Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 79

Levu na Cakamana i Jisu

Levu na Cakamana i Jisu

A lako mai vuravura o Jisu me kacivaka na itukutuku vinaka ni Matanitu ni Kalou. O Jiova e solia vua na yalona tabu me cakamana, me vakaraitaka na ka ena cakava o Jisu ni sa Tui. A rawa ni vakaotia na mate kece. Na veivanua e lakova, era muri koya na tauvimate qai vakabulai ira. Era rai na mataboko, era rogo na didivara, era taubale na paralasi, e vakasavi ira tale ga na timoni. Era vakabulai mada ga o ira na tara na bele ni nona isulu. Era muri Jisu na lewenivanua ena vanua e lako kina. Na gauna mada ga e via tiko taudua kina, e sega ni vakatalai ira.

E kau ena vale e tiko kina o Jisu e dua na tagane paralasi. Sa oso tu na vale, era sega ni curu rawa i loma o ira na kauti koya yani. Era basuka na delanivale, ra qai biuta sobu yani vakamalua na tagane qori. E kaya sara o Jisu vua na tagane: ‘Tucake, mo lako.’ Ni cakava qori na tagane ya, era qoroqoro na tu e kea.

Dua tale na gauna ni curu o Jisu ena dua na koro, ratou duri tu mai vakayawa e tini na tagane vukavuka, ratou kailavaka tiko: ‘Jisu, vakabulai keitou!’ E vakatabui ena gauna ya mera veimaliwai kei ira na lewenivanua na vukavuka. E tukuna vei ratou o Jisu me ratou lako ina valenisoro, qori na ka e vakaroti ena Lawa mera cakava na vukavuka nira sa vakabulai. Ni ratou lako tiko, sa oti nodratou  vukavuka. E qai lesu e dua vei ratou me vakavinavinaka vei Jisu, me vakacaucautaka tale ga na Kalou.

Sa 12 na yabaki nona tauvimate e dua na marama, e vinakata sara ga me bula. E tomani ira na ilala era muri Jisu tiko qai tara na bele ni nona isulu, e mani vakabulai. E taroga o Jisu: “O cei e tarai au?” Dua na ka nona rere na marama ya, ia e qai tukutuku vakadodonu. E vakacegui koya o Jisu ni tukuna: ‘Luvequ, lako ena vakacegu.’

A vakamasuti Jisu o Jairo na ivakatawa ni valenilotu: ‘Ni lako mai noqu vale! Sa tauvimate bibi na luvequ yalewa lailai.’ Ia ni lako tiko o Jisu ina vale i Jairo, sa mate o luvena. Ni yaco yani, e raica e le levu nira vakacegui ratou tiko na vuvale. E kaya vei ira o Jisu: ‘Ni kua ni tagi, e moce ga o koya.’ E qai taura na liga i goneyalewa, e kaya: “Lewa, tucake!” E duri sara o goneyalewa qai kaya o Jisu vei rau na nona itubutubu me rau vakani koya. Raitayaloyalotaka mada nodrau marau na nona itubutubu!

‘E lumuti koya na Kalou ena yalo tabu, e solia tale ga vua na kaukaua, e qai lakova e levu na vanua me cakava e levu na ka vinaka, me vakabulai ira e vakararawataki ira na Tevoro, ni tiko vata kei koya na Kalou.’​—Cakacaka 10:38