Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 78

Vunautaka o Jisu na Matanitu ni Kalou

Vunautaka o Jisu na Matanitu ni Kalou

Ni oti ga vakalailai nona papitaiso o Jisu, e vunautaka sara: ‘Sa voleka na Matanitu ni Kalou.’ Era tomani koya nona tisaipeli ni lako e Kalili kei Jutia. Ni lesu ina nona koro o Nasareci, e gole sara ina valenilotu, cega na ivolavivigi nei Aisea qai wilika vakadomoilevu: ‘E solia vei au o Jiova na yalona tabu meu vunautaka na itukutuku vinaka.’ Na cava e kena ibalebale qori? E sobuti koya na yalo tabu me vunautaka na itukutuku vinaka. Ia o ira na lewenivanua era via raica ga nona cakamana. E qai tukuna vei ira na vakarorogo: ‘Sa vakayacori dina nikua na parofisai qo.’

E gole sara o Jisu ina Wasa o Kalili, e kunei ratou kina na va na nona tisaipeli, eratou dauqoli. E sureti ratou ni kaya: ‘Dou muri au, au na qai lesi kemudou mo dou gonedau ni tamata.’ Qo o Pita, Adriu, Jemesa kei Joni. Eratou biuta sara nodratou bisinisi ni qoli, ratou muri koya. Eratou vunautaka ena veivanua kece e Kalili na Matanitu i Jiova, ena valenilotu, makete kei na gaunisala. E tomani ratou e veivanua e dua na ilala levu. E robota na veivanua na itukutuku kei Jisu, yaco sara i Siria.

Toso na gauna, e solia o Jisu na kaukaua vua e vica na nona imuri me ratou veivakabulai, me ratou vakasavi ira tale ga na timoni. Eso tale era tomani koya ni lai vunau ena koro lelevu kei na koro lalai. Era qaravi Jisu vinaka kei ratou na nona imuri e vica na yalewa yalodina me vakataki Meri Makitala, Joana kei Susana.

Ni vakavulici ratou oti nona tisaipeli o Jisu, e talai ratou sara me ratou vunau. Eratou gole ena veivanua e Kalili, e levu tale era mai tisaipeli, ra papitaiso sara. Levu era vinakata mera tisaipeli, e kaya kina o Jisu nira vaka na were e vakarau tamusuki. E kaya: ‘Ni kerei Jiova me tala mai e levu tale na tamata cakacaka mera mai tatamusuki.’ Dua tale na gauna, e digia o Jisu e 70 nona tisaipeli qai talai ira yarua mera vunau ena veivanua kece e Jutia. Era vakavulici ira na tamata kece ga me baleta na Matanitu ni  Kalou. Era via lai talanoataka sara ga vei Jisu na ka era sotava. E sega ni tarova rawa na Tevoro na cakacaka vakavunau.

E vinakata o Jisu mera tomana nona tisaipeli na cakacaka bibi qori ni sa lesu i lomalagi. E tukuna vei ira: ‘Ni vunautaka na itukutuku vinaka e veiyasa i vuravura. Vakavulici ira na lewenivanua ena Vosa ni Kalou qai papitaisotaki ira.’

“E dodonu meu tukuna tale ga na itukutuku vinaka ni Matanitu ni Kalou ena koro tale eso, ni qo na ka au talai mai kina.”—Luke 4:43