Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 36

O Cei ena Vakaturi? Era na Bula e Vei?

O Cei ena Vakaturi? Era na Bula e Vei?

ERATOU le vica na vakaturi daru wilika ena rua na wase sa oti?— Eratou le lima. Eratou le vica na gone?— Tolu. Na kena ikava e cauravou. Na cava o nanuma e vakaraitaka oqo?—

E vakaraitaka ni kauaitaki ira na gone na Kalou. Ia ena vakaturi ira tale ga e lewe vuqa. Ena vakaturi ira beka ga na cakava na veika vinaka na Kalou?— De eda vakabauta vaka kina. Ia e levu na tamata era se sega ni bau vulica na veika dina me baleta na Kalou o Jiova kei Luvena. Era cakava na veika e sega ni dodonu baleta ni cala na ka era vakavulici kina. O vakabauta ena vakaturi ira na tamata vaka oqo o Jiova?—

E kaya na iVolatabu: “Ni ra na tu cake tale mai na mate ko ira na yalododonu kei ira na sega ni yalododonu.” (Cakacaka 24:15, VV) Na cava era na vakaturi kina o ira na sega ni yalododonu, se o ira na sega ni cakava na veika dodonu?— Baleta nira se sega ni bau vulici Jiova kei na veika e vinakata meda cakava na tamata.

Na cava ena vakaturi ira kina na Kalou e so era sega ni cakava na veika dodonu?

 Ena gauna cava o nanuma ena yaco kina na vakaturi?— Vakasamataka na gauna e mate kina o Lasarusa kei na nona yalataka o Jisu vei Marica: “E na tu cake tale na ganemu.” E sauma o Marica: “Au sa kila ni na tu cake tale ko koya e na i otioti ni siga.” (Joni 11:23, 24, VV) Na cava e vakasamataka tiko o Marica ni kaya ni na tucake o Lasarusa “e na i otioti ni siga”?—

E tiko e vei na Parataisi e tukuna o Jisu vua na tamata oqo?

A rogoca o Marica ni a yalataka o Jisu: ‘O ira kece na tu ena ibulubulu era nanumi, era na lako cake mai kina.’ (Joni 5:28, 29) O koya gona era na vakaturi mera bula tale ena “i otioti ni siga” o ira e nanumi ira na Kalou. Na iotioti ni siga oqo e sega ni siga e 24 na aua. Na kena dede ena duanaudolu na yabaki. E kaya na iVolatabu ni siga oqo ‘ena lewai ira kina na lewe i vuravura’ na Kalou. O ira na lewai oqo era okati kina o ira na vakaturi.​—Cakacaka 17:31; 2 Pita 3:8.

Sa na dua dina na siga totoka oqo! Ena siga e duanaudolu na yabaki na kena dede oqo, era na vakaturi kina e vica vata na milioni na tamata era sa mate. O Jisu e vakatoka na vanua era na mai bula kina oqo me Parataisi. Daru raica mada se tiko e vei na Parataisi, kei na bula vakacava ena vakilai kina.

Rauta ni vo e tolu na aua ni bera ni mate ena kau ni rarawa, a vakamacalataka o Jisu na Parataisi vua e dua rau lili veivolekati toka. E vakarau vakamatei tiko na tamata oya ena vuku ni nona dau basulawa. Ni raici Jisu toka qai rogoca na veika e tukuni me  baleti koya, e tini vakabauti Jisu sara na tamata ca oya. E mani kaya kina: “Ni nanumi au ni ko ni sa lako yani ki na nomuni matanitu.” E sauma o Jisu: ‘Au kaya vakaidina vei iko edaidai, daru na tiko vata mai Parataisi.’​—Luke 23:42, 43.

Nida wilika na ivakamacala ni Parataisi, na cava meda raitayaloyalotaka?

Na cava na ibalebale ni vosa i Jisu oya? E tiko e vei na Parataisi?— Vakasamataka mada. A tiko e vei na imatai ni Parataisi?— A solia na Kalou vua na imatai ni tagane, o Atama, kei watina e dua na parataisi me rau bula kina e vuravura. A vakatokai me were o Iteni. Era tu kina na manumanu, ia era sega ni veivakamavoataki. E levu kina na kau kei na vuanikau, qai tu tale ga kina e dua na uciwai levu. E vanua totoka dina!​—Vakatekivu 2:8-10.

Nida wilika gona ni na tiko e Parataisi na daubasulawa oya, meda vakasamataka tiko na kena veisautaki na vuravura oqo me dua na vanua totoka meda bula kina. Ena tiko beka o Jisu ena Parataisi e vuravura kei na daubasulawa oya?— Sega. O kila na vuna?—

O Jisu ena veiliutaki vakatui mai lomalagi me lewa na Parataisi e vuravura. Nona tiko vata kei na tamata oya o Jisu e vakaibalebaletaki ina nona vakaturi koya mai na mate qai solia vua na ka e vinakata. Ia na cava e vakatara kina o Jisu me lai bula ena Parataisi e dua a dau basulawa?— Daru raica mada se yaco vakacava oya.

Ni bera ni vosa vei Jisu na daubasulawa oya, sa bau kila beka o  koya se cava e inaki ni Kalou?— Sega, e sega ni kila. A dau cakava na ka ca baleta ni se sega ni kila na veika dina me baleta na Kalou. Ena qai lai vakavulici ena inaki ni Kalou e Parataisi. Me qai rawa kina vua me vakadinadinataka se e lomana dina na Kalou me cakava na Lomana se sega.

Era na bula kece beka ena Parataisi e vuravura o ira na vakaturi?— Sega. O kila na vuna?— Baleta ni so era na vakaturi mera lai bula vata kei Jisu mai lomalagi. Era na tomani Jisu mera veiliutaki vakatui mera lewa na Parataisi e vuravura. Daru raica mada se eda kila vakacava oqo.

Ena bogi ni bera ni mate o Jisu, e tukuna vei iratou na nona yapositolo: ‘E levu na tikina ena vale nei Tamaqu mai lomalagi, au sa lako meu lai vakarautaka e dua na tikina me nomudou.’ E qai yalataka vei iratou o Jisu: “Au na lako tale mai, ka kauti kemudou vei au; mo dou tiko talega e na vanua ka’u sa tiko kina.”​—Joni 14:2, 3.

A lako e vei o Jisu ni vakaturi oti?— Io, e lesu i lomalagi vei Tamana.  (Joni 17:4, 5) E yalataka gona o Jisu vei iratou na nona yapositolo kei ira na so tale na nona imuri ni na vakaturi ira mera lako tale ga vua i lomalagi. Na cava era na lai cakava vata kei Jisu?— E kaya na iVolatabu ni o ira na nona tisaipeli era vakaturi “e na i matai ni tu cake tale mai na mate” era na lai bula i lomalagi mera “lewa vata kei koya me dua na udolu na yabaki.”​—Vakatakila 5:10; 20:6, VV; 2 Timoci 2:12.

Era lewe vica era na vakaturi ena “i matai ni tu cake tale” mera lai tui vata kei Jisu?— E tukuna vei ira na nona tisaipeli o Jisu: “Kakua ni rere, na qele-ni-sipi lailai; ni sa vinakata sara na Tamamudou me solia vei kemudou na matanitu.” (Luke 12:32) Na ‘qelenisipi lailai’ era vakaturi mera lai tiko kei Jisu ena Matanitu vakalomalagi, e yalani ga na kedra iwiliwili. Vakaraitaka na iVolatabu nira “dua na drau ka vasagavulu ka va na udolu” era na vakaturi mai vuravura.​—Vakatakila 14:1, 3.

Era na bula e vei o ira na vakaturi, na cava era na cakava?

Era lewe vica era na bula ena Parataisi e vuravura?— E sega ni vakaraitaka na iVolatabu na kedra iwiliwili. A tukuna ga na Kalou vei Atama kei Ivi ena were o Iteni me rau vakatawai vuravura. Rau mani sega ni cakava rawa oya. Ia ena raica na Kalou me na vakayacori na nona inaki me baleta na kena vakatawai o vuravura ena tamata vinaka.​—Vakatekivu 1:28; Aisea 45:18; 55:11.

Vakasamataka mada na totoka ni bula ena Parataisi! Na vuravura taucoko ena yaco me dua na were totoka. Era na tu kina na veimataqali manumanu kei na manumanu vuka, na veisenikau kei na veimataqali kau rairai vinaka. Sa na sega na momosi e vu mai na tauvimate, sa na sega tale ga na mate. O ira kece na bula kina era na veitokani dredre. Kevaka eda via bula tawamudu ena Parataisi, oqo sara ga na gauna meda sasagataka kina.

Wilika e so tale na inaki ni Kalou me baleta na vuravura ena Vosa Vakaibalebale 2:21, 22; Dauvunau 1:4; Aisea 2:4; 11:6-9; 35:5, 6; kei na 65:21-24.