Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 8

Era Uasivi Vei Keda e So

Era Uasivi Vei Keda e So

AU KILA ni o vakadinata ni so era uasivi ra qai kaukaua cake vei kedaru. O cei o kila e uasivi vei kedaru?— Na Kalou o Jiova. Vakacava o Luvena, na Qasenivuli Levu? E uasivi beka vei kedaru?— Io, e uasivi tale ga.

Rau bula vata voli kei na Kalou mai lomalagi o Jisu. E luve ni Kalou vakayalo, se agilosi o koya. E buli ira tale beka ga e so tale na agilosi, se luvena vakayalo, na Kalou?​— Io, e bulia e vica vata na milioni na agilosi. Era uasivi ra qai kaukaua vei keda na agilosi.​—Same 104:4; Taniela 7:10.

O se nanuma tiko na yaca ni agilosi a vosa vei Meri?— O Keperieli. A tukuna vei Meri ni na vakatokai na luvena me Luve ni Kalou. Na Kalou a biuta na bula i Luvena vakayalo ina kete i Meri me rawa kina vei Jisu me sucu e vuravura.​—Luke 1:26, 27.

Na cava erau tukuna beka vei Jisu o Meri kei Josefa?

O vakabauta na cakamana oya? O vakabauta ni a bula voli kei na Kalou o Jisu mai lomalagi?​— Oqori sara ga na ka e tukuna o Jisu. E kila vakacava o koya? Ni se gone, e rairai tukuna vua o Meri na ka e tukuna na agilosi. De a tukuna tale ga vei Jisu o Josefa ni tama i Jisu dina na Kalou.

Ni papitaiso o Jisu, e tukuna sara ga mai lomalagi na Kalou: “Oqo na noqu gone.” (Maciu 3:17) Ena bogi ni bera nona mate, a masu vaka  oqo o Jisu: “Tamaqu, ni vakarokorokotaki au me daru tiko vata, e na vakarokoroko sa tu vei au ni daru a tiko vata ni sa sega ni caka ko vuravura.” (Joni 17:5) Io, e kerea o Jisu me vakasukai me lai bula tale kei na Kalou e lomalagi. Ena lai bula rawa vakacava e kea?​— Kevaka ga e veisautaki koya na Kalou o Jiova me ka bula vakayalo, se agilosi.

Au via tarogi iko ena dua na taro bibi. Era vinaka kece beka na agilosi? Na cava o nanuma?​— Dua na gauna era se vinaka kece. Baleta ni a buli ira o Jiova, qai vinaka kece na veika e bulia. Ia e qai vuki me ca e dua na agilosi. E yaco vakacava oya?

Me saumi na taro oya, eda na lesu tale ina gauna e buli rau kina na imatai ni tagane kei na yalewa, o Atama kei Ivi, na Kalou. So era kaya ni kedrau itukutuku e italanoa buli ga. Ia e kila na Qasenivuli Levu ni oya e itukutuku dina.

Ni buli rau oti o Atama kei Ivi na Kalou, e biuti rau ena dua na were totoka e yacana o Iteni. E vaka na basenikau, e parataisi. Ke a rawa me levu sara na luvedrau, ra qai bula vakavuvale e Parataisi me tawamudu. Ia e tiko e dua na ivakavuvuli bibi me rau vulica. Daru sa veivosakitaka oti. Daru raica mada se daru se nanuma tiko se sega.

A rawa vakacava vei Atama kei Ivi me rau bula tawamudu e Parataisi?

 E tukuna vei Atama kei Ivi o Jiova ni rawa me rau kania na vuanikau ga erau vinakata mai na were. Ia me rau kua ga ni kania na vua ni dua na kau. E tukuna vei rau na Kalou na ka ena yacovi rau ke rau kania. E kaya: ‘Drau na mate vakaidina.’ (Vakatekivu 2:17) Na cava gona na ivakavuvuli e vinakati me rau vulica o Atama kei Ivi?​—

Me rau talairawarawa. Io, e vakatau na noda bula ina noda talairawarawa vua na Kalou o Jiova! Sega ni gadrevi ga me rau dau tukuna o Atama kei Ivi ni rau talairawarawa vua. Ia me rau talairawarawa dina sara ga. Ke rau talairawarawa vua na Kalou, rau na vakaraitaka ni rau lomani koya, rau vakadonuya tale ga me liutaki rau. Sa na qai rawa me rau bula tawamudu e Parataisi. Ia ke rau kania na vuanikau oya, na cava ena vakaraitaka?​—

Ena vakaraitaka ni rau sega ni bau vakavinavinakataka na veika e solia vei rau na Kalou. Ke o tiko e kea o na talairawarawa beka vei Jiova?​— Rau a talairawarawa mada o Atama kei Ivi. Ia e dua e uasivi vei rau e qai vakaisini Ivi. E uqeti Ivi me talaidredre vei Jiova. O kila se o cei oya?​—

O cei e vakavuna me vosa na gata vei Ivi?

 E vakaraitaka na iVolatabu ni a vosa vei Ivi e dua na gata. Ia o kila vinaka ni sega ni dau vosa na gata. E qai vosa ga vakacava?​— E vakavuna e dua na agilosi me vaka e vosa tiko na gata. Ia e vosa tiko mai na agilosi. Sa vakasamataka tu na veika tawadodonu na agilosi oya. E vinakata me rau sokalou vua o Atama kei Ivi. E vinakata me rau vakarorogo vua. E via taura na itutu ni Kalou.

Mani vakamuai Ivi cala na agilosi ca oya. Ni vakayagataka na gata, e kaya vei Ivi: ‘E lasutaki iko na Kalou. O na sega ni mate ke o kania na vuanikau. O na qai vuku ga me vaka na Kalou.’ Vakacava o iko, o vakabauta na ka e tukuna na domo oya?​—

Sa tekivu gadreva o Ivi na ka e sega ni solia vua na Kalou. Mani kania sara na vuanikau e vakatabui. E solia tale ga e so vei Atama. O Atama e sega ni vakabauta na ka e tukuna na gata. Ia e kaukaua cake na nona vinakati Ivi mai na nona lomana na Kalou. E kania tale ga na vuanikau.​—Vakatekivu 3:1-6; 1 Timoci 2:14.

Na cava e qai yacovi rau?​— Rau valavala ca, rau qase, rau qai tini mate sara o Atama kei Ivi. Ni rau sa valavala ca, era valavala ca, ra  qase, ra qai mate tale ga na luvedrau kece. A sega ni lasu na Kalou! E vakatau gona na bula ina noda talairawarawa vua. (Roma 5:12) E vakaraitaka na iVolatabu ni yaca ni agilosi a lasu oya o Setani na Tevoro, kei ira na agilosi ca tale e so mera timoni.​​—Jemesa 2:19; Vakatakila 12:9.

Cava e yacovi rau o Atama kei Ivi ni rau talaidredre vua na Kalou?

O sa qai kila se cava e ca kina na agilosi vinaka e bulia na Kalou?​— E vakasamataka na veika ca. E vinakata me rogo. E kila ni a tukuna na Kalou vei rau o Atama kei Ivi me rau vakaluveni, e vinakata mera sokalou kece vua. E vinakata na Tevoro meda talaidredre kece vei Jiova. Oya na vuna e saga kina meda vakasama ca.​—Jemesa 1:13-15.

E kaya na Tevoro ni sega ni bau dua e lomani Jiova. E kaya ni daru sega ni lomana na Kalou, daru sega tale ga ni via muria na vosa ni Kalou. E kaya nida na talairawarawa ga vei Jiova ke rawarawa vei keda. E dina beka na Tevoro? Eda vaka beka oya?

E kaya na Qasenivuli Levu ni lasu na Tevoro! E vakadinadinataka o Jisu ni lomani Jiova dina baleta ni a talairawarawa vua. E sega ni talairawarawa vua na Kalou o Jisu ena gauna ga e rawarawa kina vua. E talairawarawa tu ga, okati kina ena gauna era saqati koya kina e so. E yalodina tiko ga vei Jiova me yacova ni mate. Oya na vuna e vakaturi koya kina na Kalou me bula tawamudu.

O cei e keda meca levu duadua?​— Io, o Setani na Tevoro. O rawa ni raici koya?​— Sega, e sega ni rawa! Ia eda kila ni tiko dina o koya. E uasivi qai kaukaua cake vei keda. Ia o cei e uasivi cake vua na Tevoro?​— Na Kalou o Jiova. Eda kila gona ni na taqomaki keda na Kalou.

Wilika na kena ivakamacala o koya meda sokalou vua: Vakarua 30:19, 20; Josua 24:14, 15; Vosa Vakaibalebale 27:11; kei na Maciu 4:10.