Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 83

Vakania o Jisu e Vica na Udolu

Vakania o Jisu e Vica na Udolu

Eratou lesu mai na vunau na yapositolo ni bera na Lakosivia ena yabaki 32 G.V. Dua na ka nodratou oca, mani kauti ratou o Jisu i Peciseita ni ratou vodo waqa, me ratou lai vakacegu kina. Ni voleka yani na waqa e matasawa, e raica o Jisu nira tu e kea e dua na ilala levu era muri ratou yani. A vinakata o Jisu me veimaliwai ga kei ratou na nona yapositolo, ia e ciqomi ira na ilala qori ena yalovinaka. E vakabulai ira na tauvimate, e vakavulici ira tale ga. Ena siga taucoko qori, a vakavulici ira o Jisu ena itukutuku ni Matanitu ni Kalou. Ni sa yakavi, eratou lako vua na yapositolo, eratou kaya: ‘Era sa na viakana na ilala qo. Tukuna mada mera lai volia na kedra.’

E kaya o Jisu: ‘E sega ni yaga mera lako. Dou vakani ira.’ Ratou taroga na yapositolo: ‘Me keitou lai volia mai na kedra madrai?’ E kaya o Filipi, e dua vei ratou na yapositolo: ‘Ke levu mada ga nodatou ilavo, ena sega ga ni veirauti na madrai.’

E taroga o Jisu: ‘E vica na madrai qori?’ E sauma o Adriu: ‘E lima na madrai, rua na ika lalai, e sega ni veirauti.’ E kaya o Jisu: ‘Solia mai na madrai kei na ika.’ E tukuna vei ira na ilala levu mera dabe vakaiwasewase ena co, ya me ya50 se ya100. E taura o Jisu na madrai kei na ika, e rai cake i lomalagi qai masu. Oti e solia na kakana vei ratou na yapositolo, ratou wasea sara vei ira na ilala qo. Era kana kece, era mamau na le 5,000 na tagane, o ira na yalewa kei na  gone. Oti qori, eratou qai kumuna na yapositolo na kena vo me kua ni maumau. E sinai e 12 na basikete! Sa bau vakatubuqoroqoro dina na cakamana qo, se vakacava?

Era qoroya na ilala qo na ka e cakava o Jisu, era vinakata mera buli koya me nodra tui. Ia e kila o Jisu ni sega ni inaki i Jiova me tui ena gauna qori. E mani talaci ira na ilala levu qai tukuna vei ratou nona yapositolo me ratou lako ina tai ni Wasa o Kalili. Ratou vodo sara i waqa, e lako duadua o Jisu ina ulunivanua. Na vuna? E vinakata me masu vei Tamana. E turaga osooso o Jisu, ia e dau vakatikitikitaka na gauna me masu kina.

“Ni kua ni cakacakataka na kakana e ca rawarawa, na kakana ga e tudei me rawati kina na bula tawamudu, ena solia vei kemuni na Luve ni tamata.”​—Joni 6:27