Raica sara na lewena

Raica na lewenivola

 WASE 47

Eda Kila Vakacava ni sa Voleka na Amaketoni?

Eda Kila Vakacava ni sa Voleka na Amaketoni?

O KILA se cava na ivakatakilakila?— Daru wilika ena Wase 46 na ivakatakilakila e solia na Kalou me baleta nona sega ni luvuca tale na vuravura ena waluvu. Eratou kerea tale ga na yapositolo na ivakatakilakila me ratou kila kina ni sa lesu mai o Jisu kei na kena sa voleka na vakataotioti kei vuravura.​—Maciu 24:3.

Ni sega ni laurai rawa o Jisu mai lomalagi, ena vinakati na ivakatakilakila e raici rawa me vakaraitaka ni sa tekivu veiliutaki o koya. Mani tukuna o Jisu vei ira na nona tisaipeli e so na ka mera yadrava se namaka e vuravura. Nira sa laurai na veika oya, ena kena ibalebale ni sa lesu mai o koya, sa tekivu veiliutaki tale ga mai lomalagi.

Ni vakaraitaka na bibi ni nodra yadra tiko na nona tisaipeli, e tukuna o Jisu: “Raica na lolo, kei  na veikau kecega; ni ra sa tubu, dou sa raica ka kila kina vakai kemudou ni sa voleka na vula i katakata.” O dau kila sa voleka na vulaikatakata. O na rawa tale ga ni kila ni sa voleka na Amaketoni ni o raica na veika e tukuna o Jisu.​—Luke 21:29, 30.

Na ivakavuvuli cava e via vakaraitaka o Jisu ni cavuta na vu ni lolo?

Ena tabana oqo kei na tabana e tarava, eda na raica kina na kedra iyaloyalo e so na ka e tukuna o Jisu me ivakatakilakila ni kena sa voleka na Matanitu ni Kalou. Nira yaco kece na veika oqo,  sa na qai vakarusai ira na veimatanitu na Matanitu ni Kalou ena liga i Karisito, me vaka daru wilika ena Wase 46.

Raica vinaka na iyaloyalo ena rua na tabana sa oti, me daru veitalanoataka mada. O rawa ni wilika na veika o raica ena iyaloyalo oqori ena Maciu 24:6-14 kei na Luke 21:9-11. Kauaitaka tale ga na naba lalai ena iyaloyalo yadua. E laurai tale ga na naba oqori ena itekivu ni parakaravu e vakamacalataki kina na iyaloyalo. Daru raica mada se ra sa vakayacori tiko ena noda gauna se sega, na veika e tukuna o Jisu me ivakatakilakila.

(1) E kaya o Jisu: “Dou na rogoca nai valu, kei nai rogorogo ni valu; . . . ni na veibolebolei na veivanua eso, kei na veimatanitu eso.” O sa bau rogoca na kena yaco na ivalu?— E yaco na iMatai ni iValu Levu ena 1914 ina 1918, kei na iKarua ni iValu Levu ena 1939 ina 1945. E sega ni dau yaco e liu na ivalu vaka oqo! Ena gauna oqo sa yaco tu ga e veiyasa i vuravura na ivalu. Eda rogoca ena retioyaloyalo kei na retio e veisiga, se eda wilika ena niusiveva.

(2) E kaya tale ga o Jisu: “Ena yaco talega na dausiga . . . e na yasana e vuqa.” O na rairai kila ni levu na tamata e lailai sara na kedra kakana. Era mate e vica vata na udolu e veisiga baleta ni lailai na kedra kakana.

(3) Kuria o Jisu: ‘Ena yaco tale ga na mate ca ena veivanua e so.’ O kila se cava na mate ca?— Na mate se tauvimate e vakamatei ira e levu na tamata. E dua na mate ca e vakatokai me misila levu e vakamatei ira e rauta ni 20 na milioni ena loma beka ga ni dua na yabaki. Ena noda gauna e vakabauti ni levu cake sara era na mate ena AIDS. Sa qai tiko tale na kenisa, mateniuto, kei na veimate e so e vakamatei ira e vica vata na udolu ena veiyabaki.

(4) E vakaraitaka o Jisu e dua tale na tiki ni ivakatakilakila: ‘E  na yaco . . . na uneune e na veivanua e vuqa.’ O kila se cava na uneune?— Na uneune e dau vakavuna me yavavala na qele o butuka tiko. E vakavuna me bale na vale, ra qai mate kina na tamata. Sa qai levu ga na uneune me tekivu mai na yabaki 1914. O sa bau rogoca na kena yaco na uneune?—

(5) E tukuna o Jisu ni dua tale na tiki ni ivakatakilakila na ‘tubu vakalevu ni ivalavala ca.’ Oya na vuna sa qai levu ga kina na butako kei na itovo kaukaua. Era lomaleqataka kece na tamata na kena rawa ni butakoci na nodra vale. Sa qai torocake ga ena gauna oqo ena veiyasa i vuravura na basulawa kei na itovo kaukaua.

(6) E vakaraitaka o Jisu e dua na tiki bibi ni ivakatakilakila ena nona kaya: “Ena vunautaki mada e vuravura taucoko nai tukutuku-vinaka oqo kei na matanitu, mei vakadinadina ki na veivanua kecega; sa na qai yaco emuri nai vakataotioti.” (Maciu 24:14) Ke o vakabauta dina na ‘itukutuku vinaka’ oqo, e dodonu mo tukuna tale ga yani. Oya na sala o rawa ni vakaitavi kina ena kena vakayacori na tiki ni ivakatakilakila oqo.

So era na rairai kaya ni veika e parofisaitaka o Jisu era sa dau yaco tu ga mai e liu. Ia era se sega vakadua ni bau yaco kece ena levu na veiyasa i vuravura ena loma ni dua ga na gauna. O sa raica rawa na ibalebale ni ivakatakilakila?— E kena ibalebale ni gauna eda sa raica kina na vakayacori ni veika kece oya, sa na voleka ni sosomitaki na vuravura ca oqo ina vuravura vou ni Kalou.

Ni solia na ivakatakilakila oya o Jisu, e cavuta tale ga e dua na gauna ena loma ni yabaki. E kaya: “Dou masulaka me kakua mada ga ni yaco na nomudou dro oqori e na vula i liliwa.” (Maciu 24:20, VV) Na cava o nanuma e kaya tiko?—

 Ke dua e dro ena vulaililiwa, ni dau dredre se rerevaki kina na veilakoyaki, na cava e rawa ni yaco?— Kevaka e mani dro rawa, sa na bau vaka toka oya. Ena sega beka ni ka vakaloloma me dua e mate ena vulaililiwa, baleta ni a rairai osooso tiko ena nona vakacakava na veika e so e vakavuna nona sega ni dro totolo?—

Na ivakavuvuli cava e vakaraitaka tiko o Jisu ni cavuta na dro ena vulaililiwa?

O raica rawa na vuna e tukuna kina o Jisu me kakua ni waraki sara na vulaililiwa me qai caka na dro?— E vakaraitaka tiko vei keda meda kua ni lokuyarataka na noda vakadinadinataka nida lomana na Kalou ena noda qaravi koya, vakabibi nida sa kila tiko ni sa voleka na Amaketoni. Kevaka eda lokuyara, de dua sa na bera. Ena rawa meda vakataki ira ena gauna ni Waluvu levu era rogoci Noa ia era sega ni vodo i waqa.

Daru na veitalanoataka tarava na ka ena yaco ni sa oti na ivalu levu na Amaketoni. Daru na vulica kina na veika e vakarautaka na Kalou me baleti keda na qaravi koya tiko.

Oqo na tikinivolatabu erau vakaraitaka tale ga ni sa voleka na Amaketoni: 2 Timoci 3:1-5 kei na 2 Pita 3:3, 4.