Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 88

Vesu o Jisu

Vesu o Jisu

E taubale o Jisu kei ratou na yapositolo ena Buca o Kitironi me ratou lako ina Ulunivanua ni Veiolive. Sa bogilevu na vanua qai cila vinaka tu na vula. Ni ratou yaco ena were o Kecisemani, e kaya vei ratou o Jisu: “Dou tiko eke, dou yadra tiko.” Sa qai toso vakalailai i liu, e tekiduru me masu. Dua na ka nona rarawa, e masuti Jiova: “Me yaco ga na lomamuni.” E qai tala o Jiova nona agilosi me vakayaloqaqataki koya. Ni lesu o Jisu vei ratou na yapositolo, e raica ni ratou moce tu e tolu. E kaya: ‘Dou yadra! Qo e sega ni gauna ni moce! Sa voleka na aua meu soli kina vei ira na meca.’

Ni se vosa tiko ga, sa basika mai o Jutasa kei na dua na ilala levu era tauri iseleiwau kei na kau. E kila vinaka o Jutasa na vanua ena tiko kina o Jisu ni ratou dau lako vakalevu ena were qo. Sa tukuna oti vei ira na sotia ni na vakaraitaki koya. E lako vakadodonu vua qai kaya: ‘Bula vinaka Qasenivuli,’ e reguci koya sara. E kaya o Jisu: ‘Jutasa, o soli au yani ena dua na iregu?’

E torovi ira na ilala levu o Jisu qai taroga: “Oni vaqarai cei?” Era kaya: “O Jisu na kai Nasareci.” E qai tukuna vei ira: “O yau qo,” era suka i muri ra qai bale ina qele. E tarogi ira tale o Jisu: “Oni vaqarai cei?” Era kaya: “O Jisu na kai Nasareci.” E sauma: ‘Au sa tukuna oti vei kemuni ni o yau ga qo. Biuti ratou qo me ratou lako.’

E raica o Pita na ka e yaco tiko mani taura na iseleiwau qai taya laivi na daliga i Maliko, na dauveiqaravi ni bete levu. Ia e tara na daligana o Jisu mani vinaka tale. E tukuna sara vei Pita: ‘Biuta tani nomu iseleiwau. Ke o  vala ena iseleiwau, o na mate ena iseleiwau.’ Era vesuki Jisu na sotia ratou qai dro na yapositolo. Era kauti koya sara vei Anasa na iliuliu ni bete. Ni vakatarogi Jisu oti, e vakatalai koya vei Kaiafa na Bete Levu. Na cava e qai yacovi ratou na tisaipeli?

“Dou na vakararawataki e vuravura, ia dou yaloqaqa! Au sa vakamalumalumutaki vuravura.”—Joni 16:33