Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 29

E Vakadonuya Beka na Kalou na Pati Kece?

E Vakadonuya Beka na Kalou na Pati Kece?

Na cava e marautaka kina na Kalou na pati oqo?

O DAU taleitaka na lako ina pati?— Eda dau marautaka na tiko ena pati. E vinakata beka na Qasenivuli Levu meda lako ina pati?— A lako o koya kei na so na nona tisaipeli ina dua na soqo ni vakamau e rawa ni vakatokai me pati. O Jiova e “Kalou mamarau,” ena marau o koya ke da marautaka e dua na pati vinaka.​—1 Timoci 1:11, NW; Joni 2:1-11.

Na tabana e 29 ni ivola oqo e vakaraitaka na nona wasea rua na Wasa Damudamu o Jiova mera takosova rawa na Isireli. O se nanuma tiko oya?— Nira yaco i tai kadua, era lagasere ra qai meke nira vakavinavinaka vei Jiova. E vaka sara ga e dua na pati. Era marau dina na Isireli, e sega ni vakabekataki ni a marau tale ga na Kalou.​—Lako Yani 15:1, 20, 21.

Ni oti e voleka ni 40 na yabaki, era tiko ena dua na pati vakaitamera na Isireli. O ira na veisureti ina pati oqo era sega mada ga ni sokalou vei Jiova. Era sokalou vei ira na kalou tani, era dau veiyacovi tale ga kei ira e sega ni watidra. E dodonu beka mera lako ina pati vaka oya na Isireli?— A sega ni marautaka o Jiova na pati oya, e mani cudruvi ira na Isireli.​—Tiko Voli Mai na Lekutu 25:1-9; 1 Korinica 10:8.

 E tukuni tale ga ena iVolatabu e rua na pati ni siganisucu. E dua beka vei rau e vakananumi kina na siga e sucu kina na Qasenivuli Levu?— Sega. E pati ni nodrau siganisucu na tamata erau sega ni qaravi Jiova. E dua vei rau e pati ni siganisucu nei Tui Eroti Anitipasa. E iliuliu ni vanua o Kalili, ena gauna e bula voli kina o Jisu.

E levu sara na ka ca e cakava o Tui Eroti. E kauti wati tacina mai me mai watina. E yaca i yalewa o Erotiasa. A tukuna vei Eroti na dauveiqaravi ni Kalou o Joni na Dauveipapitaisotaki ni cala na ka e cakava oya. Sega ni marautaka o Eroti na vosa oya. E mani biuti Joni kina i valeniveivesu.​—Luke 3:19, 20.

E vakananumi na siganisucu nei Eroti ni tiko e valeniveivesu o Joni. E vakarautaka o Eroti e dua na pati vakaitamera. E sureti ira e levu na tamata rogo. Era kana ra gunu ra qai marau. Sa qai meketi ira na luve i Erotiasa. Nira marautaka kece na nona meke oya, e vinakata o Tui Eroti me solia vua e dua na iloloma. E bubului vua na goneyalewa: ‘Na ka ga o kerea vei au, au na solia vei iko, ke mani veimama sara mada ga ni noqu matanitu.’

 Na cava beka ena kerea? Ena kerea beka na ilavo? Na isulu totoka? Me dua nona vale totoka? E sega ni vakatulewataka rawa na ka me kerea. E gole vei tinana o Erotiasa me taroga: ‘Na cava beka meu kerea?’

E kaukaua sara nona dau cati Joni na Dauveipapitaisotaki o Erotiasa. E mani tukuna vei luvena me kerea na ulu i Joni. E tukuna o goneyalewa vua na tui: ‘Au vinakata mo ni solia sara ga mai vei au oqo na ulu i Joni na Dauveipapitaisotaki ena dua na dari.’

A sega ni via vakamatei Joni o Tui Eroti baleta e kila ni tamata vinaka. Ia sa bubului oti o Eroti, e rerevaka tale ga na ka era na tukuna na tiko ena pati ke veisautaka na lomana. Sa mani tala e dua me lai tamusuka na ulu i Joni mai valeniveivesu. Sega ni dede sa kauta mai na ulu i Joni ena dua na dari qai solia vua na goneyalewa. E solia sara vei tinana o goneyalewa.​—Marika 6:17-29, VV.

E viavia tautauvata na ka e yaco ena ikarua ni pati ni siganisucu e tukuni ena iVolatabu. E nona pati ni siganisucu na tui Ijipita. E tamusuki tale ga na ulu ni dua na tamata ena pati oya. Oti oya sa qai vakalilici na yagona mera kania na manumanu vuka!  (Vakatekivu 40:19-22) A vakadonuya beka na Kalou na pati ruarua oya?— O na via tiko ena pati vaka oya?—

Na cava e yaco ena nona pati ni siganisucu o Eroti?

Eda kila ni veika e volai ena iVolatabu e tiko na kena yaga. E cavuti ga kina e rua na pati ni siganisucu. E tiki tiko ni kena marautaki na veika ca e yaco kina. O koya gona, na cava e vakaraitaka tiko vei keda na Kalou me baleta na pati ni siganisucu? E nakita beka na Kalou meda marautaka na noda siganisucu?—

E dina ni sega ni dau tamusuki na ulu ni tamata ena gauna e caka kina na pati ena noda gauna. Ia meda nanuma tiko ni o ira na tekivutaka na vakananumi ni siganisucu era sega ni qarava na Kalou dina. E kaya na Catholic Encyclopedia me baleta na marautaki ni siganisucu e cavuti ena iVolatabu: “O ira ga na tamata ivalavala ca . . . era dau caka soqo ni siganisucu.” Eda vinakata beka meda vakataki ira?—

Vakacava na Qasenivuli Levu? E marautaka beka nona siganisucu?— Sega, e sega ni bau vakaraitaka na iVolatabu ni a caka e dua na pati ni siganisucu nei Jisu. Era sega mada ga ni vakananuma na siganisucu i Jisu na nona imuri taumada. O kila na vuna era qai digitaka kina na tamata mera vakananuma na siganisucu i Jisu ena 25 ni Tiseba?—

E digitaki na tikinisiga oqori baleta e kaya na World Book Encyclopedia, “era dau vakananuma kina na kai Roma na Magiti kei Saturn, me marautaki kina na siganisucu ni matanisiga.” O koya gona, e digitaki me marautaki na siganisucu i Jisu ena nodra siga ni olodei na sega ni lotu Vakarisito!

O kila na vuna ena sega kina ni rawa me sucu o Jisu ena vula o Tiseba?— E kaya na iVolatabu ni gauna e sucu kina o Jisu, era tu mai na veico e tuba ena bogi na ivakatawa ni sipi. (Luke 2:8-12) Ena sega ni rawa mera tu e kea baleta ni batabata qai ucauca na vula o Tiseba.

Na cava e sega kina ni rawa ni sucu o Jisu ena 25 ni Tiseba?

 Levu era sa kila ni sega ni sucu o Jisu ena Kirisimasi. Era bau kila tale ga ni siga oya era dau marautaka kina na sega ni lotu Vakarisito e dua na ka e sega ni vinakata na Kalou. Ia e levu era se marautaka ga na Kirisimasi. Era kauaitaka cake ga na pati e dau caka kina mai na nodra vaqaqa se cava e kaya na Kalou me baleta na siga oya. Ia o keda eda via vakamarautaki Jiova ga, se vakaevei?—

O koya gona nida lako ina pati se caka pati, meda vakadeitaka ni pati oya e vakadonuya na Kalou. E rawa tale ga nida pati ena dua ga na gauna ena loma ni yabaki. E sega ni vinakati meda waraka sara e dua na tikinisiga. E rawa nida kania kina na kakana eda dau taleitaka da qai marau tale ga. O taleitaka oya?— E rawa mo kerei rau nomu itubutubu me rau navuca e dua nomudou pati. Ena uasivi sara oya, se vakaevei?— Ia ni bera ni dou lalawataka e dua na pati, dou vakadeitaka mada ni na vakadonuya na Kalou.

Eda na vakadeitaka vakacava ni vakadonuya na Kalou na noda pati?

E vakaraitaki ena Vosa Vakaibalebale 12:2; Joni 8:29; Roma 12:2; kei na 1 Joni 3:22 na bibi ni noda dau cakava na ka e vakadonuya na Kalou.