Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 96

Digitaki Saula o Jisu

Digitaki Saula o Jisu

E turaga ni Roma o Saula, e sucu mai Tarisu. E Farisi, e kila vinaka na nodra Lawa na Jiu, e cati ira tale ga na lotu vaKarisito. E dau yarataki ira mai na nodra vale qai biuti ira e valeniveivesu. A duri tu nira vakaviriki Sitiveni na ilala cudrucudru me yacova ni mate.

E vinakata tale ga o Saula me vesuki ira na lotu vaKarisito ena so tale na vanua, sega ni o ira ga e Jerusalemi. E mani kerea me vakadonuya na bete levu me gole i Tamasiko me vaqarai ira na lotu vaKarisito e kea. Ni volekata yani na koro, e qai cilavi koya vakasauri e dua na rarama mani bale ina qele. E rogoca sara e dua na domo: ‘I Saula, na cava o vakacacani au kina?’ E taroga o Saula: “O cei o kemuni?” E qai saumi mai: ‘O yau o Jisu. Lako i Tamasiko, ena tukuni vei iko na ka mo cakava.’ E qai mataboko vakasauri o Saula, era mani tuberi koya ina koro.

E tiko e Tamasiko e dua na lotu vaKarisito yalodina o Ananaiasa. A tukuna vua o Jisu ena raivotu: ‘Lako ina vale nei Jutasa ena gaunisala o Dodonu, mo raici Saula kina.’ E kaya o Ananaiasa: ‘Turaga, au kila na ka e dau cakava na tagane qori! E biuti ira tiko nomuni tisaipeli e valeniveivesu!’ Ia e kaya vua o Jisu: ‘Lako vua. Au sa digitaki Saula me vunautaka na itukutuku vinaka ina veimatanitu.’

Ni raici Saula o Ananaiasa, e tukuna vua: ‘I Saula na taciqu, e talai au mai o Jisu mo rawa ni rai tale.’ E vakasauri ga sa vinaka tale na mata i Saula. E vulica na veika me baleti Jisu, e mai nona imuri. Ni sa papitaiso me lotu vaKarisito, e vunau sara ena veivalenilotu kei ira  nona itokani vakabauta. Sa wacava nodra kidroa na Jiu nira raici koya ni vakavulica tiko na veika me baleti Jisu. Era kaya: ‘Sega ni o koya ga qo e dau vakacacani ira na tisaipeli i Jisu?’

E tolu na yabaki nona vunau o Saula vei ira e Tamasiko. Era cati koya na Jiu, era via vakamatei koya. Nira kila qori na mataveitacini, era vukei koya me dro. Era biuti koya sobu ena dua na basikete ena katubaleka ni bainikoro.

Ni yaco i Jerusalemi o Saula, e vinakata me sotavi ira na mataveitacini e kea, ia era rerevaki koya. E mani kauti koya na tisaipeli yalovinaka o Panapasa vei ratou na yapositolo me vakamacalataka ni sa veisau dina. E gumatua o Saula ni vunautaka na itukutuku vinaka kei ira na lewe ni ivavakoso e Jerusalemi. E kilai tale ga me o Paula.

“[E] lako mai vuravura o Karisito Jisu me vakabulai ira na ivalavala ca. Au torosobu duadua vei ira qori.”​—1 Timoci 1:15