Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 32

E Taqomaki Vakacava o Jisu?

E Taqomaki Vakacava o Jisu?

SO NA gauna e dau veivakurabuitaki na nona veitaqomaki o Jiova vei ira na lalai era sega ni taqomaki ira rawa. Kaya mada o gade ena loma ni vanua, o na rawa beka ni raica kina e dua na ivakaraitaki ni nona veitaqomaki o Jiova. O na rairai sega ni vakila taumada ni ka e yaco oya e ivakaraitaki ni nona veitaqomaki.

O raica ni mai ro ena qele volekati iko e dua na manumanu vuka. E kena irairai ni vaka e mavoa ni yaraka tiko e dua na tabana. Ia, ni o volekati koya yani e lai toso sara tiko o koya. E toso tiko ga e liu ni o volekati koya yani. Vakasauri ga sa vuka. E sega bagi ni mavoa na tabana! O kila na ka e cakava tiko na manumanu vuka oya?—

Eratou vuni toka e veico na luvena lalai volekata na vanua e mai ro kina oya. E rerevaka na tina ni manumanu oya de o raici iratou na luvena o qai vakamavoataki iratou. Oya na vuna e mai lasutaki mavoa kina qai kauti iko tani tiko. O kila se o cei e rawa ni taqomaki keda me vaka nona taqomaka na luvena lalai na manumanu vuka oya?— E vakatauvatani ena iVolatabu o Jiova me vaka na ikeli, e dau taqomaka na luvena lalai.​—Vakarua 32:11, 12.

E taqomaki ira tiko vakacava na luvena lalai na tina ni manumanu oqo?

 O Jisu e Luvena e vakamareqeta duadua o Jiova. A ka bula vakayalo me vakataki Tamana o Jisu ni se tu mai lomalagi. A rawa me taqomaki koya ga. Ia ni sa mai sucu o Jisu e vuravura e sega ni taqomaki koya rawa. E gadreva ena gauna oya na veitaqomaki.

Me rawa ni qai cakava na veika e vinakata na Kalou e vuravura, a vinakati me tubu cake me tamata uasivi o Jisu. Ia a saga o Setani me vakamatei Jisu koso. E veivakurabuitaki na italanoa ni nona sagai me vakamatei o Jisu ni se gonelailai kei na nona taqomaki koya o Jiova. O via rogoca na italanoa oya?—

Ni sa sucu oti o Jisu, e vakavuna o Setani me laurai e dua na ka e vaka na kalokalo ena yasayasa vaka natuicake. Eratou muria tiko mai na kalokalo oqo na dauraikalokalo ena vica vata na drau na kilomita me yacova ni ratou basika e Jerusalemi. Eratou taroga ena koro na vanua e sucu kina na nodra tui na Jiu. Nira tarogi o ira na kila na ka e kaya na iVolatabu, era sauma: “Mai Peceliema.”​—Maciu 2:1-6, VV.

Ni ratou sa sikovi Jisu na dauraikalokalo, na cava e vakasalataki iratou kina na Kalou me bula kina o Jisu?

 Ni rogoca na tui ca kei Jerusalemi o Eroti ni sa sucu ena dua na koro volekati Jerusalemi na tui vou oqo, e tukuna vei iratou na dauraikalokalo: ‘Ni dou sa kunea na gone, dou mai tukuna vei au.’ O kila na vuna e via kila kina o Eroti na vanua e tiko kina o Jisu?— Baleta ni vuvutaki koya o Eroti, e via vakamatei Jisu tale ga!

A taqomaki Luvena vakacava na Kalou?— Ni ratou sa kunei Jisu na dauraikalokalo, eratou soli iloloma vei Jisu. E qai vakasalataki iratou na Kalou ena tadra me ratou kua ni suka tale vei Eroti. Eratou lesu tale ina nodratou vanua ena dua tale na gaunisala e sega ni lako i Jerusalemi. E cudru vakalevu o Eroti ni sa kila ni ratou sa lesu na dauraikalokalo. Ni saga me vakamatei Jisu, e vakarota o Eroti mera vakamatei kece na gonetagane yabaki rua ka lako sobu e Peceliema! Ia sa yali e kea o Jisu.

O kila se bula vakacava o Jisu?— Ni ratou lesu ga i nodratou vanua na dauraikalokalo, o Jiova e vakasalataki Josefa na wati Meri me ratou dro ina vanua yawa o Ijipita, me rawa kina ni yawaki Eroti o Jisu. Ni oti e vica na yabaki, ni ratou sa biuti Ijipita tale mai o Meri, Josefa, kei Jisu, e vakasalataki Josefa tale na Kalou. E tukuna vua ena tadra me ratou lai vakaitikotiko e Nasareci, me rawa ni bula kina o Jisu.—Maciu 2:7-23.

E vakabulai tale vakacava o Jisu?

O sa raica na sala e taqomaki Luvena kina o Jiova?— O cei e vaka na luve ni manumanu vuka lalai a vunitaki ira o tinadra e veico se e vakataki Jisu ni se gonelailai? O sega beka  ni vakataki ira?— Era tu e so era via vakaleqai iko tale ga. O kilai ira?—

E kaya na iVolatabu ni o Setani e vaka na laione e tagi voli e via kani keda. Me vaka nona dau sagai ira na manumanu lalai na laione, e dau sagai ira na gonelalai o Setani kei ira na nona timoni. (1 Pita 5:8) Ia e kaukaua cake vei Setani o Jiova. E rawa ni taqomaki ira na luvena o Jiova se vakaseva na inaki ca i Setani.

O se nanuma tiko na ka e tukuna na Wase 10 ni ivola oqo e dau saga o Setani meda cakava?— Io, e saga meda veiyacovi, ena kena ivalavala e sega ni vakadonuya na Kalou. Ia, o cei ga e dodonu me veiyacovi?— Na tagane kei na yalewa erau sa vakamau.

Ia e ka ni rarawa ni dau so vei ira na uabula era dau veiyacovi kei ira na gone. Oqo e vakavuna mera dau cakava kina e so na gonetagane kei na goneyalewa na veika ca era vulica vei ira na uabula. Era tekivu vakayagataka cala kina na nodra gacagaca ni veiyacovi. Oqori sara ga na ka e yaco ena dua na gauna makawa ena koro o Sotoma. E kaya na iVolatabu ni o ira na tagane ni koro oya, “na gone kei na qase,” era via veiyacovi kei rau na tagane erau mai sikovi Loti.​—Vakatekivu 19:4, 5.

Me vaka nona taqomaki o Jisu, e dodonu tale ga mo taqomaki mai vei ira na uabula, vaka kina vei ira na gone, era na saga mera veiyacovi kei iko. O ira oqori era na lasutaka nira nomu itokani. Era na solia beka vei iko e dua na ka kevaka o yalataka mo na sega ni tukuna vua e dua na ka era via cakava vei iko. O ira oqori era daunanumi ira ga, me vakataki Setani kei na nona timoni, nira vinakata ga mera vakacegui ira. Era vakacegui ira ena nodra veiyacovi kei ira na gone. Oqo e cala bibi sara!

O kila na ka era na cakava mera vakacegui ira kina?— De ra na  via vakayamoca na nomu gacagaca ni veiyacovi. Se e rawa sara ga mera masia na nodra gacagaca ni veiyacovi ina nomu. Kua sara ni vakatara e dua me tara na nomu gacagaca ni veiyacovi. Me kua sara mada ga ni o tuakamu, ganemu, tinamu, se tamamu.

Na cava mo kaya o qai cakava ke dua e via tara na nomu gacagaca ni veiyacovi?

O rawa ni taqomaka vakacava na yagomu vei ira na via cakava vei iko na veika ca vaka oya?— Kua sara ga ni vakatara e dua me tara na nomu gacagaca ni veiyacovi. Ke dua e tovolea me cakava oqori, tukuna vakadodonu vua ena domo levu: “Kua! Au na tukuni iko!” Ke tukuna ni ka e yaco oya e bale vei iko, kua ni vakabauti koya. E sega ni dina oya. Lai tukuni koya ga, veitalia se o cei o koya! Tukuni koya ga veitalia ke mani kaya ni ka drau cakava oya e nomudrau ka lo. Ke yalataka me solia vei iko e so na iloloma vinaka se mani vakarerei iko, lako tani mai vua qai lai tukuni koya.

Mo kua ni rere, ia mo qaqarauni tale ga. Ke rau vakasalataki iko nomu itubutubu mo kua ni lako vei ira na tamata se vanua rerevaki, rogoci rau. Ke o rogoci rau, ena sega ni vakacacani iko e dua.

Wilika na sala mo taqomaki iko kina mai na veiyacovi e cala, ena Vakatekivu 39:7-12; Vosa Vakaibalebale 4:14-16; 14:15, 16; 1 Korinica 6:18; kei na 2 Pita 2:14.