Raica sara na lewena

Raica na lewenivola

 WASE 99

Vulica na Dina na Ovisa ni Valeniveivesu

Vulica na Dina na Ovisa ni Valeniveivesu

E tiko e Filipai e dua na goneyalewa bobula e curumi timoni. E vakayagataki koya na timoni me dau tukuna na ka e se bera ni yaco, qo e vakavutuniyautaki ira nona turaga. Ni rau yaco yani o Paula kei Sailasa, e vakamuri rau na goneyalewa qo me vica na siga. E vakavuna na timoni me kailavaka: ‘O rau na tagane qo erau dauveiqaravi ni Kalou Cecere Duadua.’ E qai tukuna o Paula vua na timoni: ‘Au vakaroti iko ena yaca i Jisu mo lako tani mai vua!’ E mani biuti koya na timoni.

Nira kila nona turaga nira sa na sega ni rawailavo ena vuku i goneyalewa bobula, dua na ka nodra cudru. Era yarataki Paula kei Sailasa vei ratou na vakailesilesi ni mataveilewai, era kaya: ‘Erau beca na lawa na tagane qo, rau vakavuleqa tale ga ena koro!’ Eratou vakarota na vakailesilesi ni mataveilewai me rau kuitataki rau qai biu i valeniveivesu. E mani biuti rau ena dua na rumu buto na ovisa ni valeniveivesu, rau vesu ena ivesu kau.

Erau lagasere o Paula kei Sailasa me rau vakacaucautaki Jiova nira vakarorogo tu na vo ni kaivesu. Ena lomaloma ni bogi, e qai yaco e dua na uneune kaukaua, e yavalata sara ga na valeniveivesu. E tadola na kena katuba, e tasere tale ga na kedra ivesu na kaivesu. Ni cici yani na ovisa ina lomadonu ni valeniveivesu, sa tadola tu na katuba kece. E nanuma sara ga nira sa dro kece na kaivesu, mani taura e dua na iseleiwau me via vakamatei koya.

Gauna vata qori e kailavaka yani o Paula: “Kua ni vakamavoataki iko, keimami se tu kece qo!” E cici yani na ovisa ni valeniveivesu qai cuva sobu e mata i Paula kei Sailasa. E tarogi rau: “Na cava meu cakava meu bula kina?” Erau kaya: ‘Vakabauti Jisu, o iko kei ira na lewe ni nomu vuvale.’ Rau qai vakavulici koya ena vosa i Jiova mani papitaiso kei ira na lewe ni nona vuvale.

“Era na tauri kemudou qai vakacacani kemudou, era na soli kemudou ina nodra valenilotu kei na valeniveivesu. Dou na kau ina matadra na tui kei na kovana ena vuku ni yacaqu. Qori e gauna vinaka mo dou vakadinadina kina vei ira.”​—Luke 21:12, 13