Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 21

E Dodonu Beka Meda Dokadokataka e Dua na Ka?

E Dodonu Beka Meda Dokadokataka e Dua na Ka?

NA CAVA na ibalebale ni dokadoka? O kila?— Oqo e dua na kena ivakaraitaki. O sa bau tovolea ni cakava e dua na ka o sega ni kila vinaka na kena icakacaka? De o saga beka mo caqeta na polo ni soka. Se o tovolea mo vodo basikeli. E dua beka e dredrevaki iko qai kaya, ‘Au vinaka cake sara vei iko’?— O koya e cavuta na vosa oqori e dokadoka.

Vakacava ke dua e cavuta vei iko na vosa oya? O taleitaka?— Na cava o nanuma era na kaya e so kevaka o dokadokai iko?— E ka vakayalololoma beka meda tukuna vua e dua, “Au vinaka cake vei iko”?— E taleitaki ira beka o Jiova o ira na tukuna na vosa oya?—

E kilai ira vinaka na Qasenivuli Levu o ira na kaya nira uasivi vei ira tale e so. Era dokadoka ra qai raici ira sobu na vo ni tamata. Dua na siga sa qai talanoataka vei ira o Jisu na ca ni nodra dokadokai ira. Daru rogoca mada.

Na italanoa oqo e baleta e dua na Farisi kei na dua na daukumuni ivakacavacava. O ira na Farisi era iliuliu ni lotu era dau cakava na ka me nanumi kina nira yalododonu ra qai vinaka cake vei ira na so. Na Farisi ena italanoa oqo nei Jisu e lako cake ina valenisoro ni Kalou e Jerusalemi me lai masu.

Cava e vakadonuya kina na Kalou na daukumuni ivakacavacava, sega ni Farisi?

E kaya o Jisu ni a lako cake tale ga e dua na daukumuni ivakacavacava me lai masu. E levu era sega ni dau taleitaki ira na daukumuni ivakacavacava. Era vakabauta nira dau veidabui na daukumuni ivakacavacava.  E so na daukumuni ivakacavacava era sega dina ni dau cakacaka vakadodonu.

E tekivu masu vakaoqo na Farisi ena valenisoro: ‘Kemuni na Kalou, au vakavinavinakataki kemuni baleta niu sega ni tamata ivalavala ca me vakataki ira na tani. Au sega ni dabuitaki ira na tamata se cakava na veika e ca. Au sega ni vakataki koya na daukumuni ivakacavacava oya. Au tamata yalododonu. Au sega ni kana ena rua na siga e veimacawa me levu kina na gauna ni noqu vakasamataki kemuni. Au solia tale ga e valenisoro e duanaikatini ni ka au rawata.’ E vakabauta na Farisi oya ni uasivi cake vei ira na tani, se vakaevei?— E bau tukuna tale ga vua na Kalou.

Ia e sega ni vakataki koya na daukumuni ivakacavacava. Ni masu, e sega mada ga ni tacake i lomalagi. E tucake sara tu mai muri qai cuva sobu. E rarawataka na daukumuni ivakacavacava na nona valavala ca, e tavia na serena ena levu ni nona rarawa. E sega ni tukuna vua na Kalou ni tamata vinaka. E kaya ga ena nona masu: ‘Kemuni na Kalou, ni lomani au mai niu tamata ivalavala ca.’

O cei vei rau oqo o nanuma ni vakadonuya na Kalou? O koya beka na Farisi, e nanuma ni tamata ivalavala vinaka? Se o koya na daukumuni ivakacavacava, e rarawataka na ivalavala ca e cakava?—

E kaya o Jisu ni Kalou e vakadonui koya na  daukumuni ivakacavacava. Baleta? E vakamacalataka o Jisu: ‘O koya e vakalevulevui koya ena vakalolovirataki kei koya e vakalolovirataki koya ena vakalevulevui.’​—Luke 18:9-14.

Na cava e vakavuvulitaka o Jisu ena italanoa oqo?— E vakavuvulitaka ni sega ni dodonu meda nanuma nida vinaka cake vei ira tale e so. Eda sega beka ni kaya nida vinaka cake, ia e rawa ni vakilai ga ena noda ivalavala. Sa bau vaka tale beka ga oya na nomu ivalavala?— Vakasamataka mada na yapositolo o Pita.

Ni tukuna o Jisu vei iratou nona yapositolo ni ratou na vakanadakui koya ena gauna e vesu kina, e kaya o Pita ena nona dokadoka: ‘Kevaka eratou vakanadakui iko kece, au na sega!’ Ia e cala o Pita. E rui nuitaki koya vakasivia. E vakanadakui Jisu tale ga. Ia e qai saumaki mai, me vaka eda na raica ena Wase 30 ni ivola oqo.​—Maciu 26:31-33.

Daru raica mada e dua na kena ivakaraitaki ena gauna oqo. Drau tarogi beka kei na dua na lewe ni nomu kalasi ena dua na taro mai koronivuli. Vakacava ke o rawa sara ga ni sauma na taro ena gauna oya, ia e sega ni sauma rawa na nomu icaba? O na marau baleta ni o kila na isau ni taro. E ka vakayalololoma beka mo vakatauvatani iko kei na dua e dredre ni sauma na taro?— E dodonu beka mo dokadokai iko vua na nomu icaba?—

Oya na ka e cakava na Farisi. E dokadokataka nona kaya ni vinaka cake vua na daukumuni ivakacavacava. Ia e tukuna na Qasenivuli Levu ni cala na Farisi. E rawa ni vinaka cake na ka e cakava e dua na tamata mai vua tale e dua. Ia e sega ni kena ibalebale oya ni o koya e tamata vinaka cake.

O vinaka cake beka ke levu cake na ka o kila?

O koya gona ke levu cake na ka o kila vua e dua, e dodonu beka mo dokadoka?— Vakasamataka mada. Eda dui bulia beka na noda mona?— Sega, e solia na noda mona na Kalou. E levu tale ga na ka eda sa kila tu oqo eda vulica vua e dua. Eda rairai wilika ena ivola. Se  e rairai tukuna beka vei keda e dua. Ke da mani kila ga vakataki keda e so na ka, eda rawata vakacava oqori?— Nida vakayagataka na mona e solia vei keda na Kalou.

Ke dua e sasaga tiko vakaukaua, tukuna vua e so na ka e rawa ni vakauqeti koya. Tukuna vua ni o taleitaka na ka e cakava. De o rawa sara ga ni vukei koya. Oya tale ga na ka o vinakata mera cakava vei iko na tani, se vakaevei?—

Na cava meda kua ni dokadoka kina ke da kaukaua vei ira tale e so?

So era kaukaua cake vei ira tale e so. Vakacava ke o kaukaua cake vua na tacimu se ganemu? E dodonu mo dokadokai iko kina?​— Sega. Na kakana eda kania e vukei keda meda kaukaua. E solia na Kalou na matanisiga, na uca, kei na veika tale e so me bula rawa kina na ka eda kania, se vakaevei?— E dodonu gona meda vakavinavinakataka na Kalou nida kaukaua.​—Cakacaka 14:16, 17.

E sega ni dua e dau via rogoca nodra dokadokai ira e so, se vakaevei?— Meda nanuma dei na vosa i Jisu: ‘Cakava vei ira tale e so na ka o vinakata mera cakava vei iko.’ Kevaka eda cakava oya, eda na sega ni vakataki koya na Farisi dokadoka e talanoataka na Qasenivuli Levu.​—Luke 6:31.

 Dua na gauna e vakatokai Jisu me vinaka e dua na tamata. E kaya beka na Qasenivuli Levu, ‘Io, au vinaka’?— Sega, e sega ni tukuna oya. E tukuna ga: “E sega tale e dua e vinaka, na Kalou duadua ga.” (Marika 10:18, VV) Dina ga ni tamata uasivi na Qasenivuli Levu, e sega ga ni dokadokai koya. E vakalagilagi Jiova ga na Tamana.

E tiko beka e dua e rawa meda vakadokadoka?— Io, e tiko. E rawa nida doka na Dauveibuli, na Kalou o Jiova. Nida raica na totoka ni kena dromu na matanisiga se dua ga na ka e bulia na Kalou e veivakurabuitaki, e rawa nida kaya vua e dua, ‘Oqori na ka e bulia na noda Kalou veivakurabuitaki, o Jiova!’ Meda tu vakarau meda tukuna na veika totoka sa bulia na Kalou kei na veika ena qai cakava ena gauna e se bera mai.

Na cava e qoroya tiko na gonetagane oqo?

Wilika na veika e tukuna na iVolatabu me baleta na dokadoka, se na viavialevu, meda kua kina ni dokadoka: Vosa Vakaibalebale 16:5, 18; Jeremaia 9:23, 24; 1 Korinica 4:7; kei na 13:4.