Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 WASE 80

Digia o Jisu e Tinikarua Nona Yapositolo

Digia o Jisu e Tinikarua Nona Yapositolo

E dua na vakatulewa bibi me cakava o Jisu ni oti toka e dua veimama na yabaki nona vunau. O cei soti ena digitaka me cakacaka vata kei koya? O cei tale ga ena vakavulica me veiliutaki ena ivavakoso vaKarisito? Ena nuitaka o Jisu me dusimaki koya o Jiova ena vakatulewa qori. E mani lako duadua ina ulunivanua qai masu ena bogi taucoko. Ena mataka, e kaciva eso na nona tisaipeli qai digitaka e 12 na nona yapositolo. Vakacava o nanuma tiko na yacadratou? O Pita, Adriu, Jemesa, Joni, Filipi, Pacolomiu, Tomasi, Maciu, Jemesa na luvei Alifio, Cateo, Saimoni, kei Jutasa Isikarioti.

Adriu, Pita, Filipi, Jemesa

Eratou na tomani Jisu na le Tinikarua. E vakavulici ratou, oti sa qai talai ratou yani me ratou vunau. A vakaukauataki ratou o Jiova me ratou vakasavi ira na timoni, me ratou vakabulai ira tale ga na tauvimate.

Joni, Maciu, Pacolomiu, Tomasi

E okati ratou o Jisu me ratou nona itokani, e nuitaki ratou tale ga. Era tukuna na Farisi ni ratou sega ni vuli vinaka sara na  yapositolo, eratou tauvanua tale ga. Ia o Jisu ga e vakavulici ratou ena itavi me ratou qarava. Ratou na tiko vata kei Jisu ena gauna bibi duadua ni bera ni mate kei na nona vakaturi. Era lako mai Kalili eso vei ratou me vakataki Jisu ga, eso ga e vakawati.

Jemesa na luvei Alifio, Jutasa Isikarioti, Cateo, Saimoni

Eratou dau cala na yapositolo ni ratou sega ni uasivi. Ena so na gauna ratou vakatulewa cala ni ratou sega ni vakasama vinaka mada, ratou yalototolo tale ga. Ratou dau veibataka na itutu, ia eratou lomani Jiova, ratou nuitaki tale ga. O ratou ga qo na yavu ni ivavakoso vaKarisito ni sa na lako o Jisu.

“Au sa kacivi kemudou mo dou noqu itokani, baleta na ka kece au rogoca vei Tamaqu au vakatakila vei kemudou.”​—Joni 15:15