Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 45

Na Cava na Matanitu ni Kalou? Eda Vakaraitaka Vakacava Nida Vinakata?

Na Cava na Matanitu ni Kalou? Eda Vakaraitaka Vakacava Nida Vinakata?

O KILA na masu e vakavulica o Jisu vei ira nona imuri?— Ke o sega ni kila, e rawa ni daru wilika ena iVolatabu, ena Maciu 6:9-13 (VV). Na masu oqo, era vakatoka e le levu me Masu ni Turaga, e okati kina na veivosa: “Me yaco mai na nomuni matanitu.” O kila se cava na Matanitu ni Kalou?—

Na tui e dau liutaka e dua na matanitu se vanua. Na nona veiliutaki e dau vakatokai me matanitu. E vakatokai tale ga na veiliutaki ni Kalou me Matanitu. Ena so na vanua e dau vakatokai na iliuliu ni matanitu me peresitedi. Ia e vakatokai me cava na iliuliu ni Matanitu ni Kalou?— Na Tui.

O kila se o cei e lesia na Kalou me Tui ni Nona matanitu?— Na Luvena, o Jisu Karisito. Na cava e vinaka cake kina o koya mai vei ira na dauveiliutaki era digitaka na tamata?— Baleta o Jisu e lomana  dina na Tamana, o Jiova. Oya na vuna e dau cakava ga kina na veika dodonu.

Ni bera sara nona qai sucu e Peceliema o Jisu, sa tukuna rawa tu na iVolatabu na nona sucu kei na nona lesi koya na Kalou me Tui. Daru wilika mada ena Aisea 9:6, 7. E kaya: “Ni sa sucu mai e dua na gone me noda, sa soli mai vei keda e dua na gonetagane: ena vakatau kivei koya na lewa [se matanitu]; ena vakatokai na . . . Tui [se, “Ravouvou,” NW] ni Sautu. Ena sega ni oti na kena tubu na nona lewa kei na sautu.”

O kila na vuna e vakatokai kina ena tikinivolatabu oqo na iLiuliu ni Matanitu ni Kalou me “Ravouvou?”— Na ravouvou oqo e luve ni tui. O Jisu e Luvena na Tui Levu, o Jiova. Ia sa lesi Jisu tale ga o Jiova me Tui ni Nona matanitu, ena liutaka na vuravura me duanaudolu na yabaki. (Vakatakila 20:6) Ni papitaiso oti, e tekivu vunautaka o Jisu: “Dou veivutuni! ni sa voleka na matanitu vakalomalagi.”​—Maciu 4:17.

Na cava o nanuma e kaya kina o Jisu ni sa voleka na Matanitu ni Kalou?— Baleta ni tu sara ga kei ira na kena Tui, o koya ena veiliutaki mai lomalagi! Oya na vuna e tukuna kina vei ira o Jisu: “Na Matanitu ni Kalou sa tiko ena kemudou maliwa.” (Luke 17:21NW) O na sega beka ni marautaka me tu volekati iko na Tui nei Jiova, mo rawa sara ga ni tarai koya?—

Tukuna mada vei au se cakacaka bibi cava e mai cakava o Jisu e vuravura?— E sauma sara ga o Jisu na taro oqori: “E dodonu me’u vunautaka tale ga na i tukutuku vinaka ni matanitu ni Kalou e na veikoro tale e so, ni sa i koya oqo na i naki ni noqu talai mai.” (Luke 4:43, VV) E kila o Jisu ni sega ni rawa me cakava duadua na cakacaka vakavunau oya. Na cava o nanuma e qai cakava?—

Na cakacaka cava e mai cakava e vuravura o Jisu?

 A veivakavulici o Jisu ena cakacaka vakavunau. E vakavulici iratou taumada na lewe 12 e digitaka me ratou yapositolo. (Maciu 10:5, 7) E vakavulici iratou beka ga ena cakacaka oqo na nona yapositolo? Sega, e vakaraitaka na iVolatabu ni o Jisu e vakavulici ira tale ga e so tale mera vunau. E qai talai ira tale ga e lewe 70 na tisaipeli mera lako yarurua. Na cava era lai vunautaka?— E tukuna o Jisu: “Kaya vei ira, Sa volekati kemudou na matanitu ni Kalou.” (Luke 10:9) Oya na sala era kila kina na tamata na matanitu ni Kalou.

E Isireli ena gauna e liu, era dau vodoka na luve ni asa na tui era qai buli vou nira lako ina koro mera lai vakaraitaki ira vei ira na lewenivanua. E cakava tale ga vaka kina o Jisu ena iotioti ni nona lako i Jerusalemi. Baleta ni o Jisu ena qai yaco me Tui ena Matanitu ni Kalou. Era vinakati koya beka na lewenivanua me Tui?—

Ni vodoka tiko na asa, e levu era tevuka na nodra isulu e gaunisala me lakova. E so era musu tabanikau ra qai biuta tale ga e gaunisala. Era cakava oqori mera vakaraitaka kina nira vinakati Jisu me nodra Tui. Era kacivaka: ‘Me kalougata na Tui e lako mai ena yaca i Jiova!’ Ia era sega ni marau kece na lewenivanua. Era kaya e so na iliuliu ni lotu vei Jisu, ‘Tukuna vei ira na nomu tisaipeli mera tiko lo.’​—Luke 19:28-40.

Na cava era sa sega ni vinakati Jisu kina me Tui na lewenivanua?

Ni oti e lima na siga, e vesu o Jisu qai kau cake i vale levu me lai lewai vei Ponitio Pailato. Era beitaki koya na nona meca ni saqata tiko na matanitu o Roma baleta ni kaya o Jisu ni o koya e dua na tui. Mani tarogi koya kina o Pailato. E vakaraitaka o Jisu ni sega ni vinakata me vuaviritaka na matanitu. E tukuna ga vei Pailato: “Sa sega ni vakavuravura na noqu matanitu.”​—Joni 18:36.

E curu i tuba o Pailato qai tukuna vei ira na lewenivanua ni sega ni kunea vei Jisu e dua na cala. Ia era sa sega tale ni vinakata me nodra Tui o Jisu. Era sega tale ga ni vinakata me sereki. (Joni 18:37-40) Ni oti na nodrau veivosaki tale kei Jisu, e vakadeitaka o Pailato  ni sega ni dua na cala nei Jisu. Ni mai vakaraitaki Jisu ena kena iotioti ni gauna, e kaya o Pailato: “Raica na nomuni Tui!” Ia era kailavaka yani na lewenivanua: “Kauta tani! Kauta tani! Vakoti koya!”

E taroga o Pailato: ‘Meu vakota na nomuni Tui?’ Era sauma yani na bete: ‘E sega na neimami tui, o Sisa duadua ga.’ Vakasamataka mada oya. Era moici ira na lewenivanua na bete ca oya mera saqati Jisu!​—Joni 19:1-16, VV.

E vaka tale ga kina nikua. Era le levu era sega ni vinakati Jisu me nodra Tui. Era rairai kaya nira vakabauta na Kalou, ia era sega ni vinakata me  rau tukuna na Kalou kei Karisito na ka mera cakava. Era vinakata ga me veiliutaki tiko e vuravura na nodra matanitu.

Vakacava o keda? Nida sa mai kila na Matanitu ni Kalou kei na veivakalougatataki ena kauta mai, eda raica vakacava na Kalou?— Eda lomani koya, se vakaevei?— Eda na vakaraitaka vakacava nida lomana na Kalou da qai vinakata tale ga me lewai keda na nona Matanitu?—

Na cava e papitaiso kina o Jisu, e vakadonui koya vakacava na Kalou?

Eda vakaraitaka oqo ena noda muria na ivakaraitaki i Jisu. Na cava e cakava o Jisu e vakaraitaka ni lomani Jiova?— “Ni’u sa dau cakava tiko ga na ka e vinakata,” e kaya o Jisu. (Joni 8:29, VV) Io, e lako mai i vuravura o Jisu ‘me mai cakava na ka e vinakata na Kalou’ me ‘vakaotia tale ga na nona cakacaka.’ (Iperiu 10:7; Joni 4:34) Vakasamataka mada na veika e cakava o Jisu ni bera ni tekivu cakacaka vakavunau.

E gole o Jisu vei Joni na Dauveipapitaisotaki ena uciwai na Joritani. Ni rau sa tu e wai, e qai tabadromuci Jisu e wai o Joni qai vueti koya tale mai. O kila na vuna e papitaisotaki Jisu kina o Joni?—

E vei e rawa nida vakamacalataka kina na Matanitu ni Kalou?

E kerei Joni o Jisu me papitaisotaki koya. Ia eda kila vakacava ni vinakata na Kalou me papitaiso o Jisu?— Ni lamata mai o Jisu e rogoca na  domo ni Kalou mai lomalagi e kaya: “O iko na noqu Gone ni toko, au sa dauvinakati iko vakalevu.” E bau solia tale ga mai na yalona tabu me vaka na ruve me mai ro vei Jisu. Ni papitaiso gona o Jisu, e vakaraitaka kina ni vinakata me qaravi Jiova ena gauna kece ni nona bula, io, me tawamudu.​—Marika 1:9-11.

O sa tubu cake tiko oqo. Na cava o na cakava ni o sa qase cake?— O na vakataki Jisu beka, mo papitaiso tale ga?— E dodonu mo muri koya, ni kaya na iVolatabu ni “laiva vei kemudou nai vakarau, mo dou muria na we ni yavana.” (1 Pita 2:21) Ni o sa papitaiso, o sa vakaraitaka ni o vinakata dina me lewai iko na Matanitu ni Kalou. Ia e sega ni vinakati ga meda papitaiso.

E dodonu meda muria na ivakavuvuli kece i Jisu. E kaya o Jisu meda ‘kua ni vakavuravura.’ Eda na talairawarawa beka vua kevaka eda vakaitovotaki keda ena itovo vakavuravura? Eratou sega ni muria na itovo vaka oqori o Jisu kei iratou na nona yapositolo. (Joni 17:14) Na cava ga eratou cakava?— Eratou dau vunautaka na Matanitu ni Kalou. Oya ga na cakacaka bibi eratou dau cakava. E rawa tale ga meda cakava oya?— Io, eda na cakava na cakacaka oqori kevaka eda vakabauta dina na ka eda kaya nida masulaka me yaco mai na Matanitu ni Kalou.

Yalovinaka raica tale ga na veitikinivolatabu oqo era vakaraitaka na ka meda cakava me vakaraitaka nida vinakata me yaco mai na Matanitu ni Kalou: Maciu 6:24-33; 24:14; 1 Joni 2:15-17; kei na 5:3.