Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 10

Kaukaua Cake o Jisu Vei Ira na Timoni

Kaukaua Cake o Jisu Vei Ira na Timoni

O SE nanuma tiko se a yaco vakacava e dua na agilosi ni Kalou me Tevoro o Setani?​— A tusaqata na Kalou baleta ni vinakata me sokaloutaki. Era yaco beka e so na agilosi mera imuri i Setani?​— Io, e vaka kina. E vakatokai ira na iVolatabu mera ‘agilosi i Setani,’ se timoni.​—Vakatakila 12:9.

Era vakabauta beka na Kalou na agilosi ca, se timoni?​— E kaya na iVolatabu nira ‘vakabauta na timoni ni tiko na Kalou.’ (Jemesa 2:19) Ia ena gauna oqo era sa rere vakalevu. Era kila ni na totogitaki ira na Kalou ena vuku ni veika ca era cakava. Na cava na veika ca era cakava?​—

E kaya na iVolatabu nira biuta mai na nodra itikotiko mai lomalagi na agilosi oya ra qai mai bula kei ira na tamata e vuravura. Oqo e baleta nira via veiyacovi kei ira na yalewa matavinaka e vuravura. (Vakatekivu 6:​1, 2; Juta 6) Na cava o kila me baleta na veiyacovi?​—

Na veiyacovi e nodrau  moce vata e dua na tagane kei na dua na yalewa. Oti oya e rawa ni qai tubu tiko na gone ena kete i tinana. Ia e cala na nodra mai veiyacovi na agilosi. E vakatara ga na Kalou me rau veiyacovi na tagane kei na yalewa erau sa vakawati. Ke mani sucu na gone, ena rawa me rau qaravi koya na veiwatini.

Na cava na ka ca era cakava na agilosi oqo?

Nira vukici ira mera tamata na agilosi ra qai veiyacovi kei ira na yalewa e vuravura, era qai tubu cake na luvedra mera tuwawa. Era tamata ivalavala kaukaua, ra qai dau veivakamavoataki. Mani vakavuna na Kalou me yaco e dua na waluvu levu me vakarusai ira na tuwawa kei ira na tamata ca. Ia e tukuna vei Noa me taya e dua na waqa vakaitamera mera vakabulai kina na le vica ga era cakava tiko na veika dodonu. E kaya na Qasenivuli Levu meda nanuma vinaka na ka e yaco ena gauna ni Waluvu oya.​—Vakatekivu 6:3, 4, 13, 14; Luke 17:26, 27.

O kila na ka e yacovi ira na agilosi ca ena gauna ni Waluvu?​— Era biuta tu mai na yagodra vakatamata ra qai lesu i lomalagi. Ia era sa sega ni agilosi ni Kalou, era sa agilosi i Setani, se era timoni. Na cava e yacovi ira na luvedra tuwawa?​— Era mate ena  Waluvu. Vaka kina o ira na tamata kece era talaidredre vua na Kalou.

Na cava sa qai ca vakalevu ga kina na vuravura oqo?

Me tekivu mai na gauna ni Waluvu, sa sega ni vakatara tale na Kalou mera vukici ira mera tamata na timoni. Dina nida sega ni raici ira, era saga tiko ga na timoni mera cakava na ka ca na tamata. Sa qai kaukaua ga na nodra vakatubuca. E baleta nira sa kolotaki sobu mai lomalagi ki vuravura.

O kila se cava eda sega ni raici ira kina na timoni?​— E baleta nira tawarairai. Ia eda kila nira bula tiko. E kaya na iVolatabu ni o Setani e ‘vakaisina tiko na vuravura,’ ra qai vukei koya tiko na nona timoni.​—Vakatakila 12:9, 12, VV.

E rawa beka me vakaisini keda tale ga na Tevoro kei ira na nona timoni?— Io, kevaka eda sega ni qaqarauni. Ia e sega ni dodonu meda rere. E kaya na Qasenivuli Levu: ‘E sega ni kaukauwa vei au na Tevoro.’ Kevaka eda kabita matua na Kalou, ena taqomaki keda mai vua na Tevoro kei ira na nona timoni.​—Joni 14:30, VV.

E dodonu meda kila na veika ca era vinakata na timoni meda cakava. Vakasamataka mada. Na cava na ka ca era cakava na timoni nira lako mai i vuravura?— Ni se bera na Waluvu, era veiyacovi kei ira na yalewa, na ka e sega ni dodonu mera cakava na agilosi. Ena gauna oqo era marautaka na timoni ni sega ni muri na lawa ni Kalou me baleta na veiyacovi. Meu tarogi iko mada, O cei ga e dodonu me veiyacovi?— O dina, o ira ga na vakawati.

Ena gauna oqo era dau veiyacovi e so na gonetagane kei na goneyalewa, ia e cala oya. E vakaraitaka na iVolatabu ni a bulia na Kalou na ka vakatagane kei na ka vakayalewa. (Vakarua 23:1) E bulia na tiki ni yago oqo o Jiova mera marautaka ga na vakawati. Era marau na timoni nira cakava na tamata na veika e vakatabuya o Jiova. Me kena ivakaraitaki, era marautaka na timoni nira tara na ka vakatagane na goneyalewa ra qai tara na ka vakayalewa na  gonetagane. Eda sega ni vinakata mera marau na timoni, se vakacava?—

E dua tale na ka era marautaka na timoni ia e cata o Jiova. O kila se cava oya?— Na ivalavala kaukaua. (Same 11:5) Na ivalavala kaukaua na nona nakita e dua me veivakamavoataki. Nanuma ni oya na ka era cakava na tuwawa, na luvedra na timoni.

Era vinakata tale ga na timoni mera veivakarerei. So na gauna era lasutaka nira vakataki ira na tamata era sa mate. E rawa sara ga mera vakadamurimuria na domodra na sa mate. Oqo na sala era lawakitaki ira kina na tamata mera vakabauta nira se bula tu na mate, ni rawa tale ga nira veivosaki kei ira na se bula tiko. Io, era vakavuna na timoni mera vakabauta na tamata na yalovelavela.

Meda qarauna me kua ni lawakitaki keda o Setani kei ira na nona timoni. E kaya na ivakasala ena iVolatabu: ‘O Setani e dau via vukici koya me vaka na  agilosi vinaka, vaka kina o ira na nona dauveiqaravi.’ (2 Korinica 11:14, 15, VV) Ia era ca vakaidina na timoni. Meda raica mada se era na uqeti keda vakacava meda vakataki ira.

E vei e vulici kina na ivalavala kaukaua, na veiyacovi e sega ni dodonu, kei na yalovelavela?— E sega li ni vulici mai na so na iyaloyalo e vakaraitaki e valeniyaloyalo kei na retioyaloyalo, ena video games, ena Internet, kei na wili komiki? Nida cakava na veika oqo, eda na volekata beka kina na Kalou se eda na volekata na Tevoro kei ira nona timoni? Na cava o nanuma?—

Cava e rawa ni yaco ke da sarava na ivalavala kaukaua?

O cei o nanuma e vinakata meda rogoca se sarava na veika ca?— Io, o Setani kei ira na nona timoni. Na cava gona e dodonu me daru cakava?— E dodonu me daru wilika, rogoca, qai sarava na veika e vinaka e rawa ni vukei kedaru ena nodaru qaravi Jiova. O rawa ni vakasamataka e so na veika vinaka e rawa ni daru cakava?—

Na cava ena yaga meda cakava?

Ke da cakava na veika vinaka, eda na sega ni rerevaki ira na timoni. E kaukaua cake vei ira o Jisu, era rerevaki koya tale ga. Dua na siga era kacivaka na timoni vei Jisu: “Ko ni sa mai vakawabokotaki keimami?” (Marika 1:24, VV) Eda sega li ni namaka na gauna ena vakarusai Setani kina kei ira na nona timoni o Jisu?— Ena gauna mada ga oqo, e rawa nida kila ni na taqomaki keda o Jisu mai vei ira na timoni kevaka eda kabiti koya kei na Tamana vakalomalagi.

Daru wilika mada na ka e dodonu me daru cakava ena 1 Pita 5:8, 9 kei na Jemesa 4:7, 8.