Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 39

Nanumi Luvena na Kalou

Nanumi Luvena na Kalou

E TAGI o Jisu ena gauna e mate kina na nona itokani o Lasarusa. E rarawa beka o Jiova ena gauna e vakararawataki kina kei na nona vakamatei o Jisu?— E kaya na iVolatabu ni rawa ni “vakararawataki” qai “vakacudrui” na Kalou ena ka e dau yaco.​—Same 78:40, 41; Joni 11:35.

O rawa beka ni vakasamataka na nona rarawa o Jiova ni raici Luvena lomani ni vakamatei?— E kila vinaka o Jisu ni na sega ni guilecavi koya na Kalou. Oya na vuna e tauca kina na iotioti ni vosa oqo ni bera ni mate: ‘Tamaqu, au sa solia na noqu bula ina ligamuni.’​—Luke 23:46.

A kila tu o Jisu ni na vakaturi mai na mate, ni na sega ni tu ga e “etesi,” se na ibulubulu. Ni vakaturi oti o Jisu, e cavuta na yapositolo o Pita na ka sa volai tu ena iVolatabu me baleti Jisu. E kaya: “Ni na sega ni biu tu mai etesi, se na vuca mai na lewena.” (Cakacaka 2:31; Same 16:10) E se sega ni vuca se boi na yago i Jisu ena ibulubulu.

 Ni se tiko e vuravura o Jisu, e tukuna vei iratou na nona tisaipeli ni na sega ni dede na nona mate. E tukuna vei iratou ni na “vakamatei ko koya, ka vakaturi cake tale mai e nai katolu ni siga.” (Luke 9:22) E sega gona ni dodonu me ratou kurabuitaka na tisaipeli na nona sa vakaturi. Eratou sega beka ni kurabui?— Daru raica mada.

A mate ena kau ni rarawa na Qasenivuli Levu ena rauta na tolu na kaloko ena yakavi ni Vakaraubuka. E lewe ni Sanadrini na turaga vutuniyau o Josefa, ia e vunitaka voli na nona vakabauti Jisu. Ni rogoca ni sa mate o Jisu, e cabe sara vei Pailato, na kovana ni Roma. E kerea me luvata na yago i Jisu mai na kau me buluta. E qai kauta na yago i Jisu ina dua na qaravatu ena dua na were, na vanua e dau maroroi kina na yagodra na sa mate.

Ni biu oti na yago ina ibulubulu qaravatu, e qai vaqiqici e dua na vatu levu me kena isogo. Ena ikatolu ni siga, na Sigatabu, ni se bera ni cabe na matanisiga, era yadrava toka na qaravatu e so na sotia. Era talai ira mai na bete. O kila na vuna?—

Era rogoca tale ga na bete nona tukuna o Jisu ni na vakaturi. Mera kua ni butakoca na tisaipeli na yago i Jisu me rawa kina nira kaya ni sa vakaturi, era vakarota na bete me yadravi na ibulubulu. E yaco vakasauri e dua na uneune. E cila mai e dua na rarama ni se buto na vanua. Oqo na agilosi i Jiova! Era sega ni cakava rawa e dua na ka na sotia ena levu ni nodra rere. E lako na agilosi ina ibulubulu qaravatu qai vaqiqica tani na vatu. Sa lala na ibulubulu!

Na cava e sa lala kina na ibulubulu? Na cava e yaco?

Io, me vaka ga e qai tukuna na yapositolo o Pita: “Ko Jisu oqo sa vakatura cake na Kalou.” (Cakacaka 2:32) E solia tale na Kalou vei Jisu na mataqali yago vata ga a tu vei Jisu ni se bera ni lako mai i vuravura. E vakaturi ena yago vakayalo me vaka ga na yagodra na agilosi. (1 Pita 3:18, VV) O koya gona, me rawa nira raici Jisu na tamata, ena vakayagataka na yago e laurai. Oya beka na ka e dau cakava?— Daru raica mada.

 Sa cabe na matanisiga. Ratou sa lako na sotia. Eratou gole ina ibulubulu o Meri Makitala kei na vica na marama era tisaipeli i Jisu. Eratou veikayaka tiko: ‘O cei ena vaqiqica tani vei kedatou na vatu?’ (Marika 16:3) Ia ni ratou yaco yani ina ibulubulu qaravatu, sa vaqiqici oti tu na vatu. Sa lala na ibulubulu! Sa yali na yago i Jisu! E sega tale ni bera nona sa cici o Meri Makitala me lai vaqarai iratou na yapositolo.

Eratou toka volekata ga na ibulubulu na vo ni yalewa. Eratou vaqaqa toka: ‘Sa tiko beka e vei na yago i Jisu?’ Rau basika vakasauri e rua na tagane e caliva na nodrau isulu. Rau agilosi! Rau kaya vei iratou na yalewa: ‘Na cava dou vakasaqarai Jisu tiko kina e ke? Sa vakaturi o koya. Dou lako vakatotolo mo dou lai tukuna vei iratou na tisaipeli.’ Vakasamataka na totolo ni nodratou cici na yalewa oya! E tavaki iratou e gaunisala e dua na tagane. O kila se o cei oya?—

O Jisu, ni vakayagataka e dua na yago e laurai! E kaya tale ga vei iratou na yalewa: ‘Dou lai tukuna vei iratou na noqu tisaipeli.’ Eratou marau na yalewa oya. Eratou tukuna vei ira na tisaipeli ni ratou sa sota: ‘Sa bula tale o Jisu! Keitou raici koya!’ Sa tukuna oti vei rau o Pita kei Joni o Meri ni sa lala na ibulubulu qaravatu. Rau mani lako me rau lai raica, me vaka e laurai e ke. Rau raica na isulu a ologi kina o Jisu, ia erau veilecayaki. E vaka e via dredre toka na nodrau vakabauta ni sa bula tale o Jisu.

Na cava erau rairai vakasamataka tiko o Pita kei Joni?

Ena yakavi ni Sigatabu ga oya e rairai o Jisu vei rau e rua na nona tisaipeli rau lako tiko ina koro o Emeo. E taubale vata kei rau o Jisu ratou qai veitalanoa, ia erau sega ni kilai koya baleta ni sa sega ni vakayagataka na yago a tu vua e liu. Rau qai kilai koya ga ni sa masu o Jisu me ratou kana. Ena levu ni nodrau marau na tisaipeli oya erau lesuva tale vakatotolo na vica vata na kilomita i Jerusalemi! De dua ni oti ga oya e rairai o Jisu vei Pita me vakaraitaka vua ni se bula tiko.

 Ena yakavibogi ni Sigatabu oya era tiko ena dua na rumu e levu vei iratou na tisaipeli. E loka tu na katuba. Vakasauri, sa tiko ena kedratou maliwa o Jisu! Ratou sa qai kila ni sa bula tale na Qasenivuli Levu. Vakasamataka na levu ni nodratou marau!​—Maciu 28:1-15; Luke 24:1-49; Joni 19:38–20:21.

Ena loma ni 40 na siga e tarava e dau rairai o Jisu vei ira na nona tisaipeli ena duidui yago me vakaraitaka kina ni sa bula tale. Oti oya sa qai biuta na vuravura me lesu tale vei Tamana i lomalagi. (Cakacaka 1:9-11) Sa ra qai tekivu vunautaka na tisaipeli na itukutuku ni nona sa vakaturi Jisu mai na mate na Kalou. Era tomana tiko ga na  nodra vunau dina ga ni o ira na bete era kanakuitataki ira ra qai vakamatea e so vei ira. Era kila ni kevaka era mani mate, ena nanumi ira na Kalou me vaka ga nona nanumi Luvena.

Na cava era dau nanuma ga vakalevu e levu na tamata donuya na gauna e vakaturi kina o Jisu? Na cava o dau vakasamataka o iko?

Era duidui sara na imuri i Jisu ena gauna oya vei ira e levu na tamata nikua! Ena so na vanua ena gauna oqo era nanuma ga vakalevu na Easter rabbits kei na Easter eggs duiroka donuya na tikinisiga e vakaturi kina o Jisu. Ia e sega ni bau tukuni ena iVolatabu na Easter rabbits kei na Easter eggs. E tukuna ga na sala me qaravi kina na Kalou.

E rawa nida vakataki ira na tisaipeli i Jisu nida tukuna vei ira na tamata na ka totoka e cakava na Kalou ni vakaturi Luvena. Kevaka mada ga era via vakamatei keda e so meda kua sara ni rerevaki ira. Kevaka eda mani mate, ena nanumi keda o Jiova, ena vakaturi keda, me vaka e cakava vei Jisu.

Eda sega li ni marau nida kila ni dau nanumi ira na qaravi koya na Kalou qai rawa tale ga ni vakaturi ira mai na mate?— Noda kila oya ena vakavuna meda via kila na sala meda vakamarautaki koya kina na Kalou. O kila ni rawa meda vakamarautaki koya?— Oqori na veika daru na veitalanoataka tarava.

Nida vakabauta na nona vakaturi o Jisu, ena vakadeitaka na noda inuinui qai vakaukauataka na noda vakabauta. Yalovinaka wilika na Cakacaka 2:22-36; 4:18-20; kei na 1 Korinica 15:3-8, 20-23.