Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 100

O Paula kei Timoci

O Paula kei Timoci

O Timoci e dua na cauravou ena ivavakoso e Lisitira. E turaga ni Kirisi o tamana, e Jiu o tinana. Ni se gone o Timoci, e dau vakavulici koya o Unaisi na tinana kei Loi na buna ena veika me baleti Jiova.

Ni sikovi Lisitira o Paula ena ikarua ni nona ilakolako vakavunau, e raica ni lomani ira vakalevu na mataveitacini o Timoci, e gu tale ga me vukei ira. E sureti koya sara o Paula me rau lako vata. Toso na gauna, e vakavulici Timoci me maqosa ena vunautaki ni itukutuku vinaka kei na veivakavulici.

E dusimaki Paula kei Timoci na yalo tabu ena veivanua rau lakova. Dua na bogi, e raivotutaka o Paula ni sureti koya tiko e dua na turaga me lako yani i Masitonia me vukei ira. E mani lako o Paula, Timoci, Sailasa, kei Luke me ratou lai vunau e kea, me tauyavu tale ga na ivavakoso.

Era mai lotu vaKarisito e levu na tagane kei na yalewa ni Cesalonaika, qo e koro vakaMasitonia. Ia eso na Jiu era vuvutaki Paula kei ratou na nona itokani. Era soqona mai e dua na ilala ra qai yarataka eso na veitacini vei ira na iliuliu ni koro, era kailavaka: ‘O ira qo era saqata na matanitu o Roma!’ E leqataki sara na bula i Paula kei Timoci, rau mani dro i Peria ni sa buto.

Era vinakata na lewe i Peria mera kila na itukutuku vinaka, era mani vakabauta na Jiu kei ira na kai Kirisi. Ia nira mai vakatubuca eso na Jiu era lako mai Cesalonaika, e biubiu sara o Paula me lako i Aceni. Rau tiko ga e Peria o Timoci kei Sailasa me rau vakayaloqaqataki ira na mataveitacini. Toso na gauna,  e talai Timoci o Paula me lesu i Cesalonaika me tokoni ira na mataveitacini e kea era vakacacani. Oti e talai tale me sikova e levu na ivavakoso, me vakayaloqaqataki ira.

E tukuna o Paula vei Timoci: ‘O ira na via qaravi Jiova era na vakacacani.’ A vakacacani o Timoci ena vuku ni nona vakabauta, e curu tale ga e valeniveivesu. E marau ni rawa ni vakaraitaka nona yalodina vei Jiova.

E kaya o Paula vei ira mai Filipai: ‘Au sa talai Timoci yani vei kemuni. Ena vakavulici kemuni ena ka dina kei na cakacaka vakaitalatala.’ A nuitaki koya o Paula ni rau cakacaka vata me vica na yabaki, erau veitokani vinaka tale ga.

“Niu sega tale ni kila e dua ena qarava vinaka na ka e baleti kemuni me vakataki koya. Ni o ira na kena vo era qara ga na ka e baleti ira, era sega ni qara na ka e baleti Jisu Karisito.” —Filipai 2:20, 21