na tui.

E cudru vakalevu na tui, e mani vakarota me ratou kau mai vua na tolu na cauravou Jiu oya. E taroga: ‘E dina ni dou sega ni qarava na noqu kalou? Au na solia tale vei kemudou e dua na gauna. Ni dou rogoca ga na ivakatagi, dou cuva sobu mo dou vakarokoroko ina matakau au vakaduria. Ke sega, dou na biu ina lovo bukawaqa. O cei na kalou ena rawa ni vakabulai kemudou mai na ligaqu?’

Na cava beka eratou na cakava na cauravou? Na cava o na cakava?— Eratou kaya vua na tui: ‘E rawa ni vakabulai keitou na neitou Kalou. Ke mani sega, keitou na sega ga ni qarava na nomu kalou. Keitou na sega ni cuva sobu ina nomu matakau koula.’

Sa qai kaukaua ga na nona cudru na tui. E vakarota: ‘Ni vakavitutaka na katakata ni lovo!’ E vakaroti ira na nona tamata kaukaua mera vesuki Setareki, Mesaki, kei Apetiniko ra qai kolotaki  iratou ina lovo bukawaqa! Era mate ena yameyame ni buka na nona tamata oya na tui baleta ni sa rui katakata vakasivia na lovo! Ia vakacava o iratou na tolu na Jiu?

Eratou lutu sara ga ena lomadonu ni lovo bukawaqa o Setareki, Mesaki, kei Apetiniko. Ia eratou tucake mai! Eratou sega ni mavoa. Eratou sa sega tale tu ga ni vesuki. E yaco vakacava oqo?— E rai sobu ina lovo na tui, e rerevaka na ka e raica. ‘Eda sega beka ni kolotaki iratou e lewe tolu ina buka?’ e taroga. Era sauma na nona dauveiqaravi: ‘E vaka kina, o kemuni na tui.’

E vakabulai iratou vakacava na nona tamata mai na lovo bukawaqa o Jiova?

E kaya na tui: ‘Raica! Au raici iratou e le va eratou veilakoyaki voli e ra, e sega ni bau yameci iratou na buka.’ O kila se o cei e kedratou ikava?— Na agilosi i Jiova. E taqomaki iratou na tolu na Jiu me ratou kua ni kama.

Ni raica na ka oya na tui, e dolava na isogo ni lovo qai kacivaka: ‘Setareki, Mesaki, kei Apetiniko, o kemudou na tamata ni Kalou Cecere Duadua, dou curu mai tuba!’ Ni ratou curu mai, era raica kece na tu e kea ni sega ni bau kama na yagodratou. Eratou sega mada ga ni boiboi  kubou. E qai kaya na tui: ‘Me vakacaucautaki na Kalou i Setareki, Mesaki, kei Apetiniko, ni tala mai na nona agilosi me vakabulai iratou na nona tamata eratou sega ni qarava e dua tani na kalou, ia eratou qarava ga na nodratou Kalou.’—Taniela, wase 3.

Na ivakatakarakara cava soti era qarava se vakarokorokotaka na tamata nikua?

Na cava eda vulica mai na ka e yaco oya? Era bulia tale ga na tamata ena gauna oqo na ivakatakarakara e so me qaravi se vakarokorokotaki. E kaya na ivola na Encyclopedia Americana: “Me vaka na kauveilatai, e rokovi tale ga na kuila.” E buli na ivakatakarakara mai na kau, vatu, kaukamea, se isulu. Era sega ni sokalou vua na empara ni Roma o ira na tisaipeli taumada i Jisu, na ka e vakatauvatana na dauvolaitukutuku makawa o Daniel P. Mannix ina “kena sega ni vakarokorokotaki na kuila se vakadamurimuri ni vosa ni bubului ina matanitu.”

E bau dua beka na kena duidui vua na Kalou ke caka e dua na ivakatakarakara vakalotu mai na isulu, kau, vatu, se kaukamea?— E dodonu beka me sokalou na dauveiqaravi ni Kalou ina ivakatakarakara vaka oya?— Eratou sega ni cakava vaka kina o Setareki, Mesaki, kei Apetiniko. E marautaki iratou o Jiova. E rawa vakacava mo vakatotomuria na nodratou ivakaraitaki?—

O ira na sokaloutaki Jiova e sega ni rawa nira sokaloutaka e dua tale na ka se tamata. Wilika na kena ivakamacala ena Josua 24:14, 15, 19-22; Aisea 42:8; 1 Joni 5:21; kei na Vakatakila 19:10.