Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 48

Vakabulai na Luve ni Yada

Vakabulai na Luve ni Yada

Ena gauna ni lauqa, e kaya vei Ilaija o Jiova: ‘Lako i Sarifaci, e tiko e kea e dua na yada, ena solia na kemu.’ Ni yaco ena matamatanikoro, e raica sara na yada ni cabuka tiko. E kerea vua e dua na bilo wai. Ni gole na yada me kauta mai, e kaya tale yani o Ilaija: ‘Yalovinaka, me dua tale ga na tikinimadrai.’ E kaya na yada: ‘E sega na madrai meu solia vei kemuni. E vo tiko ga vakalailai na falawa kei na waiwai me rauti au ga kei luvequ tagane.’ E kaya o Ilaija: ‘E yalataka o Jiova, ke o bulia vei au eso na madrai, ena sega sara ni oti na falawa kei na waiwai yacova ni tau na uca.’

E gole sara i vale na yada qai bulia na kena madrai na parofita. Me vaka ga e yalataka o Jiova, e sega ni oti na kedrau falawa kei na waiwai ena gauna ni lauqa. E sinai tu ga nodrau saqa.

E qai yaco e dua na ka vakaloloma. E tauvimate bibi o luvena  tagane mani mate. E kerea me vukei koya na parofita. E taura sara na gone o Ilaija mai vei tinana, kauti koya ina tabavale e cake, vakadavori koya qai masu: ‘Kemuni Jiova, yalovinaka ni vakabula na gone qo.’ Ena vakatubuqoroqoro dina ke cakava qori o Jiova, se vakacava? Ni se bera ni dua e vakabulai ena gauna qori. Kena ikuri, erau sega mada ga ni Isireli.

E qai bula tale na gone ni suka vua na nona icegu! E kaya vua na yada o Ilaija: ‘Raica! Sa bula na luvemu.’ Dua na ka na marau i tinana, e kaya vei Ilaija: ‘Au kila ni oni tamata dina ni Kalou, oni tukuna ga na ka e vinakata.’

“Dou raici ira vinaka mada na reveni. Era sega ni kaburaka na sorenikau se tatamusuki, e sega tale ga na nodra lololo, ia e vakani ira na Kalou. Dou sega ni uasivi ira na manumanuvuka?”—Luke 12:24