Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 89

Cakitaki Jisu o Pita

Cakitaki Jisu o Pita

Ni tiko o Jisu kei ratou nona yapositolo ena rumu ni tabavale e cake, e tukuna vei ratou: ‘Dou na biuti au kece ena bogi nikua.’ E kaya o Pita: ‘Sega! Ke ratou biuti kemuni kece qo, au na sega vakadua ni biuti kemuni.’ Ia e kaya vua o Jisu: ‘Ni bera ni tagi na toa, o sa na tukuna oti vakatolu ni o sega ni kilai au.’

Era kauti Jisu vei Kaiafa na sotia, ratou sa dro tale ga na vo ni yapositolo. Ia rau muri ira na ilala levu o Pita kei na dua tale na yapositolo. E curu o Pita ina rara ni vale i Kaiafa qai duri toka ena yasa ni buka ni katakata vinaka. Ena rarama ni buka qori, e raica kina na mata i Pita e dua na yalewa dauveiqaravi qai kaya: ‘Au kilai iko! O dau tiko vata kei Jisu!’

E kaya o Pita: ‘Sega, sega ni o yau qori! Au sega ni kila na ka o tukuna tiko!’ E gole ina matamata qai raici koya e dua tale na yalewa dauveiqaravi, e tukuna vei ira na ilala levu: ‘Na tagane qo e dau tiko vata kei Jisu!’ E kaya o Pita: ‘Au sega mada ga ni kilai koya!’ E kaya e dua na tagane: ‘O dua vei ira! Au rogoca ga nomu ivosavosa, au kila ni o lako mai Kalili me vakataki Jisu.’ E bubului o Pita: ‘Au sega ni kilai koya!’

Ena gauna vata qori e tagi na toa. E vuki o Jisu qai raici koya yani o Pita. E nanuma sara na ka e tukuna o Jisu, e curu i tuba qai tabalaka na tagi.

E tuvanaka na Sanadrini me lewai o Jisu ena vale i Kaiafa. Era nakita mera vakamatei koya, ia me dua na vuna vinaka. Era sega ni beitaki koya rawa ena dua na ka. E mani tarogi Jisu vakadodonu o Kaiafa: ‘O iko na Luve ni Kalou?’ E kaya o Jisu: ‘Io.’ E kaya o Kaiafa: ‘Na ivakadinadina cava tale eda vinakata. E vosabeca na Kalou!’ Qo na ka e qai vakadonuya na  mataveilewai: ‘Me mate na tamata qo.’ Era sabaki Jisu, kasiviti koya, era ubia na matana ra qai vacuki koya nira kaya tiko: ‘Ke o parofita, tukuna mai se o cei e vacuki iko tiko!’

Ni sa mataka, era kauti Jisu ina valeniveilewai ni Sanadrini ra qai tarogi koya tale: ‘O iko na Luve ni Kalou?’ E sauma o Jisu: ‘Oni sa tukuna tiko ga mai qori.’ Era mani beitaki koya ni vosabeca na Kalou ra qai kauti koya ina vale i Ponitio Pailato, na kovana ni Roma. Na cava e qai yaco? Meda raica mada.

‘Sa yaco mai na gauna, dou na dui se kina ina nomudou vale, dou na qai biuti au duadua tu. Ia au sega ni tiko duadua, ni tiko vata kei au o Tamaqu.’ —Joni 16:32