Raica sara na lewena

Raica na lewenivola

 WASE 82

Vakavulica o Jisu na iVakarau ni Masu

Vakavulica o Jisu na iVakarau ni Masu

Era dau cakava na Farisi na ka mera qoroi kina. Era na veivuke me rawa ga nira raica na lewenivanua. Qori tale ga na ka era namaka nira masu ena vanua e laurai levu. Era dau cavuqaqataka eso na masu balavu ena valenilotu se veibasoga ni sala mera rogoca na tu voleka. Sa rauta mera kurabui na lewenivanua ni tukuna vei ira o Jisu: ‘Ni kua ni muria na ivakarau ni nodra masu na Farisi. Era nanuma ni na taleitaka na Kalou nodra masu balabalavu. Na masu e baleti iko ga kei Jiova. Me kua ni dua tu ga na qaqa ni nomuni masu. E vinakata o Jiova moni tukuna vua na lomamuni.

‘Mo dou masu va qo: “Tamai keimami mai lomalagi, me vakarokorokotaki na yacamuni. Me yaco mai na nomuni Matanitu. Me caka na lomamuni e vuravura me vaka e caka  tiko mai lomalagi.”’ E tukuna o Jisu vei ira na lewenivanua mera masulaka na veika me baleti ira, mera kerea na kakana e rauti ira ena dua na siga, me vosoti tale ga nodra cala.

E kaya o Jisu: ‘Kua ni cegu ena masu. Kerea tiko ga na veika vinaka vua na Tamamudou o Jiova. Era dau vinakata na itubutubu mera solia na ka vinaka vei luvedra. Ke kerea o luvemu na madrai, vakacava o na solia vua na vatu? Ke kerea na ika, o na solia vua na gata?’

E qai vakavulica o Jisu: ‘Ke sa rawa mo dou solia na ka vinaka vei ira na luvemudou, sa na qai wacava na Tamamudou o Jiova me solia vei kemudou na yalo tabu. E vinakati ga mo dou kerea.’ Vakacava o dau muria na ivakasala i Jisu ni o masu? Na cava o dau masulaka?

“Kerekere tiko ga, ena qai soli vei kemudou, vaqaqara tiko ga, dou na qai kunea, tukituki tiko ga, ena qai dolavi vei kemudou.” —Maciu 7:7