Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 22

Na Cava Meda Kua Kina ni Lasu?

Na Cava Meda Kua Kina ni Lasu?

KAYA mada ni tukuna e dua na goneyalewa vei tinana: “Io, au na lako mai vale ni suka ga na vuli.” Ia e qai qito tale tiko kei ira nona itokani qai mai tukuna vei tinana: “E tukuna o qasenivuli meu tiko tale mada e koronivuli ni sa suka na vuli.” E dodonu li me tauci na vosa vaka oya?—

Na cala cava e cakava na gone oqo?

Se e rairai tukuna beka e dua na gonetagane lailai vei tamana: “Sega, au sega ni bau caqeta na polo e lomanivale.” Ia vakacava ke caqeta dina? E cala beka nona tukuna ni sega ni caqeta na polo?—

E tukuna vei keda na Qasenivuli Levu na ka e dodonu meda cakava. E kaya: ‘Ni dou vosa, me io na io ka sega ga na sega, ia na ka sa sivita oqo e vu mai vua na vunica.’ (Maciu 5:37) Na cava na ibalebale ni vosa i Jisu oya?— E kaya o koya meda dau cakava na ka eda tukuna.

E tiko e dua na italanoa ena iVolatabu e vakaraitaka na bibi  ni noda tukuna na ka dina. Oqo e baleti rau e lewe rua erau kaya ni rau tisaipeli i Jisu. Daru raica mada se cava e yaco.

Voleka ni rua na vula mai na gauna e mate kina o Jisu, era lako mai i Jerusalemi e levu na tamata mai na veivanua yawa mera mai tiko ena nodra soqo bibi na Jiu e vakatokai na Penitiko. E totoka vakaoti nona vakamacalataka vei ira oqo na yapositolo o Pita na veika e baleti Jisu, o koya e vakatura o Jiova mai na mate. Oqo e se qai imatai ni gauna mera rogoca kina na ivakamacala kei Jisu e levu vei ira na lako mai i Jerusalemi. Era via kila e levu tale na ka e baleti koya. Na cava era qai cakava?

E dede vakalailai tale na nodra tiko. Sega ni dede, sa sega na nodra ilavo e so. E gadrevi mera vukei ena ilavo ni kedra. Era mani vukei ira na tisaipeli era tiko e Jerusalemi. E levu vei ira era volitaka e so na ka era taukena ra qai kauta mai na ilavo vei iratou na yapositolo i Jisu. Eratou qai vota na ilavo na yapositolo vei ira na gadreva na veivuke.

Rau volitaka tale ga o Ananaiasa kei watina o Safaira e dua na  nodrau tikiniqele ni rau lewe ni ivavakoso vakarisito e Jerusalemi. A sega ni dua e tukuna me rau volitaka na qele. Rau lewa sara ga vakataki rau. Ia na ka erau cakava oya e sega ni vakaraitaka ni rau lomani ira na tisaipeli vou i Jisu. Rau via vakaraitaka ga o Ananaiasa kei Safaira ni vaka erau veiwatini vinaka. Rau kaya ni rau solia kece na isau ni qele me nodrau cau. Ia erau solia ga e dua na kena iwase. Na cava o nanuma me baleta na ka erau cakava oya?—

E mai raici iratou na yapositolo o Ananaiasa. E solia vei iratou na ilavo. Ia e kila na Kalou ni sega ni solia kece na ilavo. Mani vakaraitaka na Kalou vei Pita na yapositolo ni lasu tiko o Ananaiasa.

E lasutaki Pita tiko vakacava o Ananaiasa?

Qai kaya o Pita: ‘Ananaiasa, na cava o vakatarai Setani kina me uqeti iko mo cakava na ka oqo? A nomu na tikiniqele. A sega ni gadrevi mo volitaka. Ni o sa volitaka oti, o lewa sara ga na ilavo e kena isau. Ia na cava o lasutaka kina ni o solia kece mai na kena ilavo ni o solia ga e dua na tikina? O sega ni lasutaki keitou wale ga, ia o lasutaka tale ga na Kalou.’

E vaka sara ga oya na kena bibi. A lasu o Ananaiasa! A sega ni cakava na ka e kaya. E veidabui ga. E tukuna na iVolatabu na ka e qai yaco. E kaya: ‘Ni rogoca ga na vosa i Pita, e bale qai mate sara o  Ananaiasa.’ A vakamatei Ananaiasa na Kalou! E qai colati na yagona i tuba me buluti.

Na cava e yacovi Ananaiasa ena nona lasu?

Ni oti e tolu na aua, e basika mai o Safaira. E sega ni kila se cava sa yaco vei watina. A tarogi koya o Pita: ‘Sa isau kece sara ga ni qele drau volitaka na ilavo drau solia mai oqo?’

E sauma o Safaira: ‘Io, oqori sara ga na isau kece ni qele keirau volitaka.’ Ia e lasu o koya! Erau maroroya toka e dua na iwase ni ilavo e volitaki kina na qele. Mani vakamatei Safaira tale ga na Kalou.​—Cakacaka 5:1-11.

Na cava eda vulica mai na ka e yacovi rau o Ananaiasa kei Safaira?— Eda vulica kina ni sega ni vinakata na Kalou na lasu. E vinakata ga meda dau tukuna na ka dina. Ia e levu era kaya ni sega ni dua na kena ca na lasu. O nanuma ni dina na ka era kaya oya?— O bau kila ni lasu e vakavuna sara ga na bula leqaleqa eda sotava tiko, wili kina na tauvimate, na momosi ni yago, kei na mate?—

O cei e tukuna o Jisu e tekivutaka na lasu? Na cava e kena itinitini?

Nanuma tale ga ni a lasutaki Ivi, na imatai ni yalewa, na Tevoro. E tukuna vei Ivi ni na sega ni mate ke talaidredre vua na Kalou ni kania na vuanikau e kaya na Kalou me kua ni kania. E vakabauta na vosa ni Tevoro o Ivi qai kania na vuanikau. E uqeti Atama tale ga me kania. Oya e vakavuna me rau ivalavala ca, ra yaco tale ga na luvedrau mera ivalavala ca ena gauna era sucu kina. Nira ivalavala ca kece, era sotava na rarawa ra qai mate kece na kawa i Atama. E tekivu vakacava na leqa oqo?— E tekivu ga mai na lasu.

Sa rauta me kaya o Jisu ni Tevoro e “lasulasu ka sa vu mai vua na lasu kece ga”! E tekivutaka sara ga na lasu. Ke dua e lasu, sa muria tiko na  ka e cakava na Tevoro. Meda vakasamataka oqori ke lomada meda lasu.​—Joni 8:44, VV.

Ena gauna cava beka o na via lasu kina?— E sega beka ni gauna o cakava kina e dua na ka ca?— Kaya mada ke o voroka vakacalaka e dua na iyaya. Ke o tarogi, e dodonu beka mo beitaki tacimu se ganemu? Se mo lasutaka ni o sega ni kila se a kavoro vakacava?—

Ena gauna cava o dau via lasu kina?

Vakacava ke vinakati mo vulica kece na nomu lesoni o qai vulica ga vakavo? E dodonu beka mo tukuna ni o sa vulica kece, dina ga ni o vulica vakavo?— Nanumi Ananaiasa kei Safaira. Rau sega ni tukuna na ka dina. E vakamatei rau na Kalou baleta ni cala na ka erau cakava.

O koya gona, e cala kevaka eda sega ni tukuna vakadodonu na ka eda cakava, se meda tukuna vakatikina ga na ka dina. E kaya na iVolatabu: “Vosa dina.” E kaya tale ga: ‘Kakua ni dau veilasutaki.’ E dau tukuna na ka dina o Jiova, e namaka tale ga meda tukuna na ka dina.​—Efeso 4:25; Kolosa 3:9.

E dodonu meda dau tukuna na ka dina. E vakaraitaki oqori ena Lako Yani 20:16; Vosa Vakaibalebale 6:16-19; 12:19; 14:5; 16:6; kei na Iperiu 4:13.