Raica sara na lewena

Raica na lewenivola

 WASE 16

Na Cava Dina e Bibi?

Na Cava Dina e Bibi?

Na cava e nona leqa na tamata oqo?

DUA na siga e mai raici Jisu e dua na tamata. Ni kila ni rui vuku o Jisu, e mani kaya kina vua: ‘iVakavuvuli, tukuna mada vei tuakaqu me solia vei au e so na ka e taukena.’ E nanuma na tamata oqo ni dodonu me nona e so na ka e taukena o tuakana.

Ke o iko o Jisu, na cava o na kaya?— E raica rawa o Jisu ni tiko e dua nona leqa na tamata oya. E sega ni nona leqa na nona vinakata na ka e taukena o tuakana. E nona leqa ga na nona sega ni kila na ka e bibi dina ina nona bula.

Daru vakasamataka mada oqo. Na cava dina e dodonu me bibi vei keda? Noda taukena beka na iyaya ni vakatatalo vivinaka, na isulu vovou, se veika vaka oya?— Sega, baleta ni tiko e dua na ka e bibi cake sara. Oqo tale ga na ka e vakavuvulitaka o Jisu. Mani talanoataka kina e dua na tamata e guilecava na Kalou. O via rogoca na italanoa oya?—

E tamata vutuniyau dina o koya. E levu nona qele kei na nona vale ni teitei. E bula vinaka nona teitei. Sa lailai na nona vale ni teitei me maroroi kece kina na ka e tamusuka. Na cava e qai cakava? E kaya: ‘Au na basuka na noqu veivale ni teitei meu tara na veivale lelevu cake. Meu rawa ni maroroya kece kina na ka au tamusuka kei na noqu iyaya vinaka kece.’

E nanuma na tamata vutuniyau ni sa dodonu na ka e cakava oya. E nanuma ni ka vakayalomatua na nona maroroya e levu na ka. E kaya: ‘Sa levu  na ka au maroroya rawa. Ena rauti au tiko me vica na yabaki. Au sa na vakacegu mada. Au na kana, gunu, ka marau tiko.’ Ia e dua na ka e leqa ena nona lalawa na tamata vutuniyau. O kila se cava oya?— E nanumi koya ga kei na nona bula marau. E guilecava na Kalou.

Na cava e vakasamataka tiko na tamata vutuniyau oqo?

E mani vosa vua na tamata vutuniyau na Kalou. E kaya: ‘Tamata lialia. O na mate ena bogi nikua. O cei ena qai nona na ka o maroroya tu oqo?’ E rawa beka ni vakayagataka na veika oya na tamata vutuniyau ena gauna sa mate kina?— Sega, sa na taukena e dua tani na tamata. E kaya o Jisu: “Sa na vaka kina vei koya e dau binia na i yau me nona ga, ka sega ni vutuniyau e na mata ni Kalou.”​—Luke 12:13-21, VV.

O na sega ni vinakata mo vakataki koya na tamata vutuniyau oya, se vakaevei?​— E vakaliuca voli ga na veika vakayago ena gauna e bula voli kina. E sega ni dodonu oya. E vinakata me taukena e levu na ka. Ia e sega ni “vutuniyau e na mata ni Kalou.”

 E levu era vakataki koya na tamata vutuniyau. Era vinakata me levu cake na ka era taukena. Ia e rawa ni vakatubu leqa oya. Me kena ivakaraitaki, e tu na nomu iyaya ni vakatatalo, se vakaevei?— Na cava e so na nomu iyaya ni vakatatalo?— Vakacava ke tiko vua na nomu itokani e dua na polo se matakau se dua tale na iyaya ni vakatatalo e sega vei iko? E dodonu beka mo cikevi rau tiko ga na nomu itubutubu me rau volia e dua me nomu?—

De so beka na gauna o taleitaka e dua na nomu iyaya ni vakatatalo. Ia vakacava ke sa dede vakalailai nomu vakayagataka?— Sa vaka e makawa. E rawa ni kasere, o qai sega tale ni vinakata. Ia e dua na ka e uasivi cake mai nomu iyaya ni vakatatalo. O kila se cava oya?—

Na cava e uasivi cake mai na nomu iyaya ni vakatatalo?

Na nomu bula. E bibi cake sara na nomu bula baleta ni kevaka e yali, o na sega ni cakava rawa e dua na ka. Ia e vakatau na nomu bula ena nomu cakava na ka e marautaka na Kalou, se vakaevei?— Meda kua gona ni vakataki koya na tamata vutuniyau lialia e guilecava na Kalou.

Era sega ni cakava ga na gone na ka lialia e cakava na tamata vutuniyau  oya. E levu tale ga na qase era cakava vaka kina. Levu vei ira era via vakuria tiko ga na veika era taukena. Sa tu na kedra kakana ni veisiga, na nodra isulu, kei na vale mera tiko kina. Ia era sega ni lomavakacegu. Era vinakata me levu na nodra isulu. Era vinakata na vale e levu cake. Oqo e vinakati kina na ilavo. Era cakacaka kina vakaukaua me levu na nodra ilavo. Na levu ni ilavo era rawata, na levu tale ga ni nodra vinakata me so tale.

Ena levu ni nodra vaqara ilavo e so sa sega kina na gauna mera vakayagataka kei na nodra vuvale. Sa sega tale ga na gauna mera vakayagataka vua na Kalou. E rawa beka ni vakabulai ira na nodra ilavo?— Sega, e sega ni rawa. E rawa beka mera vakayagataka na nodra ilavo nira sa mate?— Sega. Baleta o ira na mate era sa sega ni rawa ni cakava e dua na ka.—Dauvunau 9:​5, 10.

E kena ibalebale beka oqo ni sega ni dodonu me so na noda ilavo?— Sega. Eda vakayagataka na ilavo me voli kina na keda kei na noda isulu. E kaya na iVolatabu ni ilavo e ivakaruru. (Dauvunau 7:12) Ia eda na leqa ga vakalevu ke da vakaliuca na ilavo. Eda na vakataki koya na tamata vutuniyau lialia oya e kumuna vakalevu na nona iyau ia e sega ni vutuniyau ena mata ni Kalou.

Na cava na ibalebale ni noda vutuniyau ena mata ni Kalou?— E kena ibalebale meda vakaliuca na Kalou nida bula tiko. So era kaya nira vakabauta na Kalou. Era nanuma ni gadrevi ga meda vakabauta. Ia era vutuniyau beka ena mata ni Kalou?— Sega, era vakataki koya ga na tamata vutuniyau e guilecava na Kalou.

O Jisu e sega ni bau guilecava na Tamana mai lomalagi. E sega ni kumuna vakalevu na ilavo. E sega tale ga ni taukena e levu na veika vakayago. E kila o Jisu na ka e bibi duadua me cakava. O kila se cava oya?— Me vutuniyau ena mata ni Kalou.

Na cava e cakava tiko na gone oqo e bibi dina?

Tukuna mada vei au se rawa vakacava meda vutuniyau ena mata ni Kalou?​— Eda na vutuniyau ena mata ni Kalou kevaka eda cakava na veika  e vinakata. E kaya o Jisu: ‘Au kitaka tiko ga na ka e vinakata o koya.’ (Joni 8:29) E marautaka na Kalou nida cakava na veika e vinakata. Tukuna mada vei au na veika o rawa ni cakava me vakamarautaka na Kalou?— Io, ni o wilika na iVolatabu, ni o lako ina soqoni vakarisito, ni o masu vua na Kalou, kei na nomu vukei ira tale e so mera kila na Kalou. Oya dina na veika bibi meda cakava.

Ni vutuniyau tiko ga ena mata ni Kalou o Jisu e saumi koya kina o Jiova. E solia vua na icovi ni bula tawamudu. Kevaka eda vakataki Jisu, ena lomani keda o Jiova qai saumi keda tale ga. Meda vakataki Jisu tiko mada ga da qai kua vakadua ni vakataki koya na tamata vutuniyau e guilecava na Kalou.

Oqo e so na tikinivolatabu e vakaraitaka na ivakarau ni noda raica donu na veika vakayago: Vosa Vakaibalebale 23:4; 28:20; 1 Timoci 6:6-10; kei na Iperiu 13:5.