Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 34

Na Cava ena Yaco Nida Mate?

Na Cava ena Yaco Nida Mate?

O NA rairai kila ni tamata e dau qase, tauvimate, qai mate sara. Era bau mate tale ga e so na gone. E dodonu beka mo rerevaka na mate se e dua e mate?— O kila na ka ena yaco nida mate?—

E sega ni dua e bula tiko oqo e sa mate mada qai bula tale me tukuna na ka e yaco nida mate. Ia a tiko e dua ena gauna a bula voli kina e vuravura na Qasenivuli Levu. E rawa nida kila na ka e yaco nida mate nida wilika na veika e baleti koya. Na itokani i Jisu oqo e kai Pecani, e dua na korolailai volekati Jerusalemi. E yacana o Lasarusa, e yacadrau na ganena o Marica kei Meri. Daru raica mada se cava e kaya na iVolatabu ni yaco.

E tauvimate bibi o Lasarusa ena dua na siga. A tu sara mai vakayawa o Jisu. Rau mani tala e dua o Marica kei Meri me lai tukuna vei Jisu ni tauvimate na ganedrau o Lasarusa. Oqo e baleta ni rau kila ni rawa ni vakabulai ganedrau o Jisu. E sega ni vuniwai o Jisu, ia e tu vua na kaukaua e solia na Kalou me vakabula na mate kece ga.​—Maciu 15:30, 31.

Ni se bera ni yaco yani o Jisu, sa leqa o Lasarusa. Ia e tukuna o Jisu vei iratou nona tisaipeli ni moce toka ga o Lasarusa, ia sa lako oya me lai vakayadrati koya. E sega ni matata vei iratou na tisaipeli na ka e tukuna o Jisu. E qai kaya vakamatata o Jisu: ‘Sa mate o Lasarusa.’ Na cava e vakaraitaka oqo me baleta na  mate?— Io, e vaka ga eda moce lutu. Na kaukaua ni moce lutu oya eda sega mada ga ni tadra rawa.

Sa gole tiko mai o Jisu me mai raici rau o Marica kei Meri. Era sa tiko na wekadrau kei na nodrau itokani. Era mai vakacegui rau na veitacini baleta ni sa mate na ganedrau. Ni rogoca o Marica ni sa voleka mai o Jisu, e lako sara me lai tavaki koya. E qai gole tale ga o Meri me raici Jisu. E rarawa dina vakalevu o Meri, e tagi, qai cuva sobu ina yava i Jisu. Era tagi tale ga na muri Meri.

E taroga na Qasenivuli Levu se e vei e maroroi kina na yago i Lasarusa. Era kauti Jisu sara ina qaravatu e buluti kina o Lasarusa. E tagi tale ga o Jisu ni raica nira tagi na tu e kea. E kila vinaka na noda rarawa ni leqa e dua na wekada.

E sogo tu ena vatu na qaravatu, e mani kaya o Jisu: “Ni kauta tani na vatu.” A dodonu beka mera kauta tani na vatu?— E nanuma o Marica ni sega beka ni dodonu oya. E mani kaya: “Turaga, oqo e sa na bona na yagona; ni sa oti e va na bogi na nona mate.”

Ia e kaya o Jisu vua: “Au a sega li ni kaya vei iko, ni ko na raica ga na kaukauwa ni Kalou kevaka ko vakabauta?” E kaya o Jisu ni na raica o Marica e dua na ka ena lagiti kina na Kalou. Na cava ena cakava o Jisu? Ni sa kau tani na vatu, e qai masu vei Jiova ena domoilevu o Jisu. E qai kaya o Jisu ena domoilevu: “Lasarusa, lako mai!” Ena lako beka mai? E rawa beka?—

E rawa beka mo vakayadrata e dua e moce tiko?— Io, ke o kaci ena domoilevu ena yadra. Ia e rawa beka mo vakayadrata e dua sa mate toka?— Sega. Veitalia se rogo levu vakacava na domomu, ena sega ni rogoci iko rawa o koya sa leqa. E sega ni  rawa vei iko, vei au, se o cei tale e vuravura oqo me vakayadrati ira rawa na mate.

Na cava e cakava o Jisu vei Lasarusa?

Ia e duatani o Jisu. E tu vua na kaukaua e solia na Kalou. E veivakurabuitaki na ka e yaco ni sa kacivi Lasarusa o Jisu. E lako tani mai na qaravatu o koya, sa va na siga na nona mate! Sa bula tale! Sa rawa tale me cegu, lako, qai vosa tale ga! Io, e vakaturi Lasarusa mai na mate o Jisu.​—Joni 11:1-44, VV.

Vakasamataka mada: Na cava e yaco vei Lasarusa ni sa mate? E lako tani beka mai vua na yalona qai lai bula tiko ena dua na vanua? E lako beka na yalona i lomalagi? E lai bula tiko kei na Kalou kei ira na agilosi me va na siga?—

Sega. Nanuma ni a kaya o Jisu ni moce toka o Lasarusa. Na cava e yaco ni o moce? Ni o moce lutu, o sega ni kila na veika e yaco tiko, se vakaevei?— Ni o sa yadra, o sega ni kila na dede ni nomu moce me yacova ni o sa raica na kaloko.

 E vaka sara ga oya na tamata e sa mate. E sega ni kila e dua na ka. E sega ni vakila e dua na ka. E sega ni cakava rawa e dua na ka. E vaka sara ga oqori o Lasarusa ni sa mate. Na mate e vaka na moce lutu, e sega ni nanumi rawa kina e dua na ka. E kaya na iVolatabu: “Ko ira na mate era sa sega ni kila e dua na ka.”​—Dauvunau 9:5, 10.

Na cava e kena ituvaki o Lasarusa ena gauna e mate tu kina?

Vakasamataka tale ga oqo: Ke a tu mai lomalagi ena va na siga o Lasarusa, ke a sega beka ni mai tukuna?— Ke a tu mai lomalagi, ke a vakavuna tale beka o Jisu me biuta mai na vanua totoka oya me lesu tale mai i vuravura?— Sa macala tu ga ni sega!

Ia, e levu era kaya ni dua na ka e tiko e loma ni yago ni tamata e sega ni dau mate. Era kaya ni a bula tu mai ena dua na vanua o Lasarusa. Ia e sega ni bau tukuna na iVolatabu oya. E tukuna ga ni Kalou e bulia na imatai ni tamata o Atama mai na kuvu ni qele. E kaya tale ga na iVolatabu ni mate o Atama ni sa valavala ca. E sega ni bau vakila tale e dua na ka. E suka tale ina  kuvunisoso e buli mai kina. E kaya tale ga na iVolatabu ni dewa vei ira kece na kawa i Atama na ivalavala ca kei na mate.​—Vakatekivu 3:17-19; Roma 5:12.

So era rerevaka na mate. Era sega ni dau lako volekata na ibulubulu baleta nira nanuma ni tiko na yalodra na sa mate, de ra vakaleqai keda na bula tiko. E rawa beka ni vakaleqa e dua e se bula tiko na tamata sa mate?— Sega, e sega ni rawa.

Na cava mera kua ni rerevaki kina na mate?

So era bau vakabauta ni rawa ni suka mai na yalo ni tamata sa mate me mai sikovi ira na bula tiko. Oya na vuna era dau vakarautaka kina na kedra kakana na sa mate. O ira oqori era sega ni vakabauta na ka e kaya na Kalou me baleti ira na mate. Ke da vakabauta na ka e kaya na Kalou, eda na sega ni rerevaki ira na mate. Eda na vakaraitaka na noda vakavinavinakataka na noda bula vua na Kalou ena noda cakava na ka e vakadonuya.

Ia de o taroga: ‘Ena vakabulai ira tale beka na gone era sa mate na Kalou? E gadreva dina beka me vakabulai ira tale?’ Daru na qai veitalanoataka.

Daru wilika mada e so tale na tikinivolatabu e vakaraitaka na kedra ituvaki na mate, ena Same 115:17; kei na 146:3, 4.