Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 41

Gone Era Vakamarautaka na Kalou

Gone Era Vakamarautaka na Kalou

O CEI na gone e vuravura o nanuma e marautaka vakalevu duadua o Jiova?— O Jisu, na Luvena. Daru veitalanoataka mada na veika e cakava o Jisu e marautaka na Tamana vakalomalagi.

E dau siga tolu na kena taubaletaki na gaunisala mai na vanua eratou vakaitikotiko kina na vuvale i Jisu i Jerusalemi, na koro e tu kina na valenisoro i Jiova. E vakatoka o Jisu na valenisoro me “vale nei Tamaqu.” Eratou dau lako vakavuvale e kea e veiyabaki ena kanavata ni Lakosivia.

Ena dua na yabaki, ni sa yabaki 12 o Jisu, eratou sa suka tiko mai ena kanavata ni Lakosivia na vuvale i Jisu. Eratou qai vakila ga ni yali o Jisu, ni sega ni tiko tale ga kei ira na wekadratou, ni ratou sa vakacegu me ratou vakarau moce. Rau mani lesu i Jerusalemi o Meri kei Josefa me rau lai vakasaqarai Jisu. E vei beka na vanua o nanuma ena tiko kina?—

Rau kunei koya ena valenisoro. E vakarogoci ira tiko na ivakavuvuli qai vakatarogi ira tale ga. E sauma tale ga na nodra taro. Era qoroya na dodonu vinaka ni nona saumi taro. O raica rawa na vu ni nona marautaki Luvena na Kalou?—

Rau lomavakacegu o Meri kei Josefa ni rau sa kunei Jisu. Ia e sega ni lomaleqa o Jisu. E kila o koya ni valenisoro e vanua veiganiti me tiko kina. Oya na vuna e taroga kina: “Drau sega ni kila ni sa dodonu me’u tiko e na vale nei Tamaqu?” E kila ni valenisoro e vale ni Kalou, e marau ni tiko kina.

 Oti oya rau sa qai kauti Jisu yabaki 12 i Nasareci o Meri kei Josefa. Na cava o nanuma, e vakacava na ivalavala i Jisu vei rau na nona itubutubu?— E kaya na iVolatabu ni “dau talairawarawa vei rau.” Io, e cakava na veika erau tukuna na nona itubutubu, ke rau mani kerei koya sara mada ga me lai taki wai mai na tobu.​—Luke 2:41-52, VV.

E vakamarautaka vakacava na Kalou na gone o Jisu?

Vakasamataka mada oqo: Dina ga ni tamata uasivi o Jisu, e talairawarawa ga vei rau na nona itubutubu erau sega ni uasivi. E marautaka beka na Kalou oya?— Io, ni tukuna na Vosa ni Kalou vei ira na gone: “Ni talairawarawa vei ira na nomuni i tubutubu.” (Efeso 6:1, VV) Ena marautaki iko tale ga na Kalou ni o talairawarawa vei rau na nomu itubutubu, me vaka e cakava o Jisu.

E rawa tale ga nida vakamarautaka na Kalou nida tukuni koya yani. Era na kaya beka e so ni sega ni dodonu mera cakava oqo na gone. Ia nira via tarovi ira na gone e so na tamata, e kaya o Jisu: ‘Dou sega beka ni wilika, “Na Kalou ena cakava na vakarokoroko me uasivi sara ena gusudra na gonelalai kei na gone  dramidrami”?’ (Maciu 21:16) E rawa gona vei keda kece, kevaka eda vinakata, meda tukuni Jiova yani kei na nona vinaka. Kevaka eda cakava oya, eda na vakamarautaka na Kalou.

E vei eda vulica mai kina na veika me baleta na Kalou eda rawa ni tukuna yani?— Mai na noda vuli iVolatabu e vale. Ia ena levu cake na ka eda vulica ena vanua era dau soqoni kina na tamata ni Kalou. Ia eda na kilai ira vakacava na tamata ni Kalou?—

Na cava e dau caka ena gauna ni soqoni? E dau vakavuvulitaki dina kina na iVolatabu? Vakacava o ira na tiko kina, era wilika beka na iVolatabu ra qai veivosakitaka? Oya na sala eda rogoca kina na ka e tukuna na Kalou, se vakaevei?— Eda namaka meda rogoca na ka e tukuna na Kalou ena nodra soqoni na lotu Vakarisito, se vakaevei?— Ia vakacava ke ra tukuna e so ni sega ni gadrevi meda bulataka na ka e tukuna na iVolatabu? O na vakatokai ira oqori mera tamata ni Kalou?—

Oqo e dua tale na ka mo vakasamataka. E kaya na iVolatabu ni o ira na tamata ni Kalou ena “tiko vei ira na yacana.” (Cakacaka 15:14) Ni “Jiova” e yaca ni Kalou, e rawa nida tarogi ira na tamata se e nodra Kalou o Jiova se sega. Kevaka era kaya na sega, ia eda kila nira sega ni nona tamata. O ira tale ga na tamata ni Kalou era na dau vakamacalataka na Matanitu ni Kalou. Era vakaraitaka na nodra lomani koya ena nodra muria na nona ivunau.​—1 Joni 5:3.

Ke o kilai ira era cakava na veika kece oqo, e dodonu mo sokalou kei ira. Mo vakarorogo vinaka ena gauna e caka kina na soqoni, qai sauma na taro e tarogi mai kina. Oya na ka e cakava o Jisu ena gauna e tiko kina ena vale ni Kalou. Kevaka o cakava na veika oqori, o na vakamarautaka na Kalou, me vakataki Jisu.

O rawa beka ni vakasamataki ira e so na gone era cavuti ena iVolatabu era vakamarautaka na Kalou?— O Timoci e kena ivakaraitaki  vinaka. E sega ni vakabauti Jiova o tamana. Ia erau vakabauti Jiova o Unaisi, na tinana, kei Loi, na buna. E dau rogoci rau o Timoci qai vulica tale ga na veika e baleti Jiova.

Dina ga ni sega ni vakabauti Jiova na tamana, ia na cava e vinakata me cakava o Timoci?

Ni sa cauravou o Timoci, e sikova yani na nodratou koro na yapositolo o Paula. E raica na nona gugumatua ni qaravi Jiova o Timoci. Mani sureti Timoci me tomani koya me lai vakarabailevutaka na nona qarava na Kalou. Ena veivanua kece erau lakova, rau vakamacalataki Jisu kina kei na Matanitu ni Kalou.​—Cakacaka 16:1-5; 2 Timoci 1:5; 3:14, 15.

E tu beka ga ena iVolatabu na kedra ivakaraitaki na gonetagane era vakamarautaka na Kalou?— Sega. Vakasamataka mada e dua na goneyalewa gone ni Isireli e vakamarautaka tale ga na Kalou. E bula tiko o koya ena gauna erau veimecaki tiko kina na matanitu o Siria kei Isireli. Era mai valuti Isireli na kai Siria ena dua na gauna ra qai kauta vakavesu na goneyalewa lailai oqo. E kau ina nona vale  na iliuliu ni mataivalu o Neamani. E yaco sara me lai nona dauveiqaravi na wati Neamani.

E tauvi vukavuka tiko o Neamani. E sega ni dua na vuniwai e vakaotia rawa na kena mate. Ia e vakabauta na goneyalewa ni Isireli oqo ni tiko e dua na dauveiqaravi ni Kalou, e parofita, e rawa ni vakaotia na mate e tauvi Neamani. Ia rau sega ni qaravi Jiova o Neamani kei watina. A dodonu beka me tukuna vei rau na goneyalewa gone oqo na veika e kila? Na cava o na cakava o iko?—

E vakamarautaka vakacava na Kalou na goneyalewa oqo?

E kaya na goneyalewa lailai oya: ‘Me lako mada o Neamani me lai raica na parofita i Jiova e Isireli, ena vakabulai o Neamani mai na nona vukavuka.’ E rogoci goneyalewa o Neamani qai lako sara vua na parofita i Jiova. Ni cakava na ka e tukuna vua na parofita e vakabulai sara mai na kena mate. Oqo e vakavuna na nona qarava na Kalou dina o Neamani.​—2 Tui 5:1-15.

E rawa beka mo vukea e dua me vulici Jiova kei na veika e rawa ni cakava, me vaka na goneyalewa oya?— O cei o rawa ni vukea?— De era na kaya beka nira sega ni vinakata mera vukei. Ia o rawa ni vakamacalataka ga na veika vinaka e dau cakava o Jiova. De dua era na vakarorogo. Ena marautaka dina o Jiova ni o cakava oqori.

E kunei e so tale na veivakayaloqaqataki vei ira na gone mera qaravi Jiova ena Same 122:1; 148:12, 13; Dauvunau 12:1; 1 Timoci 4:12; kei na Iperiu 10:23-25.